Ads by Google Ads by Google

Fagogo: Alofa, se ia tiga

Vaega: 40

 

Taeao manuia i le mamalu o le atunu’u ae maise o le au faitau i lenei taeao fou, malo lava le soifua, e i ai pea le fa’amoemoe maualuga, o lo’o aoina pea le masina i lo outou soifua laulelei i le tausiga alofa a lo tatou Tapa’au i le lagi, ae alo maia, o le a toe fa’aauau atu la tatou tala fa’asolo e pei ona masani ai.

 

Ua pei oni ufi e tutupu o’u mafaufauga i lea taimi, ina ua toe fo’i i tua i lo matou aiga, ae maise ai o lo’u toe manatua lea o Makerita, lea ua ou mautinoa nei, e le o so’u tina moni. Ua ou toe manatua lo’u tuagane o Peteru, lea ua liua le vai o Sina i ona manatu alofa mo a’u, ona ua fafaga upu e lo ma tina o Makerita.

 

O o’u mafaufauga ia na te’i ai lava ua vaivai lo’u loto ma i’u ai ina tafe ifo fa’avai o’u loimata i lea taimi. E ui lava ina fa’apea ua ou fa’amagalo i a i la’ua, ae o le upu moni lava e le mafai ona galo i le loto ma le mafaufau o le tagata.

 

Na ou liliu nei ma ou savali atu i le itu o lo’o i ai lo’u moega, ma ou taoto loa i lea taimi, ae ua le mafai lava ona ave’ese o’u manatu ua mapuna a’e nei, ma ua le mautonu ai lo’u mafaufau. Na ou fa’apea ifo nei i lo’u loto, amuia lava se tagata o lo’o maua pea le fiafia, amuia se tagata o lo’o maua le filemu o lona loto, a’o ita nei, ua pei o se ugapepe e lolo lava i le agi a le matagi. O o’u fa’alogona ua fa’aluafesasi nei ma ua ou le maua ai le to’a filemu o lo’u loto ma lo’u mafaufau. Ua pei lava ta ’ita o se tagata ua tu’ulafoa’ina, ua leai se aiga, ua naumati fa’amoemoega.

 

Na fa’asolosolo nei o’u mafaufauga i si o’u tama e pele i lo’u loto ma lo’u agaga, ma o i’ina na ou maua ai le mapusaga, ona o lo’u alofa ma lo’u naunau i si o’u tama, lea ua ou iloa nei ma ua manino le mata o le vai, e le o lo’u tama na mafua ai ona toe alu ‘ese lo’u tina, a’o tulaga lava tau i aiga tupu i totonu o Peretania.

 

“Mama, Mama, o fea ea oe, ua ou mo’omia lava oe i lenei taimi, ua leai se tasi ou te fa’amoemoe i ai, amuia isi tama teine, o lo’o mafuta pea ma o latou tina, amuia isi fanau teine o lo’o mafanafana pea i le alofa e tu’u atu e o latou tina, amuia fo’i nisi teine o lo’o maua le fiafia, a’o ita nei, ua naumati lava o’u lagona, ona ua ou misia lava oe lo’u tina.”

 

Na fa’asolo fa’asolo lava o’u mafaufauga i’u lava ina ou moe ifo ai lava, ua ou le mafai ona tatali le vaivai o lo’u loto i le taimi. Na ou le iloa nei se mea e tasi, ona ua alu fa’asolo atoa a’u miti, na amata i totonu o Peretania, tami ane i tuapa o Ierusalema, ae fa’ai’u ane i Amerika i le malo o lo’o nofo ai lo’u tina moni, ae o le mea e malie ai, o le taunu’uga o a’u miti o foliga ia o Tino.

 

 Na fa’ate’ia a’u miti malie i le tu’itu’i atu o le faitoto’a, ua ou tau nofo a’e nei i luga ma ou tilotilo loa i fafo, ma ou va’ai atu, ua matua’i pogisa atoa le mea. Ua ou tau mafaufau nei, po’o le mea ua o’o i le isi aso pe a, aua o mea ia e tutupu pe afai ua ta ala a’e ua po. O lona uiga, ua o’o i le taimi e fai ai la ma mea’ai ma si o’u tina tausi o Ana.

 

“Averia, Averia, nofo i luga, ua pogisa le mea, o le a e saga moe lava ua o’o i le taimi e fai ai le ta mea’ai, nofo mai i luga.”

 

Na ou tu a’e nei i luga, ma ou manatua ai, o o’u ofu lava ia na ou alu ai i le a’oga, o lea lava e pipi’i i lo’u pau. Na fa’apea ifo nei o’u manatu, se o le lo’omatua lenei se, ua fai ma fa’alavelave i lo’u olaga taumafai.