Fagogo: Alofa, se ia tiga

Vaega: 98

 

Fa’aalofa atu i le mamalu ole atunu’u i lenei taeao fou, malo le soifua, malo fo’i le fa’atautai i lenei aso, e i ai pea le fa’amoemoe o lo’o fa’apena ona manuia faiva ma tiute o lo’o feagai ai ma le atunu’u i lenei aso. Ma e ao ai ona o tatou momoli la’au i foga’a ma fa’afo’i le vi’iga i le Atua Soifua, ona o lona alofa ma lona agalelei, lea o lo’o tatou o’ao’a ai pea i faleseu ma o tatou sa’a ai i ma’a o malie i ana fa’amanuiaga mo i tatou i aso uma o lo tatou ola.

 

Ae alo maia, o le a toe fa’aauau atu la tatou tala fa’asolo i lenei aso, na muta mai ina ua ou alu ‘ese nei ma lo’u aiga sa ou ola ai. Ua amata nei lo ma a’iga, ma o se amataga fou mo i ma’ua uma, ae sa o ma tumau pea i lo ma manatu e tasi, ia fa’amuamua le Atua i mea uma ma te faia.

 

Ma e le mamao ‘ese ma ma’ua, ua amata ona fa’ato’a le fanua atoa, ona ua i ai lo ma manatu ia fai ni a ma fa’atoaga ma ni lafu manu e tasi ai ma’ua. Ua amata fo’i le ma ofisa Loia i lea lava taimi, ona o tulaga o lo’o mo’omia ai tele e tagata le fesoasoani mo fa’alavelave e tutupu mai i totonu o aiga, o fale faigaluega ma isi fuafuaga o lo’o i ai nei.

 

Ae ui lava i lea tulaga, ae sa maua pea taimi ma te galulue fa’atasi ai i le tau atina’eina o lo ma aiga. Ua taunu’u manuia mea uma, ae e i ai lava lo’u mana’oga lea na ou mana’o lava ina ia taunu’u. Ua uma ona iloa e lo’u to’alua o Tino mea uma o lo’u aiga, ae maise ai o lo’u mana’oga lava e tasi, o lo’u fia va’ai lea i si o’u tina o Elisapeta.

 

Ua ma’ea fo’i ona ma talanoaina ma Tino lea itu, ma ua ioe mai ia te a’u, e sai se aso ma te o ai i Amerika, e sa’ili ia si o’u tina. O mea uma fo’i sa tutupu i lo ma va ma lo’u tina o Makerita, ua amata lava ona taunu’u i se taunu’uga lelei mea uma, ai ona ua mamao le mea ua ou alu i ai, ae o lo’o o’u maua pea fa’amatalaga mai tagata faigaluega a lo’u tama, o lo’o fai lava le taua i le va o lo’u tama ma lo’u tina.

 

Na ou maua fo’i le isi fa’amatalaga e fa’apea, ua galue nei Peteru i totonu o le ofisa tutotonu lea e i ai lo’u tama ma le to’atele o tagata faigaluega. O nei fa’amatalaga uma o lo’o o’u maua pea mai i si a’u uo lea na uo sili i la’u fa’aipoipoga o Malia. E leai se mea e gole i la’u uo lea, ona ua ia maua fa’amatalaga e uiga ia Makerita ma Peteru, ma na ou talanoa fo’i i ai, ia alofa e va’ai ane si o’u tama, ona o lea o le a ou alu ‘ese, ma sa fa’apea lava ona fai.

 

ia ia fa’amatalaga uma, sa ou lagona lava le fa’anoanoa o lo’u loto, ona sa i ai lo’u manatu, o lo’u alu ‘ese mai, o le a maua ai e si o’u tama le filemu i mea uma. Ae peita’i, o lea ua ou iloa atu, e leai, ua avea lo’u alu ‘ese mai ma ala ua atili ai ona mamafa mea uma i le loto ma le mafaufau o si o’u tama.

 

Na fai nei la’u tala i lo’u to’alua o Tino, “Tino, o le a ou alu e asi lo’u tama i totonu o le ofisa, ou te le alu i le fale, ae ou te alu e asi si o’u tama po’o a mai, ua malie mai Tino ou te alu ma au tapena nei au mea mo la’u malaga, ona o lou fia iloa po’o ai mai si o’u tama, ae maise ai o fa’afitauli o lo’o fa’afeagai pea ma ia.

 

E faia pea

Comment Here