Ads by Google Ads by Google

Fagogo: Alofa, se ia tiga

Vaega: 99

 

Fa’atalofa atu ma fa’afeiloa’i atu i le mamalu o le atunu’u i lenei taeao fo’u, taeao toto’a taeao manuia i le tausiga alofa a lotatou Matai i le lagi. E ao ai ona o tatou sunu’i lapalapa o malo ma fa’afo’i le vi’iga i le Atua Soifua, ona o Lana tausiga alofa mo i tatou e le mavae i aso uma.

 

Ae alo maia, o le a toe fa’aauau atu la tatou tala fa’asolo i le aso e pei ona masani ai. Ua alu nei la’u malaga e asi si o’u tama ua ou fia iloa fo’i o le a le tulaga o lo’o i ai lo’u tuagane o Peteru lea ua ou maua nei tala o lo’o fai ma fa’alavelave i si o’u tama i ana galuega. Na ou alu ma le malosi o lo’u loto, ona o lo’u naunau afai o le tulaga lea o lo’o fai e lo’u tuagane i lo’u tama, ona ou lagona ai lava lea o le fa’anoanoa, ma ua tonu fo’i i lo’u manatu o le a ou tautala i lo’u tuagane i le tulaga e tatau ona tu ai ia i le va ma lo ma tama.

 

Na fa’ate’ia tagata faigaluega ina ua ou ulufale i lea aso, ma sa ou va’aia ai le fiafia ma le fa’age’etia o tagata uma. Ua pei a’u na ou alu i se fia tausaga, ona ua matou feiloa’i fiafia nei ma nai a’u uo, ae maise ai o na toeaiina o lo’o galulue pea mo lo’u tama.

 

Na ou savali sa’o atu nei i le potu o lo’o i ai le ofisa o lo’u tama, ae na ou iloa lelei atu lava le tu mai i luga a lo’u tuagane leaga o Peteru ae e le i savali ane e fa’afeiloa’i a’u. Ou te le i alu fo’i iai, ona ua ou sau lava afai o ii ma te fetaui ai ma Peteru ua ou malie fo’i i ai. Ua ou talia ona uiga leaga, ua ou talia fo’i uiga leaga o lona tina o Makerita, ae afai loa ua le ava ma ua le fa’aaloalo i lo’u tama, o i la e masaesae ai loa ma le lalolagi.

 

Na ona ou liliu lava i le isi itu o’u savali sa’o loa i le mea o lo’o i ai le ofisa o lo’u tama ma tatala loa le faitoto’a. Na avea lo’u naunau i lo’u fia feiloa’i i si o’u tama ua galo ai ia te a’u, sa tatau ona ou tu’itu’i le faitoto’a e iloa ai e lo’u tama.

 

Na ona matala lava o le faitoto’a, ae ou fa’alogoina loa le leo o le fafine, ma na ou manatua vave i lea taimi lo’u tina le alofa o Makerita. Na ona ou tu lava i le faitoto’a, ae fa’apea loa ma upu a Makerita, “Mikaele, e i ai la’u aia i le fanua ma le fale lea ua e tu’uina ia Averia, va’ai i lou le sa’o ma lou le amiotonu, o mea uma na e alu uma lava i luga o le Kamupani ma pisinisi, e leai se feau a Averia i mea na.”

 

Na pei e tepa Makerita i se aitu, ina ua va’ai mai ia te a’u, ae ua savali mai nei si o’u tama ma fusi atu a’u. “Averia, ua e sau, e te le i tau maia ia te a’u e te sau, o a mai oe, o a mai oulua ma Tino, ma Ana ma si ona tama.?”

 

Ua leai sau tali na fai atu i lo’u tama, ae ua ou pupula to’a atu nei i le fafine leaga ma le fautua leaga, ma le loto leaga, ma le tau fa’aleaga o Makerita. O uiga leaga uma fa’atiapolo lea e maua ai, ae sa ou talia lava mea uma ona o lo’u alofa i si o’u tama, ma sa i ai lo’u manatu o le a avea lo’u alu ‘ese mai atonu e maua ai se filemu i totonu o lo’u aiga, a’o lea ua ou mautinoa nei, e leai se filemu o maua e si o’u tama, ae na o avega mamafa lea e fetaia’i ma ia.

 

“Makerita, o lea fa’atoa ou tautala atu lava ia te oe, va’ai oe, o mea leaga uma ma uiga leaga e maua uma ia te oe, ua ou iloa ou uiga Makerita, e te fa’amaualuga, e te fia tagata, e te tau fa’aleaga tagata, e te loto leaga, e te losilosi i mea a isi tagata, o uiga leaga uma na e maua ai oe,o lea fo’i la ua e taumafai e a’oa’i ai Peteru.”

 

Na ou iloa lelei atu lava le mu o mata o Makerita i lea taimi, ae sa fa’aauau pea la’u tautalaga, “Makerita, va’ai oe, sa e tausi ia te a’u, ma o lo’u loto fa’afetai i le Atua e le mavae, ae ua te’i lava ua e fulitua mai ia te a’u, ua te’i lava ua e agaleaga ia te a’u, a’o le a ea sa’u agasala ia te oe, se i e tautala mai, sa ou faia se mea leaga ia te oe, ou te ofo lava Makerita.”

 

Na a’apa mai nei lo’u tama i lo’u lima, ae ou tago ave’ese, “Papa, ua ou fiu, ua ou fiu e onosa’i, ua ou fiu e fai mea ina ia alofa mai ai ma fiafia mai Makerita ia te a’u, ae ua ou le iloa le isi mea e toe fai, o lea ua i’u lava ina ou alu ‘ese, a’o lea lava e fai lava, fai lava, e tu’u ea afea, e tu’u ea afea uiga fa’asatani ma uiga fa’atiapolo lea e fai so’o, ua ou le lava tatali, ua ou matua fo’i Papa, ua ou le lava tiga i faiga leaga ia o lo’o fai mai ia te a’u, a le o a’u, o oe, ou te ofo lava Papa, ae e le malie Makerita i mea ua ia maua, malosi le mana’o tele, malosi le fai o auala pi’opi’o e maua ai ana mea, ia e le i’u lelei lava, e o’o mai lava le oti e fiu e su’e na o le si’usi’u o le isumu na te maua.”

 

E faia pea