[E fa’atalofa atu i le mamalu o le aufaitau i lenei vaiaso, malo le onosa’i, malo fo’i le soifua laulelei, ae alo maia, o le vaega lua lenei o le tatou tala fa’asolo, lea na gata mai i le vaiaso na te’a nei i le taimi lea na tuli ai e le tamaloa lea ua nonofo nei ma le tina o Tania le tamaititi e aami Veli ma Tania o lo o momoe i le faleoo.]

E lei tali Veli i se upu ina ua uma ona fai atu e le tamaititi le poloa’i, sei vagana ai ona mata ua pupula lautetele ma lona loto ua amata ona oso a’e i luga lona ita. Ua fa’asaga Veli ia Tania o lo o taoto ona tago lea ua eu eu lona tauau ma ta’u i ai le feau na alu atu ma le tamaititi, ae na te’i Veli ina ua fa’alogo atu ua toe fesili le tamaloa i le tamaititi, “Ua a le feau ga e alu ai”?, ae na tali le tamaititi, “Papa, e fiu lava e fai aku i le kamaloa ae le kea mai lava”, o le tala lea a le tamaititi na pei ai o le Leona feai le tamaloa o Fulu ma tu sasae ai loa i luga ma savali aga’i atu i le fa’amalama o le umukuka lea e fa’afesaga’i ma le itu tonu o lo o i ai le faleoo lea e taotooto mai ai Veli ma Tania, ma valaau leotele atu ai i le tamaloa o Veli e fa’avave atu ona vae i le feau.

“Sole!, eke ulavale ma au faiga e fai mai ia ke a’u, ah?” o le fesili lea a Fulu ma lona leo ua logo atoa ai le pito nuu ma ona mata lapopo’a toe toe a tuli oso mai i fafo, ae o Veli i le taimi lea, sa na o le punou lava ma fa’alologo ona taliga i le ote a le tamaloa, na te le iloa fo’i po o ai lea tamaloa ua soona leo tele atu ia te ia, ae lei talanoa atu lava Tania e i ai sona tama i Palisi. “O ai lou puaa eke sau ma e fa’aali mai ai lou fia kagaka iigei, aua lava ge’i e sepu mai i le kakou mafukaga, e le kukusa uma kagaka, ua e fa’alogo mai”, o le toe avaavau atu lea a Fulu ia Veli na ea a’e ai loa i luga le ulu o si tamaloa o lo o punou i lalo ma fa’amalulu i le ulugali’i ona o le sese o le tala na sau ma le tamaititi, aemaise ai e lei umi se taimi na alu atu ai le poloa’i ma le taimi lea ua la taunuu ane ai i le fale. A o tautala si tamaloa o Veli, sa na o le punou o Tania i lalo ma lulu lona ulu, i le le talitonu o lona mafaufau i mea ia ua ia vaai atu ai, ae maise ai o le faiga o si ona to’alua lea ua fai ai e lona tina ma lenei tamaloa na te le iloa po o ai.

“Vaai oulua ali’i Kagia ma lou ko’alua, e kakau lava oga moku le pa a ua iloa e pei o upu a le akuguu, iga ge’i fesili oe si a’u kama Kagia po o ai legei kamaloa ua sooga avaavau aku i le kamaloa ga e sau ma aumai i le kakou aiga ..” na motu fa’afuase’i le tala a le olomatua ina ua fa’asalavei le tamaloa o Fulu ma fa’apea atu lana tala, “E a lau fa’amakalaga Siaula, loga uiga o lau kala e le o iloa e Kagia a’u?”, o le fesili lea a Fulu i le olomatua ma fa’asaga atu i ai. “Fa ika ga e kalagoa mai ia ke a’u i le isi po ua uma ona iloa e lau kama le kulaga lea ua i ai lo ka aiga, e le koe ka’u esea fo’i a’u e lau fagau, o a’u lava o le lakou kama, e fa’apega fo’i ia ke a’u, e le koe kau esea fo’i gei kamaiki o lakou uma lava o la’u fagau ...”