Ads by Google Ads by Google

Fagogo: Alofa, se ia tiga

Vaega: 28

 

Ua na o lo’u pupula atu nei i lo’u tama, ona i lea taimi, ua fa’asolosolo o’u mafaufauga i le tala a lo’u tama, na fai mai ia te a’u, i le fale o Ana. O le tala a lo’u tama ia te a’u, o lo’u tina moni lava na ou iloa ai le lalolagi, o se tagata nu’u o le Malo o Amerika.

 

Na toe foi nei i tua o’u mafaufauga i lea taimi, ma o le tele lava  fesili ua oso mai nei i lo’u mafaufau, ona o lo’u fia iloa po’o le a le uiga o le tala a lo’u tama. Na ou toe tilotilo atu nei i le isi itu, o lo’o tautau mai ai le ata tele lava ma lo’u tina o Makerita. Na ou tilotilo atu nei i le fafine sa i ai lo’u manatu o lo’u tina moni, le fafine ua ou toe manatua nei, e seasea alu ane e asi a’u i lo’u potu, le fafine o lea ua ou iloa nei ona uiga leaga ma le le alofa ia te a’u.

 

Na ou toe tilotilo atu i le isi itu o le potu po’o le ofisa o lo’u tama, ma ou iloa atu o lo’o tautau mai ai la matou ata ma o’u tuagane o Peteru ma Ioane. Ua ‘ese lava o’u lagona i lea taimi ina ua ou iloa atu le ata o lo’u tuagane o Peteru, o le ata ou te iloa na pu’e pe a ma le valu o o’u tausaga, fa’atasi ma o’u tuagane. O le isi itu o le ofisa o lo’u tama o lo’o tautau mai ai le ata o matou uma lava, o lo’u tama ma lo’u tina, o a’u  ma o’u tuagane.

 

Ua ta’ita’i nei a’u e lo’u tama i le itu o lo’o i ai le nofo ua sili ona matagofie i le va’ai, ma ma saofafa’i ifo loa i lalo. Ua le mafai lava ona tatali le vaivai o lo’u loto, ua foliga mai ua toe fafagu uma mai mea tiga ua fai e Makerita ia te a’u, ae maise fo’i o lo’u tuagane o Peteru.

 

Na taumafai nei si o’u tama e fa’ato’ato’a a’u, ae ua le mafai lava, ua ou malie lava, ia fa’asau uma i lalo o’u loimata, atonu o le a maua ai le filemu o lo’u loto ma mafai ai ona ou tautala ai i si o’u tama, ona o lea ua maua le taimi lelei ma te talatalanoa ai.

 

“Papa, ou te fa’afetai ia te oe si o’u tama pele, ua ou iloa lelei lou alofa ma lou naunau mai ia te a’u, ae ui i lea, ua pei o se ipuvai o’ona ua ou inuina i lenei taimi, ua ou le lava fa’alogologo so’o i upu e lafo e Makerita e uiga ia te a’u.” Na ou tau mafaufau nei i nisi mea na tutupu i lea aso, “Papa, na ou fa’alogo ua tautala Peteru e uiga ia te a’u, fai mai o a’u e le o sona tuafafine, e le iloa po’o ai so’u tina ma o le aiga o lo’u tina moni e matitiva, e lima vaivai, e fia a’ai solo i le auala.”

 

“Papa, ou te loto tele lava, ma ou te talia mea uma, ‘aua e te popole ia te a’u, pau lava le mea e sili ona taua ma ua ou fiafia ai ma ou loto tele ai, ua ou iloa o lo’o soifua pea si o’u tina moni, pau fo’i le tulaga ua ou fiafia ai tele, ona ua ou iloa mea uma o Makerita e le o so’u tina moni.”

 

Na punou nei lo’u tama ua leai ma se tala e toe fai mai ia te a’u, ae sa ou soso atu pea i ai, ina ia malamalama ai lona mafaufau i le mea ou te mana’o ai.

 

Na fa’ate’ia a ma talanoaga ma lo’u tama ina ua tatagi le telefoni, na tu a’e nei i luga lo’u tama ma savali atu i le laulau o lo’o i ai le ta’atia mai ai le telefoni. Na pau le upu a lo’u tama na fai atu i le tagata o lo’o i luga o le laina, “Ua lelei, o mai loa i totonu o lea ou te fa’atali atu.”

 

E faia pea