Ads by Google Ads by Google

Fagogo: Alofa, se ia tiga

Vaega: 48

 

Fa’afeiloa’i atu i le alofa ma le agalelei o le Atua Soifua i lenei taeao fou, taeao toto’a, taeao manuia, ae alo maia, o le a toe fa’aauau atu la tatou tala e pei ona masani ai.

 

Ua fa’atalitai nei le ma malo fa’aaloalogia lea ua toe nei o se aga ona taunu’u ane lea. Ua le iloga se mea e pisi ai si o’u tina tausi o Ana i lea taimi. Ua tau fa’asa’osa’o solo ie ua tau ma’anuminumi, savali ane i le isi itu, ua le masino le mau mea e tago i ai le lo’omatua, ina ia fa’amatua’i aulelei atili.

 

E le i umi lava, ae ma fa’alogoina loa le tu’itu’i mai o le faitoto’a, ua tilotilo mai nei lo’u tina tausi ia te a’u, ma lue mai lona ulu ou te alu e tatala le faitoto’a. Ua tu nei le lo’omatua ma ua mata’i lelei le faitoto’a, ae ua ou liliu loa ma ou savali atu i le faitoto’a i lea taimi. Na ona matala lava o le faitoto’a, ae ou va’ai ai le tu mai o si o’u tuagane la’ititi o Ioane.

 

Ua pei e pe lo’u fatu i lea taimi, ona e ‘ese lava a ma fuafuaga na fai ma si o’u tina tausi, ‘ese le mea lea ua tupu mai nei. Ua le mautonu lo’u mafaufau i lea taimi, “Auoi, o Ioane, oi talofa e i si o’u tuagane.” Na fai lava a’u tala nei ma ou a’apa atu ua fusi mai si o’u tuagane i lea taimi. Ua lagona le vaivai o lo’u loto i lea taimi, ua le mafai ai ona tatali le maligi ifo o o’u loimata ma fusi mau mai si o’u tuagane.

 

“Ioane, Ioane, talofa e, i si o’u tuagane.” Ua le mafai ona ou toe fai atu se isi tala i si o’u tuagane. Ua ou lagona fo’i i lea taimi, le naunau mai o le loto o Ioane, ona ou tau i’ite ai lea, e pei lava o lo’o i ai se mea o lo’o tupu i lo matou aiga. “Averia si o’u tuafafine pele, ua ou sau lava e asi mai oe, ua ou misia lava oe.”

 

Ua na o le ma fetagisi nei i lea taimi, ua oge upu, ua sola fo’i manatu ma mafaufauga i lea taimi, o fa’alogona fo’i sa ou o’o i ai, ua pei e fofo’e ‘ese atu, ona o lea ua ou va’ai i si o’u tuagane e pele i lo’u loto.”

 

Ua tau fa’ato’ato’a lo’u mafaufau ma ua ou a’apa atu nei i lona lima ma ta’ita’i loa ina ia ma nonofo i luga o le ‘sofa, ma se i feiloa’i atu i lo’u tina o Ana. Na savali mai nei Ana ma ona loimata i lea taimi ma fusi atu Ioane. “Ana, fa’afetai i le Atua, o lo’o manuia oe le tina, fa’afetai i lou alofa i si o’u tuafafine o Averia, fa’afetai lava mo mea uma.”

 

Ua na o le tagi au e ue nei o le lo’omatua o Ana i lea taimi ma fusi atu Ioane, “Ioane, talofa e, ua e sau mamao lava, fa’afetai ua tatou feiloa’i manuia, e talofa e ia Ioane.”

 

Ua fa’ato’ato’a nei le mataupu i lea taimi ma ua ou taumafai ina ia maua se tala mai i a ioane pe o le a le mafua’aga ua alu ane ai fa’apea, ae le logo muamua ane a’u. O le isi itu, ua ou fia iloa pe o i ai se mea o tupu i lo matou aiga, fua i lona alu ane fa’apea.

 

Na tilotilo mai nei si o’u tuagane ia te a’u, “Averia, fa’afetai i le Atua, o lo’o manuia lava oe ae maise o si lo’omata o Ana, ou te fa’amalie atu fo’i pe afai ua ou sau fa’apenei ae le logo muamua mai oe le tuafafine, ae ou te talitonu, o lo’o e malamalama pea i o’u uiga, ae ou te fa’amalie atu ia te oe le tuafafine e tusa ai ma lea tulaga.”

 

“Ae ua ou o’o mai se i ta talatalanoa e tusa ai ma mea o lo’o tutupu i totonu o lo tatou aiga, ae maise ai o lo ta tina o Makerita ma Peteru, ae maise ai o si o ta tama, ua leaga lava le tulaga ua o’o ia i lo tatou aiga Averia, ua le toe maua se fiafia e pei ona i ai, ua foliga mai ua fai ua e Peteru fa’atonuga ma fa’aiuga o mea uma, ma ua a’afia  ai tagata faigaluega sa tautua toto ma tautua alofa i lo ta tama.”

 

Ua ou fa’alogologo nei ma le toto’a o lo’u loto i le fa’amatalaga lea ua fai mai nei e lo’u tuagane ia te a’u, o mea na tutupu i le tuana’i ma ua ou le toe fia manatua, o lea ua toe fafagu mai uma i le taimi lea.

 

“Ioane, fa’afetai ua ta feiloa’i fiafia, ae onosa’i mai si o’u tuagane, se i sau se taimi ona ta talatalanoa ai lea, ae ua lagona le fiafia o lo’u loto, ina ua ou va’ai atu ia te oe.”

 

E faia pea