Vaega: 65

Malo lava le soifua manuia i le mamalu o le atunu’u, malo fo’i le onosa’i i faiva ma tiute o lo’o feagai ai i lenei aso. E i ai pea le fa’amoemoe o lo’o fa’apena ona maua pea e si o tatou atunu’u le soifua manuia mai i le Atua, e ao ai ona o tatou momoli la’au i foga’a ma fa’afo’i le vi’iga i le Atua Soifua, ona o lona alofa ma lona agalelei i aso uma  o lo tatou ola.

Ae alo maia o le a toe fa’aauau atu la tatou tala, Alofa, se ia tiga, e pei ona masani ai. Ua toe nei o se aga ona taunu’u lea o lo’u fa’amoemoe, ma ua toe lua nei aso ona fa’ataunu’u lea. Ua ou mafaufau nei, e tatau lava ona ou vala’au pea e i lo’u tina o Makerita fa’apea ma lo’u tuagane pe ua toe suia o la mafaufau e tusa ai ma lo’u fa’au’uga.

Sa fai lava si faigata ia te a’u, ae ui lava i lea, sa ou le va’ai lava i ia itu, ae sa ou manatu o a lava mea uma o lo’o tutupu i totonu o lo matou aiga, ia ‘aua nei avea lea ma ala o le fe’ese’esea’i ai matou, ae maise ia ou iloa ona ava ma ou fa’aaloalo i lo’u tina.

E ui fo’i ina fa’apea e le o lo’u tina na ou iloa ai le lalolagi, ae peita’i, ia ou alofa pea ia te ia, ona o tausaga ma aso e tele o le ma mafutaga. Na ou nofo ifo nei i luga o le laulau o lo’o i totonu o lo’u potu ma ou a’apa atu i la’u telefoni ma ua vili loa.

E taunu’u atu la’u vala’au ae tali mai e le fafine o lo’o teuina lo matou fale i aso uma. Sa ou fesili loa i ai pe maua atu lo’u tina, na sau le tali a le tina lea, ioe, ae fa’atali se i alu e ave i ai le telefoni. Na avea nai sekone ia na ou mafaufau ai po’o le a sa’u tala o le a fai i lo’u tina o Makerita.

Na ou fa’alogo atu nei ua fa’apea mai le leo o le tagata, “O Makerita lenei, e  ai se mea e te mana’o ai, a’o ai fo’i lea.?”

Na ou tali atu, “Mom, o a’u, o Averia.” Na ou fa’alogo atu, ua le tautala mai lo’u tina o Makerita ia te a’u. Na ou toe fa’alogologo tasi pe i ai sana tala e fai mai ia te a’u, ae ua leai lava.

“Mom, o a’u, o Averia, na ou vala’au atu e asi atu oe, ua ou fiu e vilivili atu ae e te le alu ane i le telefoni, ae fa’afetai o lea ua maua atu oe le tina, ae na ou vala’au atu, Mom, ou te fia va’ai lava ia te oe i le aso o lo’u fa’au’uga, fa’amolemole, o a lava mea fa’aletonu ma o lo’o pogatia i lou loto ma lou mafaufau, ou te fia va’ai lava ia te oe, fa’apea Peteru i le aso o lo’u fa’au’uga.”

Na ou fa’alogologo atu nei, e foliga mai o lo’o i ai se tasi o lo’o talanoa i ai lo’u tina i lea taimi. A’o a’u, ua matua’i mau lava le u’uina o le telefoni, e foliga mai ua ou le mana’o e toe fa’amamulu ‘ese atu ma a’u, se’i iloga e fai mai se tala a lo’u tina, e malie ai lo’u loto.

Na ou fa’alogo atu nei o fa’apea ane i ai le tala a le tagata lea, fai i ai ta te le o atu i lona fa’au’uga, ou te le fia alu fo’i. Na ou iloa lelei lava o lo’u tuagane o Peteru lea o lo’o talanoa i ai lo’u tina o Makerita.

Ua le mafai ona tatali le maligi ifo o o’u loimata i lea taimi, ua pei o ni puaoa mamafa mai le lagi la’u va’ai, ma o la’u fa’alogo fo’i, e foliga mai e mamao mamao lava se mea o lo’o o’u vala’au i ai.

Na ou fa’atalitali pea mo se tali mai a lo’u tina i lea taimi, ma ia te a’u lava ia, ua ou iloa lelei lava le tali o le a tu’u mai ia te a’u. Na ou fa’alogologo atu nei ua fa’apea mai lo’u tina. “Averia, e le mafai ona ou au ai i lou fa’au’uga, e pisi tele a’u i mea e fai, e fai o pisinisi, a’o tagata faigaluega, e le mafai ona ou alu atu, ae ou te iloa e alu atu lou tama i lou fa’au’uga.”

Na ou taumafai malosi lava ina ia ‘aua ne i lagona mai e lo’u tina la’u tagi i lea taimi, peita’i, ua leai lava se mea out e mafaia, ua pei o timuga ua afu to ifo mai le lagi  o’u loimata i lea taimi, ae sa ou toe taumafai atu lava. “Mom, o le a ea sa’u agasala ia te oe, ua e fa’apea mai ai ia ta ita, pe sa ou faia ea se mea leaga ia te oe, ua e le amanaia mai ai ta ita, e le atoa lo’u fiafia i lo’u aso, pe afai e te le i ai, Mom, ou te mana’o lava ia e sau i lo’u fa’au’uga, fa’amolemole, ou te alofa lava ia te oe lo’u tina.”

E le i uma atu a’u tala, ae tapuni mai e lo’u tina le telefoni. Ua ou tu a’e nei i luga ma ou savali atu i lo’u moega i lea taimi, ua ou tau le iloa se mea, i le maligi ifo o o’u loimata i lea taimi. Na ou taoto ifo nei ma ou a’apa atu i le aluga, ma opo mai, se i tau pupuni ai la’u tagi ua le mafai ona taofiofi.

Ua pogisa la’u va’ai, ua naumati fo’i manatu ma mafaufauga, ae ua na o  fa’alogona tiga ua o’o mai nei ia te a’u, ma ua avea lea ma ala ua le matu ai o’u loimata. Na ou manatua vave i lea taimi lo’u tama, ma ua fa’asolosolo ai nei o’u mafaufauga i le tulaga o lo’o i ai nei ia, ona o lea ua ou alu ‘ese mai mo a’u a’oa’oga.

Ua ou toe mafaufau i lo’u tina moni na ou iloa ai le lalolagi, ma na ou fa’apea ifo i lo’u loto, “Mom, o fea ea oe, tago maia e fusi atu ta ita ua lagona le vaivai o lo’u loto, ua ou le lava tiga. Mom, Mom…..

E faia pea