Vaega: 95

Fa’atalofa atu i le mamalu o le atunu’u, malo le soifua, malo fo’i le onosa’i i faiva ma tiute o lo’o feagai ai i lenei aso. Tatou fa’afetaia ai pea ma vi’ia le alofa ma le agalelei o lo tatou Atua, ona o ana fa’amanuiaga o lo’o o tatou maua ai pea le soifua manuia i totonu o aiga, nu’u ma Ekalesia.

Ae alo maia, o le a toe fa’aauau atu la tatou tala fa’asolo i lenei aso, na muta mai la tatou tala ina ua o matou talatalanoa nei ma lou tama ma si a’u uo o Tino, ma e le o se talanoaga fa’asamasamanoa e leai, o le talanoaga lenei, o lo’u olaga atoa lea ua matou talanoa ai nei, ma e le o se mataupu faigofie.

Na ou tepa a’e nei i si o’u tama e pele i lo’u loto i lea taimi, ae na ou va’ai ai i lea taimi le maligi ifo o ona loimata, ua avea lea ma ala ua faigata ai ona ou faia se isi fa’aiuga.

Ae na toe fa’apea mai, “Averia, o le aso lenei ma o totonu fo’i o le potu lenei, o le a fa’ailoa ai ia Tino mea uma lava o lo’o tutupu i totonu o lo tatou aiga, ina ia malamalama ai i le tulaga o lo’o i ai oe i le taimi lenei.”

Na ou fa’asalavei nei le fa’amatalaga a lo’u tama i lea taimi ona e i ai lo’u manatu e tatau lava ona fai sau upu, ae e le i o’o lo’u tama i le tulaga lea, ua lagona fo’i le matamuli ma le ma ona o lea o le a fa’alogo Tino i mea a o lo matou aiga.

Na ou tau manava nei i totonu ae ua sosolo a’e lava le mea fo’i lea o le tiapolo i lea taimi, ona ua ou lagona lo’u le malie i lo’u tama, ona ua fai e ia le fa’aiuga mo a’u ua ou matua fo’i ua luasefulu ono nei o’u tausaga, e tatau lava ona ou faia fa’ai’uga e lelei mo a’u, a le o le pulea mai e se isi tagata.

Na ou toe tautala atu nei i lo’u tama ma Tino, ae ua le mafai ona tatali le maligi ifo o o’u loimata i lea taimi. “Papa, e le lau lelei pea aso o le olaga lenei, out e le iloa pe tumau le alofa o Tino ia te a’u, e le o se mea faigofie le olaga lenei Papa, ma o au fuafuaga fo’i mo a’u, e le tu’u alaloa lou alofa Papa, ma ua ou iloa mea uma, a’o le ma va ma Tino, Papa, fa’amolemole tu’u mai se taimi, se i o’u mafaufau ai, po’o le a le mea e tatau ona fai.”

Ua le tautala lo’u tama i lea taimi, ae ua na o le punou, na ou tilotilo atu nei i si a’u uo o Tino, ae na ou iloa atu ai ua tagi ma punou i lalo. Ua ou toe mafaufau nei i nisi itu, ona a tonu ua fai e i la’ua le tonu lea ina ia ou alu ‘ese ai mai i lo’u aiga.

“Averia, e leai lava se tasi e toe fa’aluaina oe i lo’u loto ma lo’u mafaufau, o a fo’i mea uma o lo’o tutupu i totonu o lou aiga, o le a ou galue malosi e tu’u atu ia te oe le fa’amafanafanaga ma le filemu, o le a ou taumafai malosi e tausi ia te oe, po’o le ma’i po’o le malosi, i taimi o lou vaivai ma taimi ua e loto tele ai, i taimi o le mativa po’o le mauoloa, ua ou alofa fa’amaoni ia te oe Averia, ma e leai lava se isi ou te mana’o e tu i o’u tafatafa, ua na o oe lava i lo’u loto, ou te tausi fa’amaoni ia te oe pe a e ma’i, ou te fusi ia te oe pe a e tiga, ou te fa’amafanafana ia te oe pe a e ma’alili.”

E faia pea