Ads by Google Ads by Google

Fagogo: Alofa, se ia tiga

Vaega: 41

 

Fa’atalofa atu i le mamalu o le atunu’u, ae maise lava o i latou o lo’o fiafia e faitau i la tatou tala fa’asolo, malo lava le soifua i lenei taeao fou i lou alafa’i mai i le manuia i le alofa ma le agalelei o le Atua Soifua. Ae o le a toe fa’aauau atu la tatou tala fa’asolo e pei ona masani ai. ia manuia faiva ma tiute o le a feagai ai ma oe i lenei aso.

 

Na ou tu a’e nei i luga ma ou savali loa i fafo ma ou savali atu i le itu o le fale o lo’o i ai le potu ‘ai ma ou iloa atu ai, ua matua’i selau pesene mea uma ua uma ona saunia e si o’u tina tausi o Ana. Na pei o le afa agi fuli fao le fa’ataitaio mai o lo’u tina tausi ia te a’u, ina ua iloa mai, ou te le i o’o lava i le vai, ma e le i suia fo’i o’u ofu lea na ou alu ai i le a’oga, ma e ve’uve’ua atoa lo’u ulu.

 

“Averia Rosa Elisapeta McAdams, o le a le na, o le a le mea ua tupu ia te oe, oka ta fefe, Averia, ou te le i a’oa’oina oe i na tulaga ua e o’o i ai, ou te le i a’oa’oina oe e te ola faiga’elo ma e ola paie, toe fo’i nei i totonu o lou potu e ta’ele ona e sau ai lea, e fai le ta mea’ai.”

 

Ou te talitonu ana fa’apea ou te tali atu i lo’u tina tausi, o lona uiga e lavea a’u i le ipu ti o lo’o ia u’uina i lea taimi. Na ou savali atu nei ma ou nofo i luga o le nofoa ae o lo’o agi pea le matagi fuli fao a Ana ia te a’u, e aunoa ma sa’u upu na tali atu ai ia te ia.

 

Ai ua iloa mai e lo’u tina le maligi ifo o o’u loimata, o le ala lea na tu’u fa’afuase’i ai loa le ‘otegiaina o a’u, ae ua savali mai nei ma fusi atu a’u. “Averia, Averia, si a’u tama, fa’amagalo mai a’u, e i ai se mea ua tupu ia te oe, fa’amolemole ta’u mai ia te a’u lou tina, o oe lava o si a’u tama pele, ma e leai lava se tasi e mafai ona ave’eseina oe mai ia te a’u, tautala mai, ona ou iloa ai lea o le mea e ao ona fai, ua e ita ia te a’u, Averia, tautala mai ia te a’u fa’amolemole.”

 

Na ou a’apa atu nei ua fusi mai si o’u tina sa tausia a’u i le tele o tausaga, “Mama, ‘aua e te popole, e leai se mea o tupu, ua pau lava ua te’i lava ua toe fo’i o’u mafaufauga i tua, i lo’u aiga, o lo’u tama, aemaise ai o lo’u tina o Elisapeta, ua ou fia va’ai ai lava i si o’u tina, ua ou fia pa’u atu lava i si o’u tina moni. Ou te le o iloa po’o manuia ia, po’o ma’i, po’o alofagia e nisi, po’o soifua pea lona aiga e tausia ia pe leai.”

 

“Averia Rosa, ua uma ona ou talanoa atu ia te oe, o a lava mea uma o lo’o tutupu i le taimi lenei i totonu o lou aiga, ia e fa’agalogalo, ae ia e galue malosi ina ia i’u manuia lau a’oga e pei ona mana’o i ai si ou tama, o isi mea uma, e mulimuli mai, ae ia e sagai atu e fa’atino au a’oa’oga, a ma’ea, ona e maua lea o le fiafia ma le filemu o lou loto, o le a mafai ai fo’i ona e iloa mea uma e uiga i lou tina o Elisapeta, a’o le taimi lenei, o a’u lea ta te fa’afesaga’i, e le toe ta’uesea lava oe ia te a’u, o oe o la’u tama, e ui lava ina e te le i ifo mai i lo’u manava, ae o oe o la’u tama.”

 

Ua le utufia o’u loimata i lea taimi ua ou lagona le vaivai o lo’u loto, aua sa i ai lo’u manatu, ua tu’ulafoa’ina a’u, ua le alofagia a’u, ua leai so’u fa’amoemoe, a’o lea, o lo’o i ai se tina alofa ma se tina e naunau mai ia te a’u. Na ou a’apa atu nei ua fusi mai i o’u tina tausi i lea taimi, ma ua ma fetagisi ai lava ma ma talatalanoa. “Averia, ia e loto tele, a fai sou loto, ia ma’ea lau a’oga, a e alofa fo’i ia te a’u, ae maise o si ou tama ia e loto tele ma ia fa’ai’u lelei au a’oga, ua e fa’alogo mai.”