Ads by Google Ads by Google

Fagogo: Alofa, se ia tiga

Vaega: 61

 

Fa’atalofa atu i lou alafa’i mai i fanuga lelei i lenei taeao fou i le alofa ma le agalelei o le Atua Soifua. E ao ai pea ona o tatou fa’afo’i le vi’iga i le Atua, ona o Lana tausiga alofa mo i tatou i aso uma o lo tatou ola. Ae alo maia, o le a toe fa’aauau atu la tatou tala fa’asolo e pei ona masani ai.

 

Ua ma tau fai tutu mai nei i luga ma lo’u tina tausi, ina ua ma fa’alogo atu o le leo o si o’u tuagane o Ioane lea ua vala’au mai nei ia te a’u. Na u’u nei e Ana lo’u lima, “Averia, ia e loto tele, ma ia e fa’ailoa ia Ioane le mea lea e tupu.”

 

Na lue atu nei i ai lo’u ulu i lo’u tina ma ou fa’apea atu ua lelei o le a ou talanoa ia Ioane e tusa ai ma le mataupu lea ua le o’o mai ai lo ma tina ma Peteru i lo’u fa’au’uga. Na toe a’apa mai nei si o’u tina tausi o Ana ma toe fusi atu a’u, “Averia, ia e fa’amatala i si ou tuagane mea uma, va’ai oe, e auau mai lava lona loto ia te oe ma ua ou iloa fo’i, o a lava mea uma nei o lo’o tutupu i totonu o le aiga, o Ioane lava e tu malosi mai ia te oe, a’o Peteru, ua ou iloa ua uma ona fafaga upu e lou tina o Makerita, a’o si ou tuagane lea, e sau lava lona loto ia te oe, ia e onosa’i ma ia e loto tele ma fa’amatala uma ia ioane le me lea e tupu, ina ia malamalama ai fo’i ia i le tulaga lea ua o’o i ai.”

 

Na ou tali atu i si o’u tina tausi ua lelei, ma o ma o atu loa e tatala le faitoto’a, na ou iloa lelei lava le meia o si o’u tuagane ai ua na iloa mai le mumu o o’u mata, a’o lea fo’i e tau solo mata o Ana.

 

Ua tu nei si o’u tuagane ma mata’i mai ma’ua, “Averia, e i ai se mea ua tupu?, ia e tauala mai nei ia te a’u. Ua ou fiu fo’i e vala’au lo ta tina ma Peteru ae leai se isi e tali mai i le telefoni, ua ou iloa fo’i, ai ua feita’i ia te a’u i lo’u sau e asi mai oe.”

 

Ua o matou savavali atu nei ma Ioane ma Ana i le potu malolo o lo matou fale. Na a’apa mai nei si o’u tuagane ma u’u atu lo’u lima ma ta’ita’i a’u i totonu o le potu malolo ma ua matou saofafa’i ifo nei i luga o nofoa.

 

“Averia, fa’amolemole tautala sa’o mai ia te a’u, ou te fia iloa le tulaga o lo’o i ai lo tatou aiga, ae va’ai oe le tuafafine, po’o a lava faiga nei e fai mai e lo ta tina ma Peteru, e le mafai lava e se isi ona ave’esea lo’u alofa fa’aletuagane ia te oe si o’u tuafafine. O a fo’i fa’amatalaga na ou fa’alogo o tautala ai lo’u tina e uiga ia te oe, e le mafai lava ona ta’u ‘esea oe ia te a’u, o oe o lo’u tuafafine, ma ia e manatua pea la’u upu lena i aso uma o lou ola, e le mafai lava e se tasi ona ave’esea lo’u alofa mai ia te oe lo’u tuafafine e to’atasi.”

 

Na ou fa’alogo nei ma le manino i le talanoa mai a si o’u tuagane ia te a’u, ma ua avea lava lea ma ala ua malosi ai lo’u loto, a’o si o’u tina fai o Ana, na o ma fa’alogoina ma ioane le tagi aue, ue i lea taimi. Ua ou mautinoa nei, e tu lava si o’u tuagane la’ititi ia te a’u, ma atonu fo’i o se auala lea o le a faigofie ai la’u savaliga aga’i i luma, o lo’u olaga. Ua sau fo’i le vaivai o le loto ma le mafaufau i lea taimi, ma e ui lava ina ou fa’apea ua ou tapena mo lenei tulaga, ae e i ai lava mea o lo’o tutupu mai i tua, lea o le a avea ma ala e fa’avaivai ai lo’u loto. A’o lea lava taimi, sa ou lagona ai lo’u loto tele, sa ou lagona ai le filemu, sa ou lagona ai le malosi o lo’u loto.

 

Na ou ea a’e nei i luga ma ou tilotilo atu i si o’u tuagane i lea taimi, ma ua ou toe mafaufau i le mamao o le ala na sau ai, ona o lona fia mafuta ia te a’u, ua ou toe mafaufau fo’u i le tele o fa’afitauli o lo’o tula’i mai i totonu o lo matou aiga, ae na ‘auga lava e tasi lo’u manatu, e sau se taimi a’o se aso e suiga malie ai mea uma.

 

“Ioane, fa’afetai ua e talanoa mai, fa’afetai ia te oe le tuagane i upu ua e tautala mai ai, ua fai lea ma vai fofo i lo’u loto ma lo’u mafaufau i lenei taimi, ae o le a ou tautala atu loa e tusa ai ma le vala’au mai a si o ta tama.”

 

“Oi, na vala’au mai Dad.?” O le fesili lea a Ioane, na ou tali atu ioe na ma talanoa ma lo ma tama. Ua punou lo’u tuagane i lea taimi, ae ua fa’aauau pea la’u tautalaga.

 

“Ioane, o le tala mai a lo ta tama, e le o mai ia le ta tina ma Peteru i lo’u fa’au’uga, ma o le mea lena sa ou tagi tagi ai, ma lo’u loto fa’anoanoa, ona sa i ai lava lo’u manatu, o a lava mea uma o lo’o tutupu o a fo’i mea uma o lo’o pisi ai i pisinisi ma le tele o galuega, ae sa ou nofo lava ma le fiafia o lo’u loto, ona o le a auai  uma o ta matua fa’apea ma le tuagane ia Peteru, a’o lea ua valaa’u mai lo ta tama, e le o mai i lo’u fa’au’uga.”

 

Na tu fa’afuase’i a’e nei i luga Ioane ma savali atu ua tu’i le pa puipui o lo matou fale ma fa’ataitaio, “Le ta tina e ‘ese le leaga, fautua leaga, faufau mea leaga, ma e leai lava se filemu o lo tatou aiga Averia. O lea ua ou va’ai atu i le ata o mea uma lava, e leai se filemu o lo tatou aiga e maua.”

 

E faia pea