Vaega: 46

Fa’atalofa atu i le mamalu o le atunu’u i lenei taeao fou, malo le soifua, malo fo’i le onosa’i i faiva ma tiute o lo’o feagai ai i lenei aso, ae alo maia o le a toe fa’aauau atu la tatou tala fa’asolo e pei ona masani ai.

Ua tali mai Tino ia te a’u, ua lelei, e fia feiloa’i i lo’u tina tausi o Ana, sa ou lagona le fiafia tele o lo’u loto i lea taimi, ona ua ou mautinoa ai nei, e moni lava o a lava le ma feiloa’iga ma le ma masaniga ma Tino, sa leai so’u manatu i ia tulaga, ona ua ou fa’amoemoe tasi ia taulau o’u mo’omo’oga e pei ona ou finau ai nei.

Sa fai si o’u matamuli i lea tulaga, ona o nisi fo’i o’u manatu sa i ai, peita’i, sa ou fa’ataunu’u le mana’oga o si o’u tina tausi o Ana i lona fia feiloa’i lea ia Tino, ma ua fa’apea lava ona fai. Ua fai nei ma le ma tonu ma Tino o le aso e soso’o ai o le a alu atu ai i le fale ona feiloa’i ai lea ma Ana.

Ua ou toe fo’i nei i lo ma fale ma lo’u tina tausi, ma ua fa’ailoa i ai Ana ua malie mai Tino e o’o atu se i o la feiloa’i. ina ua uma ona ou fa’ailoa i lo’u tina tausi, sa ou va’ai le fiafia tele o Ana, a tonu o se mea sa ia moemiti i ai, ina ia i ai se tasi e fesoasoani ia te a’u. E moni lava o lo’o i ai ia, ae out e mo’omia se tasi e ‘ese atu, e mafai ona ou tufa i ai, talatalanoa i ai ma fetufa’ai manatu ma mafaufauga i mea lelei.

Ua mamafa lava i lo’u loto i lea taimi le manatu, pe o le a fa’ailoa i lo’u tama pe leai, ona o lea o le a sau Tino i le fale, ae na o ma’ua ma Ana. Ua fefulisa’i fa’ala’au mamafa i lo’u mafaufau le tulaga lea ona o lo’u manatu alofa i si o’u tama, ne i te’i ua ia iloaina, ona o’o lea i nisi tulaga. Ua ou tu nei i luga ma ou toe savali mai i tua i le potu o lo’o i ai Ana, ma fai ana la’autoto. Ou te taunu’u ane i le potu lea, o lo’o alu pese a le lo’omatua, ua matau’i o’u fiu e tau fika le noka o lo’o fa’aaoga e Ana, ae ua leai lava, o le fati o le pese ou te fa’alogo so’o ai lava, ua sui uma noka i le leo lea ua alu a’e  nei i luga.

Ua ou tu nei ma ou ‘ata, ua ou musu e fa’ailoa atu a’u i lea taimi, ae se i tu’u si lo’omatua e fai lona fiafia, ia a’o le isi fo’i itu, se i tu’u ia si lo’omatua se i tago i ai, aua o le noka lea ua fai nei, e muliga fo’i le leo o le tama’ita’i pese fo’i lea o Dolly Barton.

Na ona uma lava o le pese a le lo’omatua, o’u patipati loa ma ou savali atu i totou, ua ‘ata si o’u tina tausi ma tilotilo mai ia te a’u, “E a, e te maua le leo o le lo’omatua.” Ua ou ‘ata ma ou savali atu ua fusi mai ma ma nonofo ifo loa i luga o le nofoa o lo’o i totonu o le potu lea o lo’o galue ai Ana. O se potu ua sili ona matagofie, ona o le tele o la’au o lo’o i totonu, ua atili ai fo’i ona matagofiei le va’ai ona ua ma’ea ona teuteu lelei e Ana.

Ua avea fo’i le potu lea ma potu ma te nofonofo ai ma ma talatalanoa i mea uma lava. Na ou fa’apea atu nei i si o’u tina tausi, “Ana, e i ai le mea ou te fia talanoa atu ia te oe, ua ou toe mafaufau nei, o lea o le a sau Tino i le fale, ae ou te le i logoina lo’u tama e tusa ai ma le manatupu lenei.”

“Averia, e moni lava oe si a’u tama pele, ae va’ai oe, o lo’o i ai lo’u manatu e sili pe a ou feiloa’i muamua i si au uo o Tino, ou te fia iloa pe alofa fa’amaoni ia te oe, aua o a lava nisi mea mea, ou te le mana’o i ai, pau lo’u mana’oga Averia, afai ou te mautinoa e alofa fa’amaoni ia te oe, ua ou malie atoatoa i ai.”

E faia pea