Vaega: 84

Fa’atalofa atu i le alafa’i mai i le manuia o le mamalu o le atunu’u i lenei taeao fou, taeao toto’a i le alofa ma le agalelei o le Atua, e ao ai ona o tatou fa’afo’i pea le vi’iga ma le fa’afetai i le Atua Soifua, ona o Lana tausiga alofa mo i tatou lea o lo’o maua ai pea le ola ma le malosi, e fa’ataunu’u ai a tatou fuafuaga uma.

Ae alo maia, o le a toe fa’aauau atu la tatou tala fa’asolo e pei ona masani ai, Alofa, se ia tiga. ioe, e ‘ese le malosi o lenei upu, Alofa, e ‘ese fo’i le matagofie pe a e fa’aleoina ma fa’ataunu’u i aso uma, o lou alofa atu lea i lou uso a tagata ma fa’amafola atu ou lima e ala i lau fesoasoani, ona alofaina mai lea o oe e le Ali’i i auala uma.

Ua ma’ea nei le ma fetufa’aiga ma si o’u tama i lea aso, ma sa o ma lagona fa’atasi le tiga o lenei mea ua tupu mai, ae ia te a’u lava ia, sa ou lagona le malosi o lo’u loto ma lo’u mafaufau. O mea uma fo’i ma upu ua ou lafo atu i si o’u tama, sa ou lagona le mafatia o lo’u loto, ona e le mafai ona ou lafoina atu ia ituaiga upu i si o’u tama, ae peita’i, ua ou lagona le mafatia o lo’u loto ma lo’u mafaufau.

“Averia, si o’u afafine, e leai lava se isi mea e sili a’e ia te a’u, na i lo’o oe si o’u afafine, e pele lava oe i lo’u loto ma lo’u mafaufau, o le ala fo’i lea ou te taumfai atu ai, ina ia e maua le poto ma le atamai e fa’afoe ai mea uma. O a fo’i nisi tulaga o lo’o tutupu mai i totonu o lo tatou aiga, ou te talitonu lava i lou alofa mo a’u e malu ai mea uma.”

“Papa, ua lelei, o le a ou alu ‘ese, ona o lo’u usita’i ia te oe lo’u tama, ma ou te manatu fo’i, ia maua pea le filemu o lou loto ma lou mafaufau, leaga, o faiga a le tiapolo ma le fili e le mafai ona mavae, ma ua avea ai Makerita ma le isi tiapolo, ae ui i lea, o le a ou usita’i ia te oe lo’u tama. Ae tu’u mai se taimi se i ma talatalanoa ai ma Makerita, ona ou alu ‘ese ai lea.”

Ua tu nei i luga si o’u tama ma savali mai ua fusi atu a’u, ma ua fa’apena ona ma fetagisi ai lava. Na ou te’i ina ua tu’u mai e lo’u tama le teutusi ia e a’u, ma sa lilo i o’u manatu o le a fai e lo’u tama lea tulaga, ona ia te a’u lava ia, ua lava ma totoe tupe o lo’o alu i luga o lo’u igoa e amata ai lo’u olaga.

Na ona tu’u mai lava e lo’u tama o le teutusi lea, savali ‘ese loa e le i toe tilotilo mai ia te a’u, a’o lea taimi, ua pei o timuga e afu to ifo mai le lagi o’u loimata. Na avea lea ma ala ua tau le manino ai la’u va’ai, ma ua o’o mai ai fa’alogona vaivai ma le tiga ia te a’u.

Na ou savali atu nei ua ou nofo i luga o lo’u moega, ma ua fa’apena lava ona le taofiofia o’u loimata, e foliga mai, ua tu’u lafoa’ina ita, ua le toe alofagia e se tasi, ua ou mau to’atasi, ua leai lava ma se tasi e mafai ona fai mai se upu se i o’u mapu ai.

Na ou taumfai nei e tatala le teutusi lenei, ma e fai lava si mafiafia o le teutusi na tu’u mai e lo’u tama ia te a’u. Ua gatete lo’u tino atoa, o o’u lima fo’i sa taumafai e tatala ai le teutusi lenei, ua gatete atoa.

ina ua matala le teutusi, sa ou au mai ai i fafo ni pepa, e foliga mai ua fai si leva o pepa nei, ma ua ou faitau loa. Na ou lagona le popole, po’o a nei pepa ua tu’u mai e lo’u tama ia te a’u, po’o le mea o ni pepa e ta’u mai ai ia te a’u, ua le toe avea a’u ma sona afafine, po’o ni pepa fo’i e fa’ailoa mai ai ia te a’u, ua le toe maua e a’u se mea e tasi, o mafaufauga ia na tapu’e a’e nei i lo’u mafaufau.

Ae ina ua fa’asolosolo la’u faitau, na ou mautinoa ai, o pepa o le fale ma le fanua o lo’o i le isi itu o Peretania, ma o lea fale ma le fanua e 50 ‘eka le tele, o le fanua ma le fale o matua o lo’u tama. O le fale lenei, e o i ai matua o lo’u tama e malolo ai, pea maua o la taimi avanoa. O pepa uma nei, ua ma’ea ona saini e matua o lo’u tama, ma o lo’o alu i luga o lo’u igoa. Ua ou pupula to’a atu nei i pepa nei ma le le mautonu o lo’u loto ma lo’u mafaufau. Ae na ou toe fesili ifo lava, pe mata ua iloa e Makerita lenei mea, aua a iloa mulimuli ane fo’i, o lona uiga e pisa fo’i ma lo’u tama.

“Papa, fa’afetai lava, fa’afetai i mea uma ua e saunia mo a’u.”

E faia pea