Ads by Google Ads by Google

Fagogo: Alofa, se ia tiga

Vaega: 52

 

Fa’atalofa atu i le mamalu o lea atunu’u aemaise o le au faitau i lenei taeao fou, malo le soifua, malo fo’i le onosa’i i faiva ma tiute o lo’o feagai ai i lenei aso. Ae alo maia, o le a toe fa’aauau atu la tatou tala fa’asolo e pei ona masani ai mo lenei aso.

 

Ua ma’ea nei la matou feiloa’iga ma Tino ma ua tu’umuli loa. A’o le taimi atoa lava sa o matou mafuta ai ma Tino, sa lagona lava le popole o lo’u loto, ona e ui lava ina ua matagofie mea uma i le feiloa’iga na fai nei, ae o lo’o tu mai i o’u luma si o’u tama.

 

Ua avea lea ma ao pouliuli i lo’u mafaufau, fa’atasi ai ma o’u mana’oga, ma’imau pe ana fa’apea o lo’o matou mafuta ma si o’u tama i lea taimi se i feiloa’i ia Tino. O ia mafaufauga, sa ou manatu ai loa, e sili loa ona ma talatalanoa ma lo’u tuagane e tusa ai ma lana tala e fia talatalanoa ia te a’u, ona o lo’o i ai mea o lo’o tutupu i lo matou aiga.

 

Ua na o le vavao nei o Ana ma Ioane ma ta’uta’u le tamali’i o uiga o Tino, o ona uiga alofa ma le fa’aaloalo. A’o lea taimi atoa, e le o alu lava i ai lo’u mafaufau, ona o lo’u fia fa’alogo i se tala a Ioane e fai mai ia te a’u.

 

“Ioane, sau ta o i le potu malolo ta te talanoa ai.” Ua tiloitilo mai nei lo’u tina tausi ia te a’u i lea taimi, ae ua ou ‘ata atu i ai. Ua ‘ata mai si o’u tina ia te a’u ae ua ia iloa lelei lava le uiga o la’u tala i a Ioane.

 

Na liliu mai nei Ioane ma tilotilo mai ia te a’u, “Averia, ua lelei, ua ou fia talanoa fo’i ia te oe lo’u tuafafine, ona o le lelei o Tino.” Ua ou ‘ata nei ma ou liliu loa ma ou savali atu i le itu o lo’o i ai le potu malolo.

 

Ua ma nonofo nei i lalo ma ou tilotilo atu i si o’u tuagane, “Ioane, ae e te le i fai maia lava se tala, o le mea muamua lava, taofi ou manatu e uiga ia Tino, ua ou iloa fo’i ua e fiafia ua oulua feiloa’i ma Tino, ae o lea o lea ou tautala atu ia te oe si o’u tuagane, o le ma va ma Tino, e le o alu tele i ai lo’u mafaufau, ae o le tauanau mai a Ana, o le ala lea na ou faia ai le fa’aiuga e o’o mai Tino, se i feiloa’i ma Ana, ae fa’afetai fo’i, ua aua ai fo’i le avanoa e te lua feiloa’i ai.”

 

Na ou tilotilo toto’a atu nei i lo’u tuagane, ae ua na o le punou i lalo, sa fa’aauau pea la’u tala, “Ioane, e le sili ifo lava Tino ia te a’u na i lo oe lo’u tuagane, o le tulaga fo’i o lo’o i ai ma’ua ma le ma mafutaga ma Tino, e alu aso, sau aso, ma ou te le o iloa pe o’o ma’ua i nisi tulaga, ae o le mea e sili ona ou fa’afetai ai, ua oulua iloa uiga tausa’afia o Tino, ta’atia ai loa fa’apena, ae pau le mea lea ou te fia iloa, po’o  a mai lo tatou aiga, ma ou te mana’o ia e fa’ailoa mai ia te a’u mea uma, ae maise ai o si o ta tama.”

 

“Averia, lo’u tuafafine, ou te fa’afetai atu ua e talatalanoa mai ia te a’u e uiga i lea itu, ae tau lava ina ou soso atu i ou tafatafa, Averia, ua e matua fo’i ua tatau fo’i ona sa’ili se isi e alofa ia te oe, a lea ua va’ai i ai o’u mata, ua fa’alogo fo’i i ai o’u taliga, e ‘ese le lelei o Tino. Tau lava ina ou fa’apena atu ia te oe le tuafafine, a’o nisi lava itu, e fai lava e oe le fa’aiuga ma o le mea e te loto i ai, o le mea fo’i lea ou te malie i ai.”

 

“Averia, ou te le mana’o e fa’apopole oe, ona o lea o le a e alo atu mo su’ega mulimuli o au mataupu o le a’oga, a’o mea uma i totonu o lo tatou a’iga, ou te fa’amoemoe ia te oe le tuafafine, o oe e fa’asa’oina mea uma, ona o lo’o i ai mea o lo’o le sa’o ona fai, e pei la o le va o lo ta tama ma Makerita ma Peteru, ua o’o Peteru i le tulaga fo’i lea, ua pule atoa e ia mea uma, e foliga mai ua leai se leo o lo ta tama i mea e fai, o le fa’atonutonuina o tagata faigaluega, o mea uma, ua fai lava e Peteru fa’aiuga e aunoa ma sona tapa i se manatu o lo tatou tama.”

 

E faia pea