Fagogo: Alofa, se ia tiga

Vaega: 81

 

Fa’atalofa atu i lou alafa’i mai i le manuia i lenei taeao fou i le alofa ma le agalelei o le Atua Soifua, e i ai pea le fa’amoemoe o lo’o aoina pea le masina i le soifua manuia o le atunu’u, e aunoa ma ni fa’alavelave. E ao ai ona o tatou sunu’i lapalapa o malo ma fa’afo’i le vi’iga i le Atua, ona o Lona alofa ma Lana tausiga mo i tatou lea o loo tatou maua ai pea le ola mai i Lana Afio.

 

Ae alo maia, o le a toe fa’aauau atu la tatou tala fa’asolo e pei ona masani ai, ae ia manuia lava faiva ma tiute o le a feagai ai ma le mamalu o le atunu’u i lenei aso.

 

Ua ma’ea nei le ma tala ma si a’u uo o Tino, ma e ui lava ina sa amata i le tau matemate o le tasi o le isi, a’o lea ua taunu’u i se taunuga lelei ma le filemu. Ona ou manatua ai lea o le tasi upu, o a lava vesiga, ae tua lava i le filemu mea uma, pe afai o lo’o fa’atasi ai le Atua i fuafuaga uma. Aua ua ou talitonu, o le Atua o le ta’imua lea i mea lelei uma, ma o le taunu’uga fo’i lea o so’o se fa’amoemoe o se tagata, pe afai e fa’amuamua pea le Atua i ana fuafuaga uma.

 

Ua manino nei mea uma i lo ma va ma Tino, ae e tasi lava le mea o lo’o o’u taofiofia, ma ua ou manatu ai le upu fo’i lea, e togi le moa ae u’u le ‘afa. Ae e le afaina, ona i lo’u lava manatu e le o le taimi lea e fa’ailoa ai ia Tino le tulaga o lo’o i ai lo’u tina o Makerita ma lo’u tuagane o Peteru. E le gata i lea a’o le tulaga o lo’o i ai lo’u tina moni na ou iloa ai le lalolagi, ae maise o nisi mea o lo’o tutupu i totonu o lo’u aiga. Ua matou toe fo’i nei ma si o’u tama ma le tama o Ana, a’o mea uma lava i totonu o le fale sa o matou nonofo ai, ua fa’ameaalofa e lo’u tama mo le falema’i o tagata matutua ma tagata matitiva i totonu lava o le a’ai lea i Peretania.

 

O se tulaga fo’i lea sa ou lagona ai le fa’aaloalo ma le alofa i si o’u tama, ona o ana mea uma lava e fai, e fa’amuamua lava le alofa i mea uma. Ua matou taunu’u nei i lo matou fale ma ua amata ona toe fesoua’iga mea uma, ona o le tulaga o lo’o i ai lo’u tina o Makerita. O le aso na o matou taunu’u ai, e leai lava se taimi sa ou iloa ai ua matou mafuta fa’atasi ma Makerita ma Peteru, e foliga mai e solasola ma a’u, ma e le fia talanoa mai ia te a’u.

 

O si o’u tina tausi o Ana, ua toe fo’i nei i lona fale, lea ua nonofo fa’atasi ai ma si ona tama, lea ua fa’atoa ia iloa, o lona tama moni. A’o mea uma lava o lo’o tutupu i totonu o lo matou aiga, sa ou taumafai lava ina ia ave’ese ma lo’u mafaufau i lea taimi, ae ia ou sagai atu e fa’atino mea uma e pei ona mana’o i ai si o’u tama.

 

O le fale o lo’o nonofo ai nei Ana ma lona tama, o totonu lava o le fanua o o’u matua, ma o le nofoaga lea sa fa’asino i ai e matua o lo’u tama, a’o le i maliliu. O lea la ua u’u nei e Ana pepa ma mea uma, ma ua alu fo’i ia te ia le fanua ma le fale, ma e leai se tasi e toe o’o i ai sana aia i lea tulaga. O se tasi fo’i lea o mea sa ou va’aia ai le agaga alofa o lo’u tama, ma e ui lava ina fa’atu’i’ese Makerita i lea faiga, ae e leai sana feau, ona o le fanua o matua o lo’u tama lea o lo’o matou nonofo ai nei.

 

O le tele lava o aso, ma te mafuta pea ma lo’u tama, ma ua amata fo’i ona ou faigaluega i totonu o le ofisa tutotonu, lea o lo’o gafa ma le va’ava’aiga o isi kamupani ma pisinisi tetele a lo’u tama i totonu lava o Peretania. O le fautuaga na tu’u mai e si o’u tina tausi ia te a’u, “Averia, tu’u ai pea, ‘aua e te amanaia, ae fai lava au mea, ma ia e va’ai i le tulaga o lo’o i ai nei si ou tama, o le mea muamua lava lea e tatau ona e faia, ia fa’amuamua lou alofa i si ou tama ona manuia lava lea o mea uma e te faia.”

 

O le fa’ata’imuaga lea o a’u fuafuaga uma, o a lava mea leaga ma faufauga leaga o lo’o fai mai e lou tina o Makerita ma lo’u tuagane o Peteru ia te a’u, ae sa ou onosa’i pea ona o  lo’u va’ai alofa i si o’u tama.

 

E faia pea

 

 

Comment Here