Ads by Google Ads by Google

Fagogo: Alofa, se ia tiga

Vaega: 44

 

Taeao manuia i le mamalu o le atunu’u ae maise o i latou o lo’o fiafia e faitau i la tatou tala fa’asolo, ia o tatou fa’afetaia pea le alofa ma le agalelei o le Atua Soifua, ona o Lana tausiga alofa mo i tatou i aso uma o lo tatou ola. Ae alo maia, o le a toe fa’aauau atu la tatou tala fa’asolo, Alofa, se ia tiga, e pei ona i ai nei. ia manuia le alo faiva o le atunu’u i feau ma galuega o lenei aso.

 

Ua tusi mai nei le lima tusi o lo’u tina tausi ia te a’u ae ua na o lo’u ‘ata ma ou tilotilo atu i ai. “Averia Rosa Elisapeta, ou te iloa ua i ai le mea ua tupu ia te oe, ia e tautala sa’o mai nei ia te a’u lou tina, o ai le tama lena ua fa’ananau i ai lou loto, ia e ta’u sa’o mai ia te a’u.”

 

Na ou tilotilo atu nei i si o’u tina na tausia a’u, ma ou iloa ai, e moni lava e leai se mea e lilo i lalo o le la, talutalu ai le amio fo’i lea o le faitatala ma le fia iloa.

 

Ua ou ‘ata ma ou nofo ifo i luga o le sofa o lo’o i totonu o le potu malolo o lo ma fale, ma ou tilotilo atu i lo’u tina. Ua le iloga se mea ou te minoi i ai, ona o lea ua maua taiataia la’u ova e lo’u tina tausi.

 

“Mama, o le tama o lona igoa o Tino, o Valentino Jeffery Hayes, o lona tama o le Amepasa a le Malo o Amerika i totonu o Peretania.” E le i uma atu a’u tala ae sa’o fa’i ifo loa i lalo ma lo’u tina tausi.

 

Ua luelue mai nei lona ulu ina ia fa’aauau pea la’u fa’amatalaga, a’o le taimi lea, ua ou le iloa pe o le a ou ‘ata pe ou te ita, ona o lea ua maua a’u i le va lea, ae sa i ai lava lo’u manatu o le a fa’alilolio pea se ia maua se tonu lelei ona ou fa’ailoa lea i lo’u tina tausi, a’o lea ua ou fiu e ufiufi le tama’i moa ae i’oi’o mai lava.

 

Ua na o le fa’atau pupula mai nei o lo’u tina tausi ia te a’u, ma aunagi mai e fa’aauau la’u fa’amatalaga e uiga ia Tino. Na ou tepa atu nei i lo’u tina ae ua na o le pupula to’a mai ia te a’u, “Mama, o Tino sa ma fetaui i totonu o le a’oga, ma o lona tausaga fa’ai’u lenei, ae ‘aua ne i i ai lava ni ou manatu i nisi tulaga e leai, o lea lava ou te nofo ma au fautuaga mo a’u, ia i’u lelei la’u a’oga, ma o lea lava ou te tausisi pea i ai, a’o nisi tulaga fa’alupelupeina lena ua o’o i ai lou mafaufau, Mama, e leai, e le i o’o maua i tulaga na.”

 

Ua atili ai ona pupula to’a mai lo’u tina ia te a’u, “Mama, ia o lena ua e iloa, ae ia e malie, sa ou taumafai lava i se tulaga ina ia ‘aua ne i e iloaina, ae sau se taimi ona ou fa’ailoa atu lea ia te oe, ae o lea ua e iloaina, ae ou te talosaga atu, fa’amolemole ia ‘aua ne i iloa e lo’u tama.”

 

Na a’apa mai nei Ana ma u’u atu lo’u lima, “Averia si a’u tama, va’ai oe ua lagona lava le fiafia o lo’u loto ina ua tali mai le Atua i a’u talosaga i aso uma. Na tu’u atu lo’u loto i le Ali’i ina ia alofa ma fa’asino mai sou tofi lelei, afai lava e alofa fa’amaoni lena tama ia te oe, ona ou fiafia lea ma ou fa’afetai i le Atua. Ua ou talitonu fo’i ua tali mai le Atua i a’u talosaga, ma ua fa’asino mai le auala e mafai ai ona e maua se feso’ota’iga ma si ou tina o Elisapeta i Amerika.” Na ou va’ai nei le maligi ifo o loimata o si o’u tina tausi i lea taimi, ua fa’ateia ai a’u, ona sa i ai lo’u manatu o le a ‘otegia fo’i a’u, a’o lea ua ou iloa atu ua lagona le fiafia o lo’u tina tausi ina ua maua se tasi ma te fetufa’ai.

 

“Averia, ou te fia feiloa’i i lau uo i se aso lata mai, au mai i le fale se i ou tilotilo ma ou va’ai pe alofa moni ia te oe.”   (E faia pea)