Vaega: 47

Fa’amalo atu i le mamalu o le atunu’u i lenei taeao fou, malo le soifua manuia i le alofa ma le agalelei o le Atua, e i ai pea le fa’amoemoega maualuga, o lo’o aoina pea le masina i lo outou soifua laulelei, ae alo maia, o le a toe fa’aauau atu la tatou tala fa’asolo, Alofa, se ia tiga.

Ua ‘ese lava lo’u ala a’e i le taeao lea ua atofa’ina o le a o’o mai ai Tino e feiloa’i ma lo’u tina tausi. Ua ou ala fiafia i le taeao, ua ou fa’alogoina le tausagi fiafia o manulele, e fa’ailoa mai ai le mamana ma le silisili ‘ese o galuega a le Atua Soifua mo a’u.

Na muamua lava o’u to’otuli ifo i talane o lo’u moega ma fai ai la’u tatalo, e pei ona a’oa’o mai ai a’u e si o’u tina tausi o Ana, ina ia ou fa’atino pea i aso uma o lo’u olaga. O fautuaga lelei ia ma le aoga sa fa’aaupega ai a’u, ma sa ou mulimuli ta’i pea i ai, se ia o’o mai i le aso. Ua fai fo’i ma fa’amalosiaga mo a’u, i taimi ua ou iloa ai ua leai so’u fa’amoemoe, ua gaogao manatu ma mafaufauga lelei, ua leai fo’i se tasi ou te mapu i ai.

Ua tapena nei le ma fale ma si o’u tina o Ana, ua le masino le mau mea taumafai ua kuka nei e le lo’omatua e fa’atali ai le o’o mai o le afio’ga ia Valentino Jeffery Hayes. O le tele o isi tulaga e uiga i le aiga o Tino, out e le i ta’uina i lo’u tina tausi, ona ua i ai lo’u manatu, e leai sa’u feau e ta’u ai fua i a Ana, ona o lo’o fealua’i lava Toni ia ma lona gutu e tautala ai. O le isi itu, ou te musu e fai atu i lo’u tina, ona o lo’u manatu i nisi itu, se i o’o mai si o’u tama i lo’u fa’au’uga ona ma talanoa ai lea.

Na ou savali atu nei i tua ma ou va’ai atu i le matagofie o le ma fale, lea ua teuteu lelei e si o’u tina, ua leai se mea e masepu, o la’au uma sa i fafo, ua la’u mai uma i totonu e fa’amatagofie ai le potu malolo o le ma fale.

Ua foliga mai o se malo fa’aaloalogia lea o le a taunu’u mai i teuga nei ua fai e lo’u tina tausi. Fa’asolo ane i mea taumafa, ua le iloga le ituaiga kuka ua fai nei e si o’u tina e fa’atali ai le o’o mai o Tino. Ua ma’ea mea uma ma ua matua’i selau pasene mea uma, ma ua fai loa ma le ma tonu e sili pe a ma sauna, ona ua lata le taimi e taunu’u mai ai le ma malo fa’aaloalogia.

Ua ma’ea nei ona ma sauni ma si o’u tina, ma ua ma fa’atalitali loa mo le taunu’u mai o Tino. O le ofu na laeina e lo’u tina tausi o Ana, o le ofu fa’atoa ou va’ai lava lea i ai, o se ofu ua sili ona matagofie i le va’ai. Ua ou ‘ata ma ou fa’apea atu i si o’u tina, “Mama, ta’i manaia lou ofu, ou te le i va’ai lava i lou ofu lea, o fea sa e nana ai lou ofu, ta’i manaia.”

Ua ‘ata si o’u tina tausi ma pupula mai i a te a’u, “Averia, o le ofu lenei, o le ofu o lo’u tina, o lo’u fiafia ia i le ‘ofu lea pe a ‘ofu ai si o’u tina a’o soifua, ia o lea la ua o’o mai le fa’asologa ia te a’u, a’o lea lava ou te aulelei ai, a ea.”

Ua ou ‘ata ma ou tilotilo atu i lo’u tina tausi i lea taimi, “Mama, e moni lava oe, ua atili ai ona susulu e pei o le la lou lalelei, e leai lava se tasi e toe maua oe.” Ua ‘ata si o’u tina ma a’apa ane ua toe solo lelei luga o le laulau’ai lea ua saunia lelei mo le ma malo fa’aaloalogia.

Na fa’apea ifo o’u mafaufauga i lea taimi, “Tino, ailoga e te iloa le tele o galuega ua fai nei ona o oe, ia e sau ae ia e iloa sau, sau fa’atamali’i, ae le o lou sau fa’a’afa’afa, e vave ai ona mamao i totonu lou mata.”