[E fa’atalofa atu i le mamalu o le aufaitau i lenei vaiaso, malo le onosa’i, malo fo’i le soifua laulelei, ae alo maia, o le toe faaauauina lenei o le tatou tala fa’asolo, lea na gata mai i le vaiaso na te’a nei i le taimi lea na fa’alogo atu ai Veli i upu o lo o talanoa ai Tania i luga o le telefoni.]

Na pei o ni uaea eletise e sipaka ai le tino o Veli ina ua taia lana fa’alogo i le tala lea a Tania o lo o fai i le taga lea la te talanoa i le telefoni, ona manatu lea o le tamaloa, o le taxi lea na feliua’i i luma o le fale i le taeao, lea fo’i sa la toe fetaui i le taimi na toe fo’i atu ai i le fale, o le taxi lea tonu lea na alu ai le ti’eti’ega a Tania i le taeao. Na tu le tamaloa mo ni nai sekone i tua o le faasee o le fale sa lafi ai, ona toe savali ese mai lea ma laa atu loa i le la faleoo ma nofonofo ai. Ua le iloga se vaipanoa o le lalolagi e tau solo ai le mafaufua o Veli, ua mafaufau i lona aiga i Savaii, ona toe mafaufau lea i le olaga pologa lea o lo o ola ai nei, faasolo atu ai ona mafaufauga i le la aiga ma Tania, ae fa’ai’u lava i ona mafaufauga pe afai ae nofosala i le falepuipui i Tafaigata mo le olaga atoa.

Na motu faafuase’i mafaufauga a le tamaloa ina ua toe tau lona mafaufau i le ma’umaga lea sa ia gaoia i le po o le aso Toona’i, ona o le tau su’eina o ni meamata e fai ai se umu a le aiga, lea ua maua atu ai ma le sua a le faifeau, ona maligi lea o ona loimata ma faapena ane i lona loto, “kafefe ae iloa a’u e kagaka e aga le ma’umaga, e le iloa pe ke’i ua fasioki aku ai ma a’u, ae le o iloa mai e Kagia le mafakia o lo’u loko ao legei e foliga mai e kaalo mai i lo’u olaga ...” Ua uma ona sui ofu lotu o Tania na faafoliga ai e alu i le lotu i le taeao, ona aapa lea i totonu o le ato o le umu ma uu mai lana talo ma le palusami, ona savali loa lea i le la faleoo lea o lo o nofonofo mai ai si ona to’alua.

“O ai lava lega fafige e ke mafaufau ko’akasi i ai i legei kaeao?”, o le fesili fia malie lea a Tania ia Veli, ae na te’i ina ua ia vaaia foliga fa’anoanoa o le tamaloa e foliga mai sa tagi, ona sosoo atu lea o Tania i tafatafa o si ona to’alua ma pa’i atu i lona tauau, ona ia fesili lea i ai i lona leo malu, “Veli la’u pele, e i ai se mea ua tupu ua mafua ai ona e mata fa’anoanoa, ua ou vaaia e foliga mai e i ai se mea matuia ua mamafa i lou loto i lenei taeao?” E fai lava tala a le fafine o Tania ma sosoo atu ua popo le tauau o si ona to’alua ma taumafai e fa’asufi le tamaloa ina ia talanoa atu, ae o Veli i le taimi lea, ua atili ai ona maligi ona loimata i le mafatia o lona loto, ua atili ai fo’i ina ua tau lana vaai i teuga a lona to’alua o lo o fai i lea taeao, ua atili ai ona pupula le lalelei o le fafine o Tania, atonu o le mafua’aga lea ua mafua ai ona naunau atu le alii ave taxi e piki lona to’alua ma fa’ati’eti’e, ai ona o le lalelei o le fafine toe laumata fiafia, ae na muta fa’afuase’i le tagi a Veli ina ua tau atu lana vaai i le taulima filifili auro o lo o pipi’i mai i le lima o Tania, faapea ai ma le mama.