Fagogo: Alofa, se ia tiga

Vaega: 96

 

Taeao manuia i le mamalu o le atunu’u, taeao toto’a, taeao filemu i le alofa ma le agalelei o le Atua Soifua. E i ai pea le fa’amoemoe o lo’o tausi tutusa pea i tatou e le Atua e ala i ana fa’amanuiaga mo i tatou i aso uma o lo tatou ola. Tatou ave ai lea o le vi’iga ma le fa’afetai i le Atua Soifua, ona o Lana tausiga alofa mo i tatou lea ua o tatou aulia mai ai lenei aso fou e fa’aopoopo i aso o lou soifua ma si o’u nei ola.

 

Ae alo maia, o le a toe fa’aauau atu latou tala fa’asolo, Alofa, se ia tiga mo lenei aso, ia atonu o lo’o fa’apena ona fa’ailoa lou alofa, mo si ou uso a tagata, ona fa’apena lea ona fa’amanuia mai le Atua ia toe, i mea uma lava e te faia. ia fa’amanuia le Ali’i i faiva ma tiute o le a feagai ai ma oe i lenei aso.

 

“Valenitino Jeffery Hayes pe e te alofa fa’amaoni ia Averia Rosa, i taimi o le mativa po’o le mauoloa, i taimi o ma’i ma maloloina, i taimi o faigata ma puapuaga o le olaga nei.” Na tali Tino, “Ioe, ou te alofa fa’amoani ia Averia Rosa.”

 

Na liliu mai nei le faifeau ma fa’apea mai ia te a’u, “Avery Rose Elizabeth, pe e te alofa fa’amaoni ia Valentino, i taimi o le mativa ma le mauoloa, i taimi o ma’i po’o le maloloina, i taimi e fetaia’i ai ma faigata ma puapuga o le olaga nei.” Na ou tali atu ma lo’u loto fiafia, “Ioe, ou te alofa lava ia Valentino e o’o mai le i’uga.”

 

Na toe liliu nei le faifeau ma fa’apea atu i le mamalu o le aofia sa auai, “O le taimi nei, e ia te a’u le agaga fiafia ou te fa’alauilao ai i luma o le Atua ma lenei aofia, ua avea nei oulua o le Tane ma le Ava.”

 

Ua ma’ea la ma fa’aipoipoga ma Tino, ma o lea fuafuaga sa fa’ataunu’u lava i lo matou fale lea o lo’o nonofo ai nei ma lo’u tina o Makerita, na auai uma nai o’u tuagane, e ui lava i uiga le manuia na fa’aali e Makerita ma Peteru i le aso o la’u fa’aipoipoga, ae sa ou maua lava le filemu i mea uma.

 

O mea uma fo’i sa tapena uma e si o’u tama, o lo’u tuagane o ioane na avea ma uo sili a Tino, a’o si a’u uo o lo’o ma faigaluega fa’atasi i le ofisa tutotonu a lo’u tama, sa avea ma a’u uo sili.Na matagofie mea uma, ona sa tapena e tagata faigaluega o lo’o galulue i totonu o le fale, ae sa ta’ita’i ai si o’u tina tausi o Ana. Ua fa’asalalau i luga o Nusi Pepa ma Televise le ma fa’aipoipoga, ma sa auia fo’i matua o Tino, lea o lo’o avea nei ma Amepasa a Amerika i totonu o Peretania.

 

Sa matagofie mea uma lava, e leai se mea na fa’aletonu o lo ma aso, ae sa i ai lava le mea o lo’o misi ia te a’u, ma na avea lea ma ala na ou tagi ai ona ua le mafai ona taofiofi o’u fa’alogona i lea taimi. Na iloa mai nei e si o’u to’alua lea tulaga, ma na a’apa mai nei ua fusi atu a’u, “Averia, onosa’i, e sau se taimi ona ta talanoa ai lea, ae alo maia, o le ta aso fiafia lenei, ave’ese uma lava nisi mea oi lou mafaufau ma lou loto, ae ia e alofa, va’ai mai ia te a’u fa’amolemole.”

 

Na ou a’apa atu nei ua milimili le alafau o si o’u to’alua i lea taimi, ua ou lagona le filemu o lo’u loto ma lo’u mafaufau. Na ou toe manatua nei, e moni lava, o le aoga lea ma le lelei o le fa’aipoipoga, o le alofa moni, o le fesoasoani o le tasi i le isi, o le tausi o le tasi o le isi, ma tu’u atu fautuaga lelei, ina ia aga’i ai i luma le aiga.

 

Ua sisiva fiafia tagata uma, o le to’atele o nisi o lo’o fa’alogologo pea i musika malie o lo’o taina e le fa’ili i lea taimi. O nisi o lo’o talatalanoa ma feoa’i solo ma matamata i le fa’atoaga matagofie o lo’o si’omia ai lo matou fale. O le to’atele o tagata nei, o le au faigaluega o lo’o galulue i totonu o le Ofisa tutotonu a lo’u tama, fa’atasi ai ma i latou na malaga mamao ane mai le isi itu o Peretania, ma o i latou fo’i ia o lo’o galulue i le falemata’aga ma isi Faletalimalo o lo’o va’aia e lo’u tama.

 

Na ou iloa atu nei si o’u tina tausi o Ana, ae ua pisi le lo’omatua i lea taimi, ae na ou toe iloa atu i le isi taimi, ia ua tau taofiofi le lo’omatua, ona ua fai nei mo ia le foloa o le mea o lo’o i ai le fa’ili. Na ou tilotilo atu nei i ai ma ou ‘ata, talofa i si o’u tina tausi, sa o ma fa’atasi pea ma o ma mafuta i taimi uma sa ou tiga ai, sa ia tu’u mai fautuaga lelei mo a’u i taimi na ou mo’omia ai se tina.

 

Na o’o nei o’u mafaufauga fa’apea, “Mom, ma’imau pe ana e i ai i lo’u aso, maimau pe ana e iloa le matagofie o lo’u aso, ua ou misia lava oe Mom.”

 

E faia pea

 

Comment Here