Ads by Google Ads by Google

Fagogo: Alofa, se ia tiga

Vaega: 27

 

Ua ou tu nei ma ou fa’atau pupula atu i le toeaina lea na ma feiloa’i i le taimi na ma ulufale ai ma lo’u tama, lea na savavali mai i fafo ma isi tamaloloa.

 

“Averia Rosa Elisapeta (Avery Rose Elizabeth), na fa’amafola mai nei lima o le toeaina ia te a’u, ma ou savali atu loa i ai,  o le opo na opo ai a’u e le toeaina lenei, ou te le iloa sona igoa, ou te le iloa po’o ai, ua pei a’u o se tama a sona afafine, po’o se afafine a sona atali’i. Ua ou te’i i lea taimi, ae ua opo mau a’u e le toeaina lenei, ma le lilo i o’u manatu, o lo’o maligi ifo ona loimata ma fusi lava a’u.

 

Na alu ‘ese nei le faitoto’a tioata tele lava, ma ou iloa atu o lo’o tu mai ai si o’u tama, ma tilotilo mai ia te a’u lea e opo mau e le toeaina. Na ou iloa atu nei le ‘ata’ata a lo’u tama ma tilotilo mai ia te a’u, ma lulu mai lona ulu. Na ou a’apa atu nei ma fusi mai le toeaina, lea ua matua’i nimo lava ia te a’u po’o ai.

 

Ua fa’amamulu nei a’u e le toeaina ae ua mata’i lelei o’u foliga i lea taimi, “Averia, e leai se mea o lou tina e ave’esea ma oe, talofa e, talofa e, ia Elisapeta, e pei o so’u afafine lou tina, o le tagata e ‘ese le lalelei, ma e te so’o uma lava i lou tina Averia.”

 

Na ou tilotilo ifo nei i le toeaina i lea taimi, ae na ou manatua vave lava le pusa lea na ou sau ma a’u, lea e i totonu o le ta’avale na ma o ane ai ma lo’u tama. Na ou ‘ata ane nei i le toeaina, ae a’apa mai ua i’ini lo’u alafau ma u’u lava lo’u lima. Na ou iloa mai le fiafia o si o’u tama i lea taimi, ae galo ai ia te a’u, o le a i ai le mea o le a tupu i lea aso. Na iloa atu nei e le toeaina le tu mai a lo’u tama i lea taimi, ma fa’amamulu loa lo’u lima ma tilotilo atu i lo’u tama, “Mikaele, fa’afetai ia te oe, mo lou agalelei ia te a’u, fa’afetai fo’i ua e tausia ma atia’e le olaga o Averia, ma ou te talitonu, o le a avea Averia ma ta’ita’i iloga i se aso oi luma fa’afetai i lou alofa ia Elisapeta….na ta’u loa e le toeaina le igoa o lo’u tina moni lava, o’u va’ai atu ua tafe ifo ona loimata.

 

Na ou tilotilo atu nei i lo’u tama i lea taimi ma ou iloa atu ai, ua fa’apea fo’i le tulaga ua o’o i ai si o’u tama. Ua ou le mautonu, ae sa ta mau i lo’u loto, o nei mea uma o le a ou fesiligia ai lo’u tama pe a na o ma’ua. Na toe fa’apea mai upu a le toeaina lenei ia te a’u, “Averia Rosa Elisapeta, ‘ia e loto tele, ‘aua e te fefe, ia e tu malosi e pei o lou tama, ia fa’amuamua lava ia te oe au tagata faigaluega, ona liliu mai fo’i lea o tagata nei e sapai ma opogi oe i so’o se mea.”

 

Na ona uma lava o tala ia a le toeaina savali ‘ese loa. Na ou tu nei ma ou tilotilo atu i lo’u tama ae ua geno mai ia te a’u, ou te savali atu ma ua fa’apea lava ona fai. Ua ma ulufale nei ma lo’u tama i totonu o lona potu, ua na o lo’u tu nei ma ou tilotilo atu i le matagofie o mea uma. O le ogatotonu o le ofisa o lo’u tama o lo’o i ai se fa’atanoa, e foliga mai o se vaitafe ma o lo’o tafe mai le vai i luga o le papa ma pau tonu lava le suavai i luga o se fa’atanoa ua sili ona matagofie, ona tafe fa’ata’amilomilo lea i luga o le fa’atanoa lenei, ma toe fo’i i luga ma toe tafe mai i lalo. Na ou tilotilo atu nei i le isi itu, o lo’o laina mai ai ia fale, e foliga mai o ni fale, sa fau e se tagata, ae o ituaiga fo’i nei e laiti ma e mafai lava ona e matamata i ai.

 

Ua tu nei lo’u tama ma tilotilo mai ia te a’u i lea taimi, ae ua u’u lo’u gutu ma ou savali atu nei i le fa’atanoa lenei ma ou matamata ai, na ou iloa atu i le pito i lalo o le fa’atanoa o lo’o ola mai ai ni fuarosa ua sili ona matagofie. Na ou tu nei ma ou toe tilotilo atu i lo’u tama, ae ua ‘ata ma tilotilo mai ia te a’u.

 

Na ou savali atu nei aga’i i luma atu o le vai lenei, ma ou iloa atu ai loa le laulau a lo’u tama, e foliga mai o se laulau e leai se mea o tu mai ai, e foliga mai fo’i o se nofoa e leai se mea o tu mai ai. Pau le mea e iloa ai o le laulau ma le nofoa ona o lo’o i ai pepa i luga o le laulau, o le telefoni ma le tele o tusi o lo’o ta’atitia mai ai.

 

“Papa, o ai na faia nei mea uma.?” O la’u fesili lea i lo’u tama, ae sau lana tali, o mea uma na fausia e le fau fale mai le Malo o Amerika.

 

E faia pea