Ads by Google Ads by Google

Fagogo: Alofa, se ia tiga

Vaega: 60

 

Malo le soifua i le mamalu o la atunu’u, aemaise fo’i o i latou o lo’o fiafia e faitau i la tatou tala fa’asolo, Alofa, se ia tiga e pei ona masani ai, ae alo maia, o le a toe fa’aauau atu la tatou tala e pei ona masani ai. ia manuia faiva ma tiute o le a feagai ai ma le mamalu o le atunu’u i lenei aso.

 

Ua ma’ea le ma talatalanoaga ma lo’u tama, ma ua mautinoa ai, e le o’o mai lo’u tina o Makerita ma lo’u tuagane o Peteru mo lo’u fa’au’uga. Na lagona mai e si o’u tama la’u tagi, ua pei o timuga ua afu to ifo mai le lagi o’u loimata i lea taimi. Ona o lea ua ou mautinoa nei, e moni lava o’u masalosaloga e pei ona i ai.

 

Na fiu si o’u tama e tau fa’ato’ato’a mai a’u i luga o le telefoni, ae ua leai lava, aua ua pei o se ao pouliuli la’u va’ai i lea taimi, o o’u fa’alogona fo’i ua pei o se ie talatala ua punitia ai la’u va’ai ma ua le utufia ai o’u loimata.

 

Na i’u lava ina tapuni le telefoni, e aunoa ma se isi a’u tala na mafai ona toe fai atu i si o’u tama. Ua ou nofo ifo nei i luga o lo’u moega ma fa’asolosolo o’u mafaufauga. Ana fa’apea o lo’u tina moni lenei, ailoga e mafai ona ia faia lenei mea ia te a’u, ana fa’apea fo’i o si o’u tina moni lenei, po’o le a lava le mamao o le ala e sau lava. E le mafai ona nofonofo lo’u tina moni pe a o’o i lo’u aso fa’apitoa lenei.

 

Na ou fa’apea ifo nei, e moni lava, e ‘ese’ese alofa, o le alofa fo’i o le tagata e alu alu lava gata, o le alofa fo’i e faigata ona mate’ia i le tele o taimi.

 

Ua le mafai ona tatali le vaivai o lo’u loto i lea taimi, ae sa ou musu lava e fa’ailoa i lo’u tina fai o Ana le mea ua tupu. Ua ou toe mafaufau nei i si o’u tuagane o Ioane lea o lo’o matou mafuta pea, po’o le a nei sona manatu pe afai o le a ou ta’uina i ai le tulaga lea ua le o’o mai ai lo ma tina ma Peteru i lo’u fa’au’uga.

 

Na fa’ate’ia o’u mafaufauga nei ina ua ou fa’alogo atu ua tu’itu’i mai le faitoto’a o lo’u potu ma na ou tu a’e nei i luga ma ou savali atu e tatala. Na ona matala lava o le faitoto’a, ma ou iloa atu ai o si o’u tina sa tausia lava a’u mai i lo’u la’ititi. “Averia, e i ai se mea ua tupu?” Na pupula to’a mai nei ia te a’u, ma ua le mafai ona taofiofi o’u loimata i lea taimi. “Mama, aisea ea e fai ai ta ita fa’apea e lo’u tina o Makerita, pe i ai ea sa’u agasala ia te ia, ua fai ai ta ita fa’apea.”

 

Na ou a’apa au ma fusi mai si o’u tina tausi i lea taimi ma ou tagi lotulotu i lona tauau. Ou te talitonu, e le o malamalama lo’u tina i le mafua’aga ua ou fa’apea ai. Na ou lagona le mafanafana ma le filemu o lo’u loto i lea taimi.

 

“Averia, nofo mai i lalo, ou te le o iloa pe o le a le mea ua tupu, ae tautala mai nei ia te a’u ona ou iloa ai lea.” Na o ma saofafa’i ifo nei i luga o lo’u moega, ma ou fa’amatalatala loa ia Ana le mafua’ga o lo’u tagi lotulotu.

 

“Ana, fa’atoa uma nei lava ona ma talanoa ma lo’u tama, ua ta’u mai e lou tama, e le o’o mai lo’u tina o Makerita ma lo’u tuagane o Peteru i lo’u fa’au’uga, o le ala lea ua ou tagi ai ona sa i ai lava lo’u agaga fiafia o le a aumai o’u matua ma lo’u tuagane i lo’u fa’au’uga.” E fai atu lava a’u tala i a Ana ae ua le matua o’u loimata i lea tiami. Ua a’apa mai nei si o’u tina tausi ma fusi atu a’u.

 

“Ana, o le a ea le mafua’aga ua fai ai ta ita fa’apea, pei ta’ita o se tagata ‘ese, ae o le a ea le mafua’aga ua fa’apea mai ai lo’u tina o Makerita ia te a’u, e pei sa sili ona ou le fanau mai i lenei lalolagi, ua ta le lava tiga…..Ana, fa’amolemole fai mai sau tala se i o’u mapu ai, fai mai sau tala se o’u maua ai le fiafia, fai mai sau tala ia ta ita, se i ave’ese ai lenei mafatiaga ua ou o’o i ai.”

 

Na ou va’aia i lea taimi le maligi ifo o loimata o si o’u tina tausi ma ua ma fusifusi nei ma ma fetagisi. “Averia, si a’u tama, fa’alogo mai oe, e ui lava ina e te le i ifo mai i lo’u manava, ae ua silafia e le Atua, o lo’u loto atoa o oe, e leai sa’u tama, ae ua avea lava oe ma fa’amama avega ia te a’u, afai e te tiga, ou te tiga foi, afai e te mafatia, ou te mafatia fo’i, ua le toe ta’u ‘esea lava oe ia te a’u…..ae ia e loto tele, ma ia e onosa’i, vaai oe, a lea ua tali mai le Atua i a’u tatalo i aso uma, a lea ua fa’ailoa mai e le Atua le mea ua silisili ona lelei mo oe, o lea ua ma’ea au a’oa’oga sa e finau ai i aso uma, o le fiafiaga sili lea mo a’u, ma ou te talitonu fo’i, ua fa’apena le fiafia o si ou tama….’aua la’ia ne i e toe fa’anoanoa, o a lava isi mea uma fa’ata’atia ‘ese ma lou mafaufau, ae alo i ou faiva, ua e manumalo, ia e loto tele Averia, ‘aua ne i e toe fefe pe e te toe popole i se mea, ua saunia e le Atua mea uma mo oe si a’u tama.”

 

Na avea upu fa’amafanafana a si o’u tina tausi, ma ala ua tau to’a mai ai lo’u loto ma lo’u mafaufau, ma ua ma talatalanoa fa’asamasamanoa nei i le mea e ao ona fai mo o’u fa’au’uga, aemaise o le taunu’u mai o si o’u tama lea ua ou alo atu e fa’atali. E le i umi ae toe tu’itu’i mai le faitoto’a o lo’u potu, ma na ma fa’alogo atu ma lo’u tina tausi o fa’apea mai le leo o le tagata, “Averia, Averia, o e i totonu o le potu.?”

 

E faia pea