Fagogo: Alofa, se ia tiga

Vaega: 82

 

Fa’atalofa atu  i lou alafa’i mai i fanuga lelei i lenei taeao fou, malo le soifua, malo fo’i le onosa’i i faiva ma tiute o lo’o feagai ai i lenei aso. E i ai pea le fa’amoemoe, o lo’o fa’apena ona maua fa’atasi e i tatou le manuia, aemaise o le filemu o le Atua i aso uma, ma e ao ai ona o tatou momoli le fa’afetai ma fa’afo’i le vi’iga i le Atua Soifua.

 

Ae alo maia, o le a toe fa’aauau atu la tatou tala fa’asolo e pei ona masani ai, Alofa, se ia tiga. Na muta mai la tatou tala ina ua matou toe fo’i i lo matou aiga i le isi itu o Peretania. Ua amata fo’i la’u galuega e pei ona mana’o i ai lo’u tama. Ua ou galue nei i totonu o le ofisa o lo’o i ai uma lava Loia a lo’u tama, ma o se ofisa fo’i sa ou iloa ai, tiga lava ona to’atele tagata o lo’o galulue ai peita’i, e tasi lava le fa’atonuga e fai, ona usita’ia lea e tagata faigaluega uma.

 

O aso uma lava ou te alu ai i la’u galuega, e lagona lava le fiafia o lo’u loto, atoa ai ma lo’u loto tele, ona ua amata lava ona ou iloa mea uma, ona o le fesoasoani malosi mai a le toeaina lea o lo’o va’aia atoa le ofisa o Loia a lo’u tama.

 

Ua avea lenei faiga ma auala ua mama ai mea uma mo a’u, ma ua ou taumafai fo’i ina ia ‘aua lava nei i maua se avanoa matou te talatalanoa ai ma Makerita ma Peteru. Na ou lagona fo’i le fiafia, ona a tonu o le mafua’aga lea ua fa’atele ai le fale lea o lo’o matou nonofo ai, aua e seasea o’u va’aia lo’u tina ma lo’u tuagane. E ‘ese lava mea o lo’o la faia, ona ua ou va’ai atu nei, e foliga mai o la’ua ua pulea le fale atoa ma tagata faigaluega ae maise o fa’atoaga a le matou aiga.

 

E tatala atu le faitoto’a, o lo’u tama, ma na ou le iloa nei pe o le a le mea ua tupu, ona o lea ua fa’ate’ia a’u ina ua tu mai lo’u tama. Na ou iloa vave lava i lea taimi, ua i ai fo’i le mea ua tupu i totonu o lo matou aiga fua i le fa’apea o foliga o si o’u tama.

 

“Averia, e i ai le mea ou te fia talanoa atu ai ia te oe si o’u afafine.” Na ou tu nei ma ou pupula to’a atu i lo’u tama. “Papa, o le a fo’i le mea ua tupu, ailoga ea se i ai se aso e le fetaia’i ai le tatou aiga ma ni faigata, o le a le mea ua tupu.”

 

Na ou liliu nei ma ou savali i totonu o lo’u potu moe, ma au mai le isi o’u ofu e fa’alua ai ‘ofu o lo’o o’u ofuina, ona o lea ua tu fa’afuase’i mai si o’u tama, ae ou te le i tapena.

 

 Na savali mai nei lo’u tama i totonu o lo’u potu ma ua saofa’i ifo nei i luga o le sofa, ma e le i ea a’e i luga i le taimi atoa na ulufale atu ai. Na ou iloa mamao lava, ua i ai fo’i le mea ua tupu fua i le fa’apea o lo’u tama.

 

“Averia, lo’u afafine, ua e iloa lo’u alofa ia te oe, ma o mea uma lava e le mafai lava ona ou tu’u atu i se isi, ua na o oe lava lo’u fa’amoemoe i mea uma nei, ae ia e alofa mai, ia ‘aua ne i i ai se pisapisao ma se tulaga faigata e tula’i mai, ma o le ala fo’i lea o lo’u sau, e logo mai oe ma ta talatalanoa i le tulaga na tupu.”

 

Na ou pupula to’a atu nei i  lo’u tama ua ou le ‘emo, ma ua le mafai ai ona ‘alo ‘ese mata o lo’u tama ma a’u. “Averia si o’u afafine pele, ua ou le iloa lava le mea o le a fai, ona o faiga a Makerita, ua mana’o Makerita, e te alu ‘ese ma le fale, ma e alu e su’e se mea e te nofo ai.”

 

E faia pea

Comment Here