Ads by Google Ads by Google

Fagogo: Alofa, se ia tiga

Vaega: 42

 

E fa’afeiloa’i atu i le ava ma le fa’aaloalo i le mamalu o le atunu’u i lenei taeao fou, malo lava le soifua, malo fo’i le onosa’i i faiva ma tiute o lo’o feagai ai, ae alo maia, o le a toe fa’aauau atu la tatou tala fa’asolo i lenei aso, Alofa, se ia tiga.

 

Alofa atu, se ia o’o ina tiga. O upu ia na saunoa i ai le Tama’ita’iSa o Mother Theresa, e fa’alautele ai lona finagalo, e uiga i lana galuega sa feagai ai ma ia i le Malo o initia. O le manulauti lea o ona fa’amoemoega ma ana galuega uma, aua ua ia talitonu i le alofa o le Atua, e le fa’atuaoia mo i tatou. O le alofa, o se tasi lea o vituti ua silisili ona aoga ma taua i o tatou olaga fa’aletagata. Ona o tatou manatua fa’atasi ai lea o le alofa o le Atua Soifua, lea na ia auina mai ai lona Atali’i Pele e to’atasi, ina ia togiola i tatou ma ia o tatou maua le sa’olotoga.

 

O le alofa fo’i lea o Iesu Keriso mo i tatou, lea sa o’o ai ina puapuagatia ma tautau ai i luga o le satauro, ina ia fa’ataunu’u le folafolaga a lona Tama, ae maise ai o lona alofa, ina ia ‘aua ne i fano i tatou, ma ia maua ai le feso’otaiga vavalalata ma lona Tama i le lagi. O le alofa o le tagata e alu alu lava muta, a’o le alofa o le Atua, e le mafai ona mavae mo i tatou. ia o tatou tumau pea i lea alofa, ina ia mafai ai ona o tatou alolofa atu i o tatou uso a tagata, se ia o’o ina tiga.

 

Ua fa’asolosolo pea tausaga o la’u a’oga, ma ua le mafai lava ona toe fa’alavelave sei isi lava mea i lo’u mafaufau, ae ua na o lo’u liliu atu nei e fa’atino si a’u taumafaiga, ina ia i’u manuia, ma ia taulau lo’u fa’amoemoe o lo’o i ai nei.

 

Ua fa’au’u ma ua i’u manuia le a’oga a Tino, a o lo’u tausaga mulimuli fo’i lea ona ma’ea lea o la’u a’oga. Ua ou lagona le fiafia o lo’u loto ma lo’u agaga fa’afetai i le Atua, ona o le ola ma le malosi ua foa’i mai mo a’u, ae maise ai o Ana meaalofa ua ou maua, e i ai le poto ma le atamai, lea ua ou ofu ai nei ma ou pale ai, ae maise ai o le a fa’ai’u manuia ai la’u a’oga.

 

O a lava mea uma, ua na o ni manatu e fai vavale, aua o o tatou manatu, e le o le finagalo lea o le Atua, o fa’amoemoega uma fo’i tatou te fa’ananau i ai, e leai sona taunu’uga lelei pe afai e aunoa i tatou ma le fesoasoani mai o le Atua. A’o le i fa’ama’eaina le a’oga a Tino, ua mafana le ma mafutaga, ma ua mafai ai fo’i ona ou tepa atu i le isi itu o le olaga ma le soifuaga o le tagata, lea o lo’o fa’apea mai, tatou te mo’omia le fesoasoani ma le tauau o le isi tagata e fa’afaigofie ai a tatou galuega ma fuafuaga.

 

O le ma mafutaga ma Tino e leai se tasi na ia iloaina, ae sa i ai lo’u manatu o le a fa’ailoa i lo’u tina tausi o Ana, peita’i, sa toe suia lo’u mafaufau, ona ua ou fa’apea ifo, o lona uiga, ou te utia ai i le va lea, ona o le tagata e muamua lava ta’u i ai a’u e Ana, o lo’u tama. O le ala lea na ou natia ai lea tulaga ina ne i te’i fo’i ua toe pa le va’a o le lo’omatua ia te a’u. O taimi uma lava ou te alu ai i la’u aoga, ua foliga mai ua i ai se mea ua ou fa’ananau i ai ona o le ma mafutaga ma Tino. O se taule’ale’a   e tausa’afia ona uiga, ma ua ou iloa ai o lona tama, o Sr. Robert Hayes, o le Amepasa a le Malo o Amerika i totonu o le Malo o Peretania.

 

E faia pea