Vaega: 26

Na ou toe liliu atu nei ma ou talotalo atu i nai tagata o lo’o tutu pea ma tilotilo mai i le ma talanoaga ma le tamaloa lea o lo’o va’aia i latou, ma na si’i mai i luga o latou lima ma fa’atofa mai ia te a’u. ina ua ou o’o i fafo mai le faitoto’a, ua ‘ese lava o’u fa’alogona, na ou fa’apea ifo i lo’u loto, e ‘ese le manaia o fa’alogona e alofagia e tagata, e ‘ese fo’i le manaia o le fa’alogona e aloa’ia e tagata, e ese fo’i le matagofie o fa’alogona e o’o mai, pe afai ta te fai leleia tagata.

Na ma fetaui nei ma le isi tama’ita’i na tuli mai e lo’u tama e su’e a’u, ona ua tatau nei ona ou ulu i totonu o le ofisa o lo’u tama, e pei ona ia mo’omai a’u i lea aso. Na ma toe o nei ma le tama’ita’i lenei, ma sa fai lava si umi o alu le ma solo e aga’i atu i le potu o lo’o i le foga fale lima, lea o lo’o i ai le ofisa o lo’u tama. Na aunagi mai nei le tama’ita’i ma o i le auala fo’i lea e ta’avalevale ma e vave lava ona ma taunu’u ai, ae sa ou le mana’o i ai, sa ou manatu, se i o’u matamata atu i le tele o isi ofisa o lo’o i totonu o le fale tele lenei.
Na ou iloa lelei atu lava le augata o le tama’ita’i lenei, ae sa ou finau pea ma te savavali, na liliu mai nei ma fa’apea mai ai te a’u, e mamao lava pe a ma savavali, ona o lo’o fa’atali mai lo’u tama ia te a’u. Na ou tilotilo atu nei i ai ma ou ‘ata, o le ala lea na toe ‘ata’ata ai ma tilotilo mai ia te a’u, na ou fa’apea ifo nei, a ou va’aia le ofisa lenei, o oe lava e muamua fafo ma le ma’afala.

Na ou fesilisili nei i ai pe ua fa’aipoipo, ae sau lana tali ioe ua uma ona fa’aipoipo, ma e to’alua lana fanau. Na vave lava ona toe oso a’e manatu alofa i lea taimi, ona ua ou toe manatu nei, a tonu o lona naunau mai ina ia vave ona ma taunu’u i luga o le fogafale lima lea e i ai lo’u tama, ona o lona usita’i i lo’u tama ia vave ona ou o’o atu. Ua ou toe mafaufau loloto i le itu lea, na ou toe fesili nei, pe ua fia tausaga talu ona faigaluega i le kamupani a lo’u tama, na sau le tali a le tama’ita’i, ua sefulufa tausaga talu ona galue i totonu o le kamupani.

O lona uiga, e fa o’u tausaga, ae amata loa ona faigaluega lenei tama’ita’i i totonu o le kamupani e fai lava o’u mafaufauga nei ma topetope lava la’u savali, ona ua ou alofa nei i si nei tama’ita’i, ina ne i i ai se isi tulaga e o’o i ai, ona o a’u.

So’o se ofisa ma te pasi ai, o mata latou o tagata faigaluega ua na o le tilotilo mai ia te a’u. Na ou iloa fo’i tama o le ofisa, ua pei a’u o se purinisese i lea taimi, na o lo’u geno atu lava i ai ma ma savavali lava.

Ua ma taunu’u nei i le itu o lo’o i ai le potu ma le ofisa a lo’u tama, o se va’aiga matagofie na ou va’ai nei i ai, tailo fo’i i potu o lo’o fai ai le Ofisa o le Peresitene o Amerika pe tutusa ma le potu o lo’o i ai le ofisa o lo’u tama. Ua u’u lo’u gutu i lea taimi, ma ou tu ua ou le savali, ae ua fa’asolosolo nei la’u va’ai, e lasi mea uma ma o se va’aiga fo’i ua ou mautinoa, sa le i maua ma se filemu, o se va’aiga fo’i sa ou mautinoa, sa afu liligi ma afu toto ai si o’u tama ina ia mautu.

Na ona matala mai lava o le faitoto’a o lo’o i le isi itu, vala’au mai loa ma lo’u igoa, “Averia Rosa Elisapeta”

E faia pea