vaega 1

[E fa’atalofa atu i le mamalu o le aufaitau i lenei vaiaso, malo le onosa’i, malo fo’i le soifua laulelei, ae alo maia, o le vaega muamua lenei o le tatou Fagogo fou ua fa’aigoaina, “Alofa e oo i le oti.” Ua manatu e saunia lenei fagogo mo le fa’amalieina ai o lau faitau i faaiuga o vaiaso ta’itasi, a’o fa’aauau ai le tautua a le To’asavili mo oe le atunuu pele.]

O le ali’i o Veli, sa nonofo ma lona to’alua o Tania i le aiga o le fafine i Upolu, ma o se aiga na fa’avae i le Atua mea uma mai lona amataga, seia oo loa ina ma’i le fafine o Tania i se gasegase mata’utia ma le faigata, ma manatu ai loa le to’atele o tagata o le nuu, ai nei a toe sola le tamaloa o Veli i Savai’i i lona aiga ona o tulaga faaletonu ua i ai le gasegase o si ona to’alua, ae le i fa’avaivai ai le alofa o le tamaloa, sa nofo pea i le aiga ma tausi i lona to’alua.

E taunu’u Veli ma Tania i le aiga o le fafine i Upolu, fa’atoa 2 tausaga talu ona mae’a le la fa’aipoipoga, e leai fo’i se la fanau o i ai, o le taimi lea, o lo o tutusa uma le ulugali’i i le lalelei ma le talavou o la olaga. O le lua tausaga lea na nonofo ai le ulugali’i i Savaii i le aiga o le tamaloa, sa avea ai lo la aiga o se aiga e tua i ai le nuu atoa i le ma’umaga, ona o le galue malosi o Veli i le fa’ato’aina o le fa’atoaga e tausi ai si ona aiga, aemaise si ona tina matua sa totoe i le aiga, faapea ai si ona tuafafine ma lona toalua o lo o tausia le aiga.

“Sau ia oe le kuafafige, ua ou lagoga ua kakau oga ma malaga ma Kagia i Upolu e kausi gai oga makua, ua makukua fo’i si koeaiga ma le olomakua, o lea ua i’u le soifua o si kakou kiga sa kakou kausi faakasi ai, ou ke kalikogu fo’i, o lea ua kaoko le kakou faakoaga kele i le mauga, faapea ai le pa pua’a e kua i ai oe ma le fagau, a i ai fo’i se isi mea e maga’omia ai a’u, oga logo aku fo’i lea ae o’u koe sau e fesoasoagi aku ia oulua ..” o le talatalanoa atu lea a Veli isi ona tuafafine matua o Lupe ma lona toalua i le isi po, ma sa talia ma le loto fiafia e le ulugalii le manatu o Veli, ma sauni ai loa le ulugalii e malaga atu i Upolu i le aiga o Tania e tausi ona matua o lo o nonofo i le aiga.

O Tania, o le ulumatua lea a le ulugali’i, o se tama’ita’i lalelei, e le taitai fa’atusatusa i ai le auleaga o le tamaloa o Veli. Sa galue Tania o se tama’ita’i tausi ma’i pasi i le falema’i o Moto’otua, ma masani atu ai iina ma Veli i le taimi a’o tausi ma’i Veli i le gasegase a lona tama, ma i’u ina nonofo ai loa ma amata ai le la aiga i Savaii mo le ulua’i lua tausaga. Ua salalau le tala o lea ua sauni Tania ma lona to’alua mai Savai’i e toe fo’i atu, ma ua tuli mata’i fo’i le vaavaai a tagata o le nuu i le taunuu atu o le ulugali’i fou, aemaise ai e fia vaai pe faapei i le tagata e igoa ia Veli, aua e le i vaai lava le nuu i le to’alua o Tania.