Vaega: 39

Fa’atalofa atu i le mamalu o le atunu’u ae maise o i latou o lo’o fiafia pea e faitau i la tatou tala fa’asolo i lea aso ma lea aso. E i ai le fa’amoemoe, o lo’o maualuga pea le alofa o le Atua e ala lea i lou soifua manuia i lea aso ma lea aso. Ae alo maia, o le a toe fa’aauau atu la tatou tala fa’asolo, Alofa, se ia tiga.

Alofa, o se upu e ‘ese le malosi, o se upu fo’i e matagofie pe afai o lo’o tatou fa’atinoina mo o tatou uso a tagata i lea aso ma lea aso. O le alofa na te lavatia mea uma, o a lava fa’afitauli, o a fo’i tiga e o’o mai ia i tatou, a tatou manatua lenei upu, ona pei lava lea e fofoe ‘ese ia tiga uma. Fai mai le upu, a leai ni puapuaga, ma ua oge fo’i i faigata, o lona uiga ua leai se alofa.

O puapuga ma faigata e o’o mai i lo tatou soifuaga fa’ale tagata, o iina e mapu’e a’e ai fa’ala’au mafala le alofa o le tagata. Aua fo’i, o taimi o puapuaga ma faigata o le soifuaga nei, o iina fo’i e mafai ai ona fa’atino lo tatou alofa mo se tasi ua mo’omia le fesoasoani. O le alofa, e tupu a’e i totonu o le loto o le tagata, na te au maia fo’i le filemu i le loto o le tagata, aua a aunoa i tatou ma le alofa, ua leai se aoga o mea uma tatou te faia. Ia e alofa atu, se ia o’o ina tiga, ia e alofa atu pea ma saga alofa atu pea, ona tauia mai lea e le Atua o mea uma mo oe. Alofa atu e aunoa ma sona toe fa’atalitali mo se taui, ona fa’amanuia mai lea o le Atua i lau foa’i ma fa’ateleina mea e te maua i ou lima. Ona o tatou manatua ai lea o upu mai afio’aga a le Atua, “E moni e mulimuli mai ia te a’u le agalelei ma le alofa i aso uma o lo’u ola.”

Ua ma talatalanoa nei ma le ali’i o Tino, ma na ou iloa ai, o se tagata e atamai, o se tagata fo’i e tau sa’afia ona uiga, ma o se tagata fo’i e ola fa’aaloalo.

Ta te iloa gofie lava le tagata i ona uiga fa’aalia, ma o uiga sa fa’aali mai e Tino ia te a’u, sa ou mautinoa ai le ituaiga tagata e i ai lona tagata. Ma sa ou molimau ai fo’i, o se tagata sa a’oa’oina lelei e ona matua, o se tagata fo’i e mafuta lelei ma ona matua. A ou fa’atusatusa atu i ona tausaga, pe a i le tolu tausaga e matua ai ia te a’u, o ana fa’amatalaga fo’i ua ma fetufa’ai ai nei, na ou iloa ai o se tagata e atamai. Na ou tau fa’alogologo atu nei i le sau o lana tautala fa’ainilisi, e ‘ese mai i la’u fa’aleoga o upu, ona ou fa’apea lea, po’o fea e sau ai, ona e ‘ese lava lona fa’aleoina o upu.

Ua fa’asolosolo nei le ma fetufa’aiga i lea taimi, ae sa mamao lava ma lo’u mafaufau nisi tulaga e pei ona fautua mai ai lo’u tina tausi ia te a’u. Ua ma talatalanoa nei i mataupu o lo’o ia tauaveina i totonu o le a’oga, ma ua ma toe talanoa fo’i i nisi o mataupu o lo’o o’u taumafai atu i ai ina ia pasia ma i’u lelei.

Na ou manatua vave i lea taimi le fa’aupuga fo’i lea, e le sua se lolo i se popo e tasi, o lona uiga, e mo’omia e le tagata se isi tagata e fefa’asoa’ai ma  fetufa’ai i manatu ma mafaufauga i mea lelei ma mea a’oga, e manuia ai taumafaiga a le tagata.

Na ou mata’ia pea lenei ali’i, ma ou fa’alogologo i lana tufa mai ia te a’u, na ou iloa ai fo’i o lona tausaga ona tolu lea i totonu o le a’oga. Ua fa’aauau pea le ma fetufa’aiga ma Tino, ma ua lagona lava le fiafia o lo’u loto, ona ua i ai se tasi ma te talatalanoa ma fesoasaoni mai ia te a’u. Na fai nei la ma tonu, ma te toe feiloa’i i lalo o le la’au lenei i le aso e soso’o ai. Na fa’alogoina le tatagi mai o le logo, ma ua ma tula’i loa i le taimi ma ma savavali loa, na a’apa mai nei Tino ma u’u lo’u lima, “Averia, fa’afetai mo lo’u avanoa ua ta feiloa’i ai, ta toe feiloa’i i le manuia i le aso a taeao.

E faia pea