Ads by Google Ads by Google

Fagogo: Alofa, se ia tiga

Vaega: 63

 

Fa’atalofa atu ma fa’afeiloa’i atu i le mamalu le atunu’u i lenei taeao fou, taeao toto’a i le alofa ma le agalelei o le Atua, e ia i pea le fa’amoemoe, o lo’o aoina le masina i le soifua laulelei o le atunu’u, ae maise o le mamalu o le au faitau, o lo’o fiafia pea e faitau i latou tala fa’asolo, Alofa, se ia tiga.

 

Ae alo maia, o le a toe fa’aauau atu la tatou tala e pei ona masani ai, ae ia manuia faiva ma tiute o lo’o feagai ai ma le mamalu o le atunu’u i lenei aso.

 

Na ou taumafai nei e fai se mea ina ia mafai ai ona fa’ato’ato’a la matou mataupu ma si o’u tina tausi fa’apea si o’u tuagane o Ioane. Ma na ou mafaufau nei, e sili ai pe a matou o i se fale’aiga, atonu e sui ai fo’i fa’alogona ma mafaufauga i lea taimi.

 

“Ana ma Ioane, sauni tatou o tatou a’ai i le fale’aiga lea e i totonu o le a’ai, lea e manaia lava fa’afiafiaga o lo’o fai ai, ona tatou toe o mai ai lea.”

 

Ua tilotilo mai nei Ana ia te a’u, ua te’i, aua e le masani ai ona matou o fa’apea e a’ai i se fale’aiga. Ae na ou geno atu i ai ma ou tilotilo i si o’u tuagane lea o lo’o tagi lava ma punou i lalo e aunoa ma se tala sa toe fai mai ia ma’ua.

 

Ua iloa mai e lo’u tina tausi, ma o lea na fa’apea mai ai loa ia te a’u, e manaia tele lo’u manatu, ma na liliu atu nei ia Ioane ma fa’apea atu i ai, “Ioane, tu loa i luga e sauni tatou o e a’ai i le falea’iga e pei ona fai mai ai si ou tuafafine, e manaia fo’i lena ta te matamata ai i le matagofie o mea uma i totonu o le a’ai.”

 

E fai atu lava a ma tala ma Ana, ae pei lava e fai i le tua o le pato, ua na o le nofo lava o ioane ma tagi. Ae pe a ma le lima minute, ae o ma va’aia loa ua tu a’e i luga ma savali mai ia te a’u, “Averia si o’u tuafafine, fa’amolemole fa’amagalo mai a’u, i ni a’u tala ua lafo, ae va’ai oe, e ui lava ina tiga ia te a’u le mea ua fai e lo ta tina ae maise o lo’u uso o Peteru, ae ou te talitonu o le a e onosa’i ma fa’apalepale, tu’u ia la’ua, atonu lava e sau se taimi tatou toe feiloa’i ma toe fa’alelei mea uma.”

 

Na ou a’apa atu nei ua fusi mai si o’u tuagane la’ititi ma ma fetagisi ai lava, ae ua na o le tu nei o si o’u tina tausi ma tilotilo mai ia ma’ua i lea taimi. Ua ou geno atu i ai ona savali loa lea i totonu o lona potu e sauni, o le a matou o e ti’eti’e ma matou a’ai i le falea’iga ua sili ona matagofie, ma ua sili fo’i ona taugata i totonu o Peretania.

 

“Ioane, ua uma ona ou fai atu ia te oe, ‘ia gata ai i le aso, ona e toe tautala ma toe lafo ni upu e uiga i lo ta tina, ua e fa’alogo mai ia te a’u, po’o a lava mea uma o lo’o tutupu i totonu o lo atou aiga, ia ‘aua, ‘aua lava ne i suia ai lou mafaufau ma lou loto e uiga i lo ta tina.”

 

Ua tali mai nei si o’u tuagane ia te a’u ua lelei, ma ua matou sauni nei o le a alu la matou ti’eti’ega i le a’ai ma matou a’ai fiafia i lea afiafi. Ua uma ona matou sauni, ma ua matou savavali atu nei i la’u ta’avale. O le ta’avale na fa’atau e si o’u tama, lea fo’i na mafua ai ona pisa ma Makerita, atonu ua fua lona loto ina ua fa’atau e lo’u tama la’u ta’avale, a’o lea lava e fau ma soloi le tele o isi ta’avale o lo’o tutu i luma o lo matou fale.

 

Ua ou ulufale nei i totonu o lo’u potu ma ua ou saofa’i ifo ni i luga o lo’u moega. Ua fa’asolosolo o’u mafaufauga i si o’u tina moni na ou iloa ai le lalolagi. i lo’u loto i lea taimi, ua ou fia va’ai lava i ai, ua ou fia maua le mafanafana o lona alofa mo a’u, ma ua ou fia mafuta lava i lo’u tina. Na avea ia mafaufauga ma ala na maligi ifo ai o’u loimata, “Mama, po’o e lagona mai ea a’u, tiga le tele o mea matagofie o lenei olaga, ae maise ai o la’u a’oga ua toe nei o se ‘aga ma’ea, ae ua ou misia lava oe, lo’u tina, o la’u tatalo i le Atua, ia o ta fa’atasi, a’o lo’o maua pea lou ola, se i o’u ta’u atu ma fa’amatalatala atu ia te oe mea uma o lo’o tutupu i lo’u olaga, ua ou misia lava oe Mom.”

 

E faia pea