Ads by Google Ads by Google

Fagogo: Alofa, se ia tiga

Vaega: 59

 

Fa’atalofa atu i lou alafa’i mai i fanuga lelei i lenei taeao fou i le alofa ma le agalelei o le Atua Soifua. E ia i pea le fa’amoemoe maualuga o lo’o maua pea e le mamalu o le atunu’u le soifua maunia ma le lagi e mama i le alofa o le Atua. Ae alo maia o le toe fa’aauauina fo’i lenei o la tatou tala fa’asolo e pei ona masani ai, Alofa, se ia tiga.

 

Ua sauni nei mo lo’u fa’au’uga, ae ua fa’atalitali nei po’o le a se tala mai i lo’u tama, ona o lea na fai mai e o’o ai i mo lo’u fa’au’uga. Ua matou talatalanoa nei ma Ana, Ioane ma si a’u uo o Tino. Ua mautinoa nei, e sili pe a ou va’alau i lo’u tama po’o le a sana tali mai, ona fa’amautu ai lea o nisi mea e pei ona fuafuaina nei e si o’u tina tausi o Ana ma lo’u tuagane o Ioane ia ae maise fo’i o Tino lea ua matou mafuta nei.

 

Na ou manatu vave i lea taimi le isi upu o le tusi a si o’u tama, lea na fa’apea mai, na te le mautinoa pe o mai Makerita ma Peteru pe leai, o lona uiga e fa’ailoga fesili lea tulaga, ae pau lava le tagata ou te fia va’ai i ai, o si o’u tama.

 

Na uma nei la matou talanoaga i lea taimi, ma ua tu’u mai e Ana ma Ioane ia maua ma Tino le avanoa ma te talatalanoa i lea taimi. Na ou tu a’e nei i luga ma ou savali atu i le isi itu o le potu, lea o lo’o i ai le togala’au matagofie lea e masani ona galue ai si o’u tina tausi o Ana.

 

Na iloa mai e Tino le le tonu o lo’o mafaufau i lea taimi ma o le ala lea na fesili mai ai ia te a’u, pe e i ai se mea o o’u popole ai. Na tali atu i ai e tusa ma le tala na fai mai e si o’u tama ia te a’u e uiga ia Makerita ma lo’u tuagane o Peteru.

 

Ua le tautala Tino i lea taimi, ae ua na o le tilotilo mai ia te a’u. Na ou toe liliu nei ma ou toe tilotilo atu i le toaga la’au matagofie lea ua tu mai nei i o’u luma, na fa’apea o’u mafaufauga, afai e le o’o mai lo’u tina o Makerita ma lo’u tuagane o Peteru, o lona uiga ua ou iloa ai le tulaga o lo’o i ai le mafaufau o Makerita ia te a’u. Afai fo’i e le mafai ona o’o mai, atonu lava o lo’o pisi la’ua, ae peita’i, ia te a’u lava ia e tatau lava ona o’o mai.

 

Na ou liliu nei ma ou tilotilo atu i si a’u uo o Tino, lea ua fa tausaga o ma feoa’i ma mafuta, na ou iloa ai le tulaga o lo’o i ai lona mafaufau i lea taimi. E foliga mai o lo’o tu’u fesilisili pea lona mafaufau i le tulaga o lo’o i ai a’u, ona o mea uma o lo’o tutupu i totonu o lo matou aiga, ou te le i fa’aalia se mea e tasi ia Tino, ona i lo’u manatu, e le o ni mea ia e tatau ona ia iloaina, aua ou te le iloa pe tua mania la ma mafutaga.

 

“Averia, fa’amolemole tautala mai ia te a’u, ona ou iloa ai lea o le mea lea e tupu, o lea ua i’u manuia lau taumafaiga, o lea fo’i ua fa’ailoa mai e maualuluga lava ou togi na i lo isi tagata sa outou ao’oga fa’atasi, sa i ai lo’u manatu o le a e fiafia, a’o lea ou te va’ai atu, e tele mea o lo’o pogatia ai lou loto ma lou mafaufau, fa’amolemole tautala mai ia te a’u ona ou malamalama ai lea, ae ‘aua le tu’u fa’apea, e ono tutupu mai ai nisi mea e le tatau ona tutupu.”

 

Ua ou lagona le alofa i si nei tama, ua avea ma o’u fesoasoani i taimi uma a’o o’u taumafai atu mo a’u a’oa’oga. Ua lagona fo’i le matamuli e fa’ailoa atu ia Tino le tulaga o lo’o i ai lo’u aiga, ae maise ai o Makerita ma Peteru, o le ala lea na ou tu’ua ai se i ai se taimi ona ma fetufa’ai ai lea. O lava tulaga faigata o lo’o i ai nei lo’u aiga, ae sa ta’imua pea la’u va’ai i si o’u tama e pele i lo’u loto. O a fo’i faiga leaga ma le le alofa o lo’o fai e lo’u tina sa ma fa’afesaga’i i aso uma o lo’u olaga, ae sa ou manatu ifo i lo’u loto atonu e sau se aso ma se taimi e lagona ai e Makerita le leaga o ana mea o lo’o fai nei ia te a’u, ae maise o si o’u tama.

 

Ua tonu nei i lo’u mafaufau, o le a ou fa’ailoa i si o’u tina tausi o Ana fa’apea ma si o’u tuagane o Ioane lea o lo’o matou mafuta i lenei taimi ia le tulaga ua o’o i ai, ae maise o le aso o lo’u fa’au’uga mai le a’oga fa’aloia.

 

E faia pea