Ads by Google Ads by Google

Fagogo: Alofa, se ia tiga

Vaega: 43

 

Fa’atalofa atu i le mamalu o le atunu’u, i lou alafa’i mai i ie manuia i lenei taeao fo’u, malo lava le soifua, fa’afetaia pea le alofa ma le agalelei o le Atua, ina ua molio’o mai lo outou soifua ae maise fo’i si o’u nei ola vaivai i le manuia i lenei aso.

 

Ae alo maia, o le a toe fa’aauau atu la tatou tala fa’asolo e pei ona masani ai, i lona vaega lona fasefulu tolu lenei, ae ia manuia lava faiva o le a feagai ai ma oe i lenei aso.

 

Ua tau mate’ia la’u tupua lilo e lo’u tina tausia o Ana, ona ua ia iloa lava lo’u fiafia, maua sui lava o’u uiga, a tonu fo’i o se va’aiga lelei lea mo a’u. Ae o lo’u tina tausi ua lagona fo’i lona fiafia, ina ua va’ai mai ia te a’u, ua ou sui lava. Ua ou le toe fa’anoanoa, pe ou te toe tagi so’o e pei ona masani ai pe a o’o o’u mafaufaga i le tulaga ua i ai nei lo’u aiga, ae maise ai o le tulaga faigata ua ou o’o i ai i totonu o lo’u aiga.

 

E moni lava le tala fo’i lea, o a lava mea tatou te taumafai e natia, e iloa lava, e fiu fo’i e ufiufi le tama’imoa e i’oi’o lava. Ia soia ia, o mea lava fa’apenei, e lagona ai le malosi o le loto ma le mafaufau, ona ua i ai fo’i le suiga ua i ai le olaga latou, e pei o le tala a le isi toeaina o si o matou nu’u, “ua togi le pa tau i le ave” ae fesili atu i ai le isi toeaina, o le a le uiga o le na upu, ae toe sau le tali a le toeaina o lo matou nu’u, “ ua tau pusi i luga o aupa.” Na toe fesili le toeaina lea, o se aupa e tali ai galu pe o se aupa e taofia ai solo pe a timuga, na toe tali atu i ai le toeaina o lo matou nu’u, “Ia fa’aaoga mai le mapuni.”

 

Ua ou iloa nei, o Tino, o lona tama o le Amepasa a le Malo o Amerika i totonu o Peretania, ma o se avanoa lelei lea ma se avanoa taua ua ou maua, ou te fesilisili ai ma su’esu’e Tino e uiga i le Malo o Amerika. Ua ma’ea nei ona ou iloa mea uma e uiga ia Tino, ae ou te le i fa’ailoaina lava lo’u aiga fa’apea ma o’u matua ia Tino.

 

O le mea ua tupu, ua lagona lo’u matamuli, ua lagona fo’i le tulaga fo’i lea ua pei a ou fa’ailoaina ia Tino mea uma nei e tutupu i lo’u aiga, ona ‘ese ai lea o ni manatu o Tino ia te a’u. Ua mafana le ma mafutaga, ua le ‘asa fo’i ma ma feiloa’i, ae o le mea moni lava, e le i o’o le ma mafutaga i nisi tulaga fa’alupelupeina fo’i lea, ae o taimi uma ma te fetaui ai, e alu le ma tafaoga i le isi itu o Peretania, o lo’o i ai le sami matagofie e pei o le tioata, o matafaga e matagofie i le va’ai.

 

O nisi o taimi e alu le ma savaliga i luga o atu mauga ma le vao matua, o le matua’i matagofie lava i le va’ai i lea itu o Peretania. O nei mea uma e leai se tasi o ia iloaina, ae se i vagana ai lo’u tina tausi lea ua tau i’ite i lo’u fealua’i fa’apea.

 

O taimi uma ma te fetaui ai ma Tino, ou te fesilisili lava pe fa’apefea le Malo o Amerika, o ona tagata, o lona tamaoaiga, o pisinisi ma kamupani i totonu o le Malo. O fa’amatalaga uma lava e ta’u mai e Tino ia te a’u, o fa’amatalaga ia o lo’o teu pea i lo’u loto, ona ua ta mau i lo’u mafaufau ma lo’u loto, e sau se aso ou te alu ai i Amerika e su’e lo’u tina na ou iloa ai le lalolagi, o Elisapeta. O le tasi aso, na ou toe fo’i ane ai i lo ma fale ma lo’u tina tausi o Ana, na fa’ate’ia a’u i le matala mai o le faitoto’a, ma tusi mai le lima o le lo’omatua ia te a’u ma fa’apea mai, “Averia, ua ou iloa nai au mea lililo lea o lo’o fai, tautala mai nei ia te a’u.

 

E faia pea