Vaega: 45

Lo’u agaga e, ia e fa’amanu atu ia ioeva, o mea uma fo’i oi totonu ia te a’u, ia fa’amanu atu i lona Suafa Paia. Tatou fa’afetaia pea le alofa ma le agalelei o le Atua, ina ua sopoia mai lo outou soifua ma si o’u nei ola i lenei aso fou e fa’aoopoopo i aso o lo tatou ola. Ae alo maia, o le toe fa’aauauina lenei o la tatou tala fa’asolo, Alofa, se ia tiga.

O auala a le Atua, e fa’aleagaga, e le fa’aletino. O auala fo’i a le Atua, e mapuna mai ai manatu ma mafaufauga lelei e ta’iala ai lo tatau ola i le lalolagi nei. Ina ua talanoa mai si o’u tina tausi ia te a’u, ua ou lagona ua mapu i ai lo’u mafaufau. Sa i ai lo’u manatu atonu o le a avea lea tulaga ua ou faia ma ala o le a motusia ai lo ma va nofonofo lelei ma lo’u tina tausi o Ana, peita’i, o lona loto malamalama ma lona alofa mo a’u, ua faigofie ai la ma mataupu. Ua ou tali ioe i lo’u tina, e i ai se aso, ona ma o atu lea ma Tino se i o la feiloa’i ma va’ai fo’i po’o le a sona manatu i le taule’ale’a lea ua ia mate’ia nei.

Ua ma a’ai fiafia i le afiafi, ae sa muamua lava ona fai la ma tatalo, ua ma fa’afetaia ai le alofa o le Atua, ona o lana tausiaga mo ma’ua a’o ma nonofo au mau ai i le isi itu o Peretania ona o a’u a’oa’oga. O lo’u tausaga fa’ai’u fo’i lea i totonu o le a’oga fa’aloia. O a’u mataupu uma foi, ua pasi uma, o a’u ripoti o la’u a’oga, e maua uma e lo’u tama, ona e meli i ai e le failautusi a le a’oga, o lona uiga, o lo’o iloa lelei e lo’u tama le galosologa o la’u a’oga. O tausaga e tolu o la’u a’oga, sa avea a’u ma tama’ita’i a’oga ua sili ona maualuga togi, ai fo’i o le mea lea e leai ai ni a’u uo tama’ita’i, ona e i ai lo’u manatu, atonu o lo’o va’ai mai i latou ia te a’u is e auala fa’atauva’a, peita’i, sa ou le i manatu lava i ia itu, ae sa ou punou ma le filiga ina ia manuia la’u taumafaiga.

O le fautuaga a Tino ou te manatua pea, “Averia, o le a lava le poto ma le atamai o le tagata, o meaalofa ia mai le Atua, ae a leai sou fa’autauta, ua leai se aoga o mea uma, afai fo’i ua e maua le poto, ia fa’aaoga lelei, e te alofa atu ai mo e ua mo’omia lau fesoasoani.”

O lo’u tausaga mulimuli lenei i totonu o le a’oga fa’aloia, ma ua tu’u atoa lo’u loto ma lo’u mafaufau ina ia i’u manuia a’u a’oa’oga uma, ae maise o le faigata o mataupu o lo’o i ai nei.

Ua ou manatua nei, o puapuaga o lenei olaga o se mea fa’atauva’a, pe afai tatou te talia le alofa o le Atua i mea uma tatou te faia, ia ‘aua fo’i ne i avea le mativa ma le fa’atauva’a o le tagata, e i’u ai ina fetu’u atu pe faifai atu i isi tagata. Ae ia avea le alofa o le Atua, e fai ma fai fofo mo i tatou, tatou te tua i ai, tatou te malu ai, ma tatou ola fiafia ai e pei ona finagalo i ai le Atua mo i tatou.

Ina ua fa’ai’u a’oa’oga a Tino, na mafai ona maua lona avanoa i se tasi o Ofisa Loia tele lava i totonu o Peretania. E le i uma ai le alofa o Tino ia te a’u, ae sa fai lava ma alu ane i le a’oga e asi ane a’u. O se tasi la o aso na alu ane ai, sa ou fai loa i ai, o lo’o fia feiloa’i si o’u tina tausi o Ana ia te ia.

Na tau fai se fesasia’i o le mafaufau o Tino, ai fo’i o lona va’ai alofa mai ia te a’u, peita’i, sa ia tali mai ia te a’u i se tali ua sili ona fiafia ai lo’u loto.

E faia pea