Vaega: 25

Ina ua fai mai le tala a le tama’ita’i lea ia te a’u, sa ou pupula to’a atu i ai, ma ua manino lava i o’u fa’alogona e le o fiafia le to’atele o tagata faigaluega i uiga o lo’u tina o Makerita. Atonu fo’i o le mafua’aga lea ua fesili mai ai lenei tama’ita’i ia te a’u.

Na ou tu nei ma ou tilotilo atu i ai, na i’u ina ou ‘ata’ata ma ou fa’atalofa atu ia i latou uma i lea taimi. Ina ua uma ona ou feiloa’i atu i ai, sa toe sau fo’i le fesili lava lea e tasi, o lea na ou tali atu loa i ai, “O lo’u tina o lo’o pisi i nisi fuafuaga a lo matou aiga.” Ua tilotilo mai nei le tama’ita’i lea ia te a’u, ma na ou iloa lelei lava, e le fiafia i lo’u tina o Makerita.

Na tonu nei i lo’u manatu, o le tagata tonu lava lea e tatau ona ou fesilisili i ai, po’o ai le toeaina lea, aua o lea ua ou iloa atu nei o ia o le failautusi a le toeaina lea.

Na ou fesili nei i si tama’ita’i, ae au le tali, o latou uma e faigaluega i totonu o le vaega lea e talia telefoni a le Kamupani. Na ou tilotilo atu nei i le isi itu, o lo’o fa’atasitasi mai ai nei nisi tama ma tina e fai lava si matutua atu na i lo tama’ita’i nei, ma na ou fesili loa po’o ai ia tagata ae sau le tali a le tama’ita’i lea e fai ma failautusi a le toeaina, o i latou uma ia o Supavaisa i so’o se matagaluega a le Kamupani.

Na ou tilotilo atu nei i ai, ma e pe a ma le to’a tolu sefulu i latou uma nei, ona ou fa’apea ifo lea, afai o le to’atele lea, o lona uiga e tolusefulu fo’i vaega ‘ese’ese o lo’o aofia i totonu o le fale lenei e tasi.

Na ou tilotilo atu nei i ai ma si’i atu i ai lo’u lima ma ou fa’amalo atu i ai, ae ua ifo mai ia te a’u, na ou lagona lo’u le fiafia i lea ituaiga faiga, ona ia te a’u lava ia, e leai e mea o le a latou faia ai lea tulaga, ona o lea o lo’o soifua pea lo’u tama, ua na o le pau le na o le tagata latou te faia i ai tulaga ia. Na ou fesili nei i le tamaloa lava lea, po’o fea na sau ai le anoano o nei mau meataumafa i se taimi vave, ona o lea ua fa’ateia a’u i tapenapega ua fai nei e i latou o lo’o saunia meataumafa.

Na sau le tali a le tamaloa e fa’apea, “Averia, e sau se taimi e te iloa ai, ma ou te talitonu fo’i, o le aso o le a e iloa ai mea uma lava, ma e leai se malosi’aga oi ia te a’u, e mafai ai ona ou fa’ailoa atu, ae se i ta’u atu pea e lou tama ia te oe.”

Na ou tilotiloa atu nei i le tamaloa, ma fa’ailoa atu i ai ua ou malamalama, ae ou te fa’afetai tele mo mea lelei uma lava ua o latou faia i lea aso.  Na ma toe fa’atalofa nei, ae na ou te’i i le fa’apea mai o le tala a le tamaloa, “Averia, fa’afetai tele i lou amanaia maia o matou nei o lo’o feagai ma le gao’oina o meataumafa, ou te talitonu ma lou loto atoa, afai o le a e suiina le tulaga o lo’u tama, ou te talitonu o le a e alofa ma e agalelei ia i matou e pei ona faia e lou tama.”

E fai pea