Vaega: 49

Taeao manuia i le mamalu o le atunu’u, i le alafa’i mai i fanuga lelei i lenei taeao fou i le alofa a le agalelei o le Atua Soifua. O a fo’i feau ma galuega o le a feagai ma le atunu’u, ia fa’amanuia le Atua i lenei aso, ae alo maia, o le a toe fa’aauau atu la tatou tala fa’asolo e pei ona masani ai i lenei aso.

O se aso fiafia lenei mo a’u, fa’apea fo’i si ou tina tausi o Ana, ina ua matou feiloa’i fiafia nei ma si o’u tuagane o Ioane, sa mamao lava ma lo’u mafaufau o le a tupu lenei mea. Ua ou lagona ai fo’i le vaivai o lo’u loto, ona o le tala ua fai mai nei e Ioane ia e a’u, i mea o lo’o tutupu i totonu o lo matou aiga. Sa ou taumafai ina ia maua so ma taimi ma si o’u tuagane ma te fetufa’ai ai na’o ma’ua, ona ou te le i mana’o e iloa e Ana mea  ia, ona o lo’u manatu i nisi itu e ono tutupu mai ai.

Ua matou saofafa’i ifo nei a o matou fetufa’ai ma sa ou va’ai lava  i le sagisagi fiafia mai o si o’u tuagane ia te a’u, ae maise fo’i o le tulaga o lo’o i ai lo ma aiga ma lo’u tina tausi. O le isi fo’i itu, ua fa’ateia ioane i le lona taunu’u ane o lea ma te mafuta ma Ana.

Na geno mai nei Ana ia te a’u, ou te faia le tala i a Ioane e tusa ai ma le ma tapenapenaga lea ua fai nei, lea ua matua’i matagofie ai lo ma fale i lea aso, “Ioane, lo’u tuagane, ia o lea e te taunu’u mai nei, o lo’o fa’atalitali atu le ma malo, ia a tonu fo’i o oe le isi a ma malo fa’aaloalogia i lenei aso, ona o lea ua e taunu’u mai, ua uma ona tapena ma le fale ma fa’amatagofie mea uma. Ae ‘aua e te popole, o le ma malo, o si a’u uo o lona igoa o Valentino, sa ma fetaui i totonu o le a’oga, ua ma’ea la ana a’oa’oga i le tausaga lea ua tuana’i atu, a’o o a’u o lea o le a fa’ai’u a’u a’oga i le tausaga lenei, ua toe nei o masina e lua, ona fa’ama’ea lea o a’u a’oa’oga.”

Na ou tilotilo atu nei i lo’u tina tausi i lea taimi, ma na ou iloa ai o lo’o lelei lava le fa’asavaliga o la’u tala lea o lo’o fai nei i lo’u tuagane, “Ioane, o lea fa’atoa o’o mai Tino i lo ma fale, ma ua mana’o Ana e fia feiloa’i i ai, o le ala lea o lo’u taunu’u mai o lea ua teuteu ai le fale ma tapena le meatausami e fa’atalitali ai le taunu’u mai o Tino, a’o lea ua e muamua mai, ia atonu lava o auala e faia e le Ali’i, ina ia tatou feiloa’i ai, ae maise fo’i o le a maua ai le avanoa e te feiloa’i atu ai i a Tino pe a taunu’u mai.”

Ua na o le punou o si o’u tuagane i lea taimi, ua ‘ata nei a ea a’e i luga lona ulu, “Averia, o le tulaga lena, e leai lava se mea e te popole ai, ua e matua fo’i, ua tatau fo’i ona fai sau uo, ae na o le pau lenei o la’u tala ou te fia fai atu ia te oe lo’u tuafafine, afai lava e alofa fa’amaoni le na tama ia te oe, o le mea lea e sili ona taua ia te a’u, ia alofa fa’amaoni ia te oe lo’u tuafafine, aua a fai e sau a’o nisi itu, ia ua e iloa fo’i le tulaga e o’o i ai, ae afai ou te va’ai atu e alofa fa’amaoni ia te oe, ona malie atoatoa lea o lo’u loto.”

Na ou tilotilo atu nei i lo’u tina tausi, ae ou va’ai atu ua maligi ifo ona loimata i lea taimi, ua ou iloa lelei lava, o lo’o mamafa fo’i o le loto o lo’u tina le mea lea ua tautala mai ai nei lo’u tuagane. “Ioane, fa’afetai i lou alofa ia te a’u, a e le o tanumia lava lea tulaga i a te a’u ioane, ai fo’i o le mea lea ua e sau ai lava, ona o lou fia o’o mai e va’ai a’u ae ou te fa’afetai atu mo lou alofa mo a’u i mea uma lava.”

E le i uma a’u tala i lea taimi ae tu’itu’i mai loa ma le faitoto’a.