Vaega: 97

Malo le soifua, malo fo’i le onosa’i i faiva o lo’o feagai ai i lenei aso. E i ai pea le fa’amoemoe o lo’o fa’apena ona maua e le atunu’u le manuia ona o le alofa ma e agalelei o lo tatou Tapa’au i le lagi, e ala i Ana fa’amanuiaga mo i tatou i aso uma.

Ae alo maia, o le a toe fa’aauau atu la tatou tala fa’asolo e pei ona masani ai, Alofa, se ia tiga.

Ua ma’ea nei le ma fa’aipoipoga ma Tino ma ua amata loa le ma aiga, o le fale ma le fanua na tu’u mai e si o’u tama mo a’u o lea ua ma fa’amautu ai nei ma Tino e amata ai lo ma a’iga. O mea uma fo’i na tutupu i lo matou aiga, ua amata lava ona mou malie ‘ese atu, ma ua ou ilao ai fo’i e alu aso sau aso e sologa lelei ai mea uma.

Ae e ui lava i ia manatu na ia te a’u, ae e le moe lava le fili latou i le taumafai e fai lava se auala ina ia lepetia ai lo matou nonofo fealofani. O le fale ma le fanua na tuu mai e matua o lo’u tama mo a’u, ae sa tausia pe e si o’u tama, o se fanua ua sili ona matagofie, o le fale fo’i sa ou va’aia le manaia o mea uma, ma o se fale fo’i e faigata lava ona mate’ia e se tasi ona a va’ai atu le tagata e tasi lava le fale, ae a e alu i totonu ona e iloa ai lea e lua fogafale o le fale lenei.

O pepa fo’i sa ia tu’u mai mo a’u, ua uma ona saini e ona matua ma o a’u o lo’o alu ai nei le fanua atoa ma le fale. ina ua matou tanu’u i lea nofoaga sa ou iloa ai le tele o le fanua, ma sa ou tau mafaufau nei pe o le a le mea o le a fai i ai, ae manatua fo’i, o lo’o i ai lava lo’u mana’oga, ou te fia va’ai i si o’u tina i se taimi vave.

“Averia, ia e nofo i le fanua lenei, o mea na fa’amatu’u mai e o’u matua mo oe, e le mo Peteru po’o Ioane, e leai, o pepa fo’i ua e umia nei, o pepa ua uma ona sainia ma fa’amaonia mo oe lava, ma e le o iloa e Makerita ma tama le fanau lenei.”

“Averia, afai o le a e le nofo i le fanua lenei o lona uiga e sau aso e maua ai e Makerita ma tama, ae o le mea moni lava o le fanua lenei o le fanua o oe, o mea na tu’u mai e o’u matua mo oe. E faigata foi la ia te a’u ona fai se isi a’u fa’aiuga, aua o le mea moni lava, a aia mai Makerita ma tama, tu’u ia ioane aua ou te iloa e alofa si ou tuagane lena ia te oe, a’o Peteru, ia o lena ua e iloa Averia.”

Ua malolo fo’i so’u manatu, ae ua ou usita’i i lo’u tama, ma ua malamalama fo’i le mafaufau o Tino i lea tulaga ma ua fa’apea lava ona fai. O le isi itu sa ou manatu iai, ma ua uma fo’i ona ou talanoa i si o’u tama i lea tulaga, o le a o mai Ana si o’u tina tausi ma si ona tama matou te nonofo i le nofoaga lenei, ona e leai ni tagata.

O le tulaga fo’i o lo’o i ai la’u galuega i totonu o le ofisa tutotonu, ua uma fo’i ona na fetua’ai ai ma si o’u to’alua o Tino, ma ua o’o ai so ma manatu, o le a fa’atu lava sa ma’ua ofisa loia e lata ane i le mea o lo’o ma nonofo ai, ona e fai lava si mamao pe afai o le a ou galue pea mo lo’u tama. Sa talia gata e lo’u tama lo ma manatu lea, ona sa i ai lona mana’oga ia matou galulue fa’atasi pea, ae ina ua o ma fa’ailoa i ai le mafua’aga o lo ma mana’o, o le ala lea na ia talia ai ma ua fa’apea lava ona fai.

E ui lava i lo’u naunau atu i lou tina ae ua le mafai lava lona ita ma lona le malie ia te a’u, ua ou manatu nei o le a fai sa’u tusi e tu’u i se tasi o lo’o galue i totonu o lo matou fale, e tu’u atu i lo’u tina ona ou alu ‘ese ai lea ma le fiafia o lo’u loto.

E faia pea