Ads by Google Ads by Google

Fagogo: Alofa, se ia tiga

Vaega: 39

 

Fa’afeilo’ai atu i le mamalu o le atunu’u ae maise o le au faitau i lenei taeao fou, malo le soifua malo fo’i le onosa’i i faiva ma tiute o lo’o feagai ai i lenei aso. Ae alo maia, o le a toe fa’aauau atu la tatou tala fa’asolo mo lenei aso.

 

Ina ua ma’ea la’u a’oga i lea aso ma ua ou toe fo’i i le fale, sa ou lagona lava le fiafia o lo’u loto ina ua ma feiloa’i ma Tino. E ui lava i nisi itu sa ou manatu i ai peita’i, sa ou lagona lava le fiafia, ona ua i ai se tasi ma te talatalanoa ma ma fetufa’ai i totonu o le aoga. Na ou va’aia le sagisagi fiafia mai o si o’u tina tausi o Ana i lo’u taunu’u manuia i  lo ma fale, sa ou tali atu i ai ma lo’u loto fiafia i lea taimi.

 

O le sagisagi mai a Ana ia te a’u, ona ua fa’atoa mae’a lava ona talatalanoa ma lo’u tama, ma ua uma fo’i ona alu i ai le lipoti fa’alupelupeina a le lo’omatua e uiga i lo ma nonofo ai, ae maise lava o la’u a’oga lea ou te taumafai i ai.

 

“Averia, ua tu’ua mai lau a’oga, ia sau loa, o lea ua ma’ea ona ou faia le ta vaiinu, e manaia lava e fetaui lelei ma lou mana’o.” Ua ou ‘ata’ata ma ou a’apa atu ua fusi mai si o’u tina sa tausia a’u i aso ma tausaga e tele o lo’u olaga.

 

O a lava mea ua tutupu nei i totonu o lo matou aiga, ua ou taumafai e fa’agalogalo ae se i ou liliu atu e fa’atino le mana’oga o si o’u tama, ia maua lava lo’u fa’ailoga maualuga i le a’oga fa’aloia lea ua ou i ai nei. O le tele o taimi ou te su’esu’e lava i a’u tusi a’oga, ua ou taumafai fo’i, ia ‘aua lava ne i fa’aalu seseina so’u taimi. Ua ou savali nei i totonu o lo’u potu, ae ou fa’alogologo mai o lo’o alu atu le pese a si o’u tina o Ana, “Londons burning, Londons burning, fire fire, ua alu ai lava fa’apena le pese a le lo’omatua e leai ni nota e fa’aalu ai. Ua ou ‘ata ma ou tu i luma tonu lava o le fa’amalama lea ou te iloa lelei atu ai le toga la’au matagofie lea e galue ai nei Ana e fa’aalu ai lona taimi.

 

Na ou tu tu lava, te’i lava ua o’o o’u mafaufauga i le tama o Tino, ua ou le toe manatua ai lava se isi mea i lea taimi, aua ua alu nei lo’u mafaufau ia Tino. Ua ou ‘ata’ata ma ou fa’apea ifo, “Ia o lea la, na tuli mai nei e le tama e sau e su’e le tikeri fa’aloia, ae o lona uiga, o le a ‘ese le tikeri lea o le a maua.” O o’u mafaufuaga ia na te’i ai lava ua le mafai ona tatali lo’u ata i lea taimi.

 

Ua ou toe manatua nei, ta fefe ae iloa e lo’u tina tausi le mea lea ua tupu ia te a’u, ae na ou fa’apea ifo, e leai, o le a faifai lemu lava si mea ia ‘aua ne i iloa e Ana. Aua ou te talitonu, afai ae iloa e le lo’omatua e muamua ta’u e Ana i lo’u tama, ona so’o ai lea ma le fa’atamo’e o a’u i le lua i le fa, ona le aoga lava lea o mea uma.

 

Na ou liliu nei ma ou toe tilotilo atu i le toagala’au matagofie i lea taimi, ma ua fa’asolosolo o’u mafaufauga i lo matou aiga, ae maise ai o o’u mafaufauga ua lolofi mai e uiga i si o’u tina moni na ou iloa ai le matalasi o le lalolagi nei.

 

Na ona tau lava o o’u mafaufauga i si o’u tina o Makerita, te’i lava ua lagona le vaivai o lo’u tino ma lo’u mafaufau i lea taimi. Ua ou toe manatua uiga o Makerita ma lona le alofa ia te a’u, ae ui lava i lea itu, ae sa ou mana lava le mafanafana o lo’u loto ma lo’u mafaufau, ona ua ‘auga e tasi mea uma, a i’u manuia la’u a’oga, ou te alu lava e su’e lo’u tina i Amerika.

 

E faia pea