Vaega: 100

Fa’atalofa atu i le alafa’i mai i le manuia o le mamalu o le atunu’u i lenei taeao manuia, taeao toto’a, taeao filemu i le alofa ma le agalelei o le Atua Soifua, ma e iai pea le fa’amoemoe o lo’o fa’apena ona maua e le atunu’u se taeao manuia i le alofa o le Atua.

ia manuia faiva ma tiute o le a feagai ai i lenei aso, ae alo maia, o le a toe fa’aauau atu la tatou tala fa’asolo mo lenei aso, Alofa, se ia tiga.

Ua le mafai ona taofiofi lo’u gutu i lea taimi, ae o lo’o mafaufau fo’i ua alu fa’asolo atoa, o tala fo’i ua ou lafo atu nei i le fafine sa fai ma o’u tina, ua le mafai ona toe taofiofi i lea taimi, a’o lea lava e tu lo’u tama ua le tautala.

Na uma nei ona ou fai atu i lo’u tama, ae ou toe liliu atu ia Makerita, o mea uma sa ou tauaveina mo tausaga e tele o lo’u olaga, o lea ua toe fafagu mai ia te a’u mea uma. Ua le taofiofia ai le alu atu o a’u tala, ona ua ou le mafai ona taofiofi le ita i lea taimi. “Makerita, va’ai oe, ua ou le iloa lava po’o le a sau agasala ia te oe, ua ou le iloa fo’i pe a i ai so’u sese ia te oe, a’o mea leaga uma ua e faia ia te a’u, Makerita, o lo’u va’ai lava i mata o lo’u tama, ua e fa’alogo mai, ua ou le lava onosa’i au mea leaga e fai mai so’o ia te a’u.”

Na ou iloa atu nei foliga o lo’u tina i lea taimi, ou te iloa ana fa’apea o lo’o ia u’uina se fana i lea taimi, ua leva ona pa. Ua ou le taofiofi i lea taimi a’o mea uma sa ou manatu i ai, o lea ua alu atu uma i fafo. O lou fa’aaloalo fo’i ma lo’u filemu sa i ai, ua mou ‘ese atu lava, ae ua o’o mai i lo’u loto le manatu ia fofola atu uma i ai, ona ia iloa ai lea o mea leaga o lo’o ia faia so’o ia te a’u, ae maise o si o’u tama. “Makerita, o lau tala e lafo so’o e lo o sau tama a’u , o lea o le a ou tautala atu, e le o oe fo’i o so’u tina, ma ua leai sou manatu ia te oe, ua leai fo’i sou toe fa’apea o oe o lo’u tina, aua tiga lava ona ou lagona le tiga o au upu e lafo, ae sa ou folo molemole lava ma lo’u onosa’i, o lea la ua ou tautala atu, Makerita, e le o oe fo’i o so’u tina, ae ua ou iloa lo’u tina, o lo’o i Amerika, e maumea ma maua oloa a lo’u tina, e maualuga fo’i lona aiga i totonu o Amerika, ma e sau se taimi ou te alu ai e va’ai lo’u tina, a’o oe, ua ou le toe fia ta’ua oe o so’u tina.”

E faia pea