Fagogo: Alofa, se ia tiga

Vaega: 101

 

Fa’atalofa atu i lou alafa’i mai i fanuga lenei i lenei taeao fou i le alofa ma le agalelei o le Atua Soifua, e ao ai ona o tatou momoli le fa’afetai ma le vi’iga i le Atua, ona o Lana tausiga alofa mo i tatou i aso uma o lo tatou ola.

 

Ua fa’aauau pea la matou mataupu ma o’u matua o taimi uma lava sa ou tautala atu ai i lo’u tina, e pei e fofo’e ese o’u tiga sa i ai. E le i uma atu a’u fa’amatalaga ae puna mai Makerita, “Averia, e leai lava ma sau feau e te tautala ai i mea ia, ua e fa’alogo mai ia te a’u, o mea uma lava nei e alu uma lava i luga o la’u fanau, o Peteru ma ioane, a’o oe, e leai lava ma se mea e tasi e te maua, ma ou te le o popole lava i ia itu Averia, ae au e su’e lou tina po’o fea o ta’a solo ane ai, e le taitai lava o ma tutusa ma lou tina ua e iloa, e soli e o’u vae.”

 

Na tau manava nei itotonu Makerita, ma e foliga mai o le a tau oso sona ma’i i lea taimi, ae matala mai loa ma le faitoto’a, ma ou iloa ai o lo’u tuagane leaga o Peteru.

 

“Averia, po’o a lava nisi mea e te fai mai ai ia te a’u, ua ou malo ia Mikaele, lou tama lena, o fea lava la le mea e sasao i ai lau afi, ua ou manu malo i mea uma, ua ma fa’aipoipo ma lou tama, ae le o lou tina ua e fa’alogo mai ia te a’u, ‘aua la’ia ne i toe i ai lava sau tala e toe fai mai ia te a’u, ua e fa’alogo mai.”

 

Na ou tilotilo atu nei i lo’u tuagane, ae foliga mai o lo’o ‘ata’ata ma tilotilo atu i lona tina. Ou te le i fa’atali i lea taimi, “Makerita, e tutusa uma lava o matou aia ma Peteru ma Ioane i mea uma lava, ma e leai se tasi na te mafaia ona ave’ese le tulaga lena, ua uma fo’i ona fai mea uma mo matou, a’o oe, ou te le iloa po’o ai oe, ae va’ai oe, e savali lo’u tina i ou foliga, aisea, o lo’u tina e loto alofa, e loto maualalo, a’o oe, ua uma ona ta’u mai uma e tagata faigaluega ia te a’u ou uiga leaga, a’o ai e fia fai tina ia te oe, ai lava na o lau tama lena, leaga ua uma ona e a’oaia i tala ma mea leaga uma, o lena la e te lua tutusa ai lava.”

 

Na ou iloa atu nei le tau mavava mai o le gutu o Peteru, ae ou toe oso atu, “Peteru, taofi, e sa ona e tautala mai ia te a’u, ua e fa’alogo mai, afai ua e le iloa lo ta va, ona o a’oa’oga leaga a lou tina, ona tu’u lea, e sa sa lava ona e tautala mai ia te a’u, o a’u e ulumatua, ao oe e la’ititi, e sa la ona e talia maia sa’u upu, afai ua uma ona a’oa’i oe e lou tina leaga i mea leaga uma, ona e fa’alogo lea i ai, o ioane, ou te faia mea uma e maua ai e ioane isi vaega o kamupani ma pisinisi a lo’u tama, pau lena, ua uma upu.”

 

Na ou liliu mai nei o le a tatala le faitoto’a ae ou iloa ai o lo’o matala le faitoto’a, e le i tapunia e Peteru ina ua alu atu i totonu, ma lo’u tilotilo mai i fafo o lo’o lau tutu atu uma le aufaigaluega i lea taimi o lona uiga ua fa’alogologo atu uma i a ma ta’uga upu ma Makerita.

 

Na ou toe liliu atu nei i totonu ma ou toe fa’apea atu, “Peteru, fa’alogo lelei mai lava oe, e sa sa lava lo’u tama ona e tali upu i ai, ua e fa’alogo mai ia te a’u, e sa lava, o ou malaia na, ‘aua e te fa’alogo i fautuaga leaga a lou tina, na o malaia lava mea e te maua, ou te toe iloa loa pe out e fa’alogo ua e toe faia le tulaga leaga lea, ona i ai lea o le mea e o’o ia te oe, ia e manatua lelei a’u upu ia ua fai atu ia te oe.”

 

Na ou iloa lelei atu le ita o Peteru ia te a’u, ae na ou toe fa’apea atu, “Makerita ma Peteru, o le fale ma le fanua o lo’o ma nonofo ai nei ma lo’u to’alua o Tino, e le au i ai sa oulua pule, e leai fo’i se lua feau i mea ia, o mea na fai e matua o lo’u tama mo a’u, ua i ai uma pepa e fa’amaonia ai mea uma, ma ua uma fo’i ona saini e matua o lo’u tama, a’o oulua, o le fale ma fanua ma pisinisi uma lava, e au i ai la’u aia i mea uma lava, a’o oulua ia sogi i le ava a le povi po’a, afai e te lua fia tofotofo i a’u upu ia, ona tatou feiloa’i lea i le fa’amasinoga.”

 

Ua ou liliu nei e lafo atu a’u upu ia Makerita ma lana tama o Peteru, ae ua galo ai ia te a’u si o’u tama i lea taimi. Na ou toe tilotilo atu nei i lo’u tama, ma ou iloa ai ua taoto ifo i luga o le nofoa lea e i totonu o lona potu. Na ou fa’anatinati atu nei i ai i lea taimi, “Papa, Papa, o le a le mea ua tupu, Papa, Papa, tautala mai fa’amolemole.”

 

E faia pea

 

 

Comment Here