Ads by Google Ads by Google

Fagogo: Alofa, se ia tiga

Vaega: 24

 

Na ou tilotilo atu nei i lo’u tama, ae ua fa’agasolo pea lana tautalaga i lea taimi, na ona fa’ailoa lava e lo’u tama o lo’u igoa, ua alu le patipati a tagata faigaluega. O le isi itu na fa’ateia ai a’u, ona ou te le o iloaina o so’u igoa atoa lea, ao lea ua fa’atoa o’u iloa nei, ina ua folasia e lo’u tama i luma o tagata faigaluega.

 

Na ou tula’i nei ma ou ifo atu i tagata faigaluega i lea taimi, ae o lo’o mata’i mai lava a’u e le toeaina lea ua matou nonofo fa’atasi atu nei ma lo’u tama. Ua tau oso o’u masalosaloga pe o le mea ea o lo’o tau fai mai ni manatu o le toeaina ia te a’u, pe a, ona o lea ua matua’i usi lelei mai lana maimoa ia te a’u, ae ua tia’i le tautalaga a lo’u tama lea o lo’o fai nei.

 

O lo’o fa’aauau pea le folasaga a lo’u tama i lea taimi, ma i lo’u mafaufau, atonu o lo’o mata’i mai fo’i e tagata faigaluega ia le gaoioiga a le toeaina lea ua fai mai nei, ua matua’i usi lava lana maimoa i lea taimi.

 

Na ou iloa i lea taimi le tilotilo mai uma o tagata faigaluega ia te a’u i lea taimi, ua ou popole nei, ona a leai se tala na fai mai e lo’u tama ia te a’u, a’o lea ua ia folasia i luma o tagata faigaluega lenei tulaga, ae ou te le i sauni i ai. Na ou tilotilo atu nei i lo’u tama, ae ua le tilotilo mai ia te a’u ae fa’aauau pea lana tautalaga i lea taimi.

 

“Ua uma ona outou silafia, o lo’o i ai la’u fanau tama e to’alua o Peteru ma Ioane, ae o i la’ua e laiti, a’o Averia e matua, o le ala lea ua fai ai la’u fa’aiuga, o Averia o le a tula’i mai na te tauaveina mea uma e sui tulaga ia te a’u, i se taimi oi luma.”

 

“Ua i ai fo’i lo’u manatu, o le aso, o le a sainia ai e loia mea uma, ma tu’u atu ai le malosiaga ia Averia, na te fa’atautaia mea uma, pe afai ua o’o i lona taimi e fa’atino ai.”

 

A’o fa’asolo pea le tautalaga a lo’u tama, ua matua’i mamao lava ma lo’u mafaufau lea tulaga, ona ua ta mau i lo’u loto ma lo’u mafaufau, ia ou tapena e sa’ili lo’u fa’ailoga fa’apitoa fa’aloia, ona ou toe fo’i ane ai lea, e fai le mea o lo’o mana’o i ai lo’u tama.

 

Na ou feiloa’i atu nei i le to’atele o tagata faigaluega, ma o le latou tala mai ia te a’u, e ‘ese le lelei o lo’u tama o se tagata e fa’amuamua ana tagata faigaluega, o se tagata fo’i na te faia fa’aiuga e maua ai le loto malie, o se tagata e loto alofa ia i latou.

 

Na ou liliu atu nei ma ou tilotilo atu i si o’u tama lea o lo’o fai mai le latou talanoaga ma tamaloloa nei, le Komiti Fa’afoe, ma ou iloa atu ai, o lo’o fiafia lava, na ou toe tilotilo atu i le isi itu, o lo’o fa’atasitasi mai ai lava nai tama’ita’i pe toetiti lava tutusa o matou tausaga.

 

Na ou savali atu nei ma ou feiloa’i atu i ai, na fa’ateia a’u ina ua ou o’o atu, ae ua leai se tasi na toe tautala i lea taimi, ae ua tilotilo mai nei ia te a’u.

 

“Talofa lava Averia, po’o a mai oe, a’o fea o i ai lou tina o Makerita.”

 

E faia pea