Ads by Google Ads by Google

FAGOGO: ALOFA E OO I LE OTI

E toe fa’atalofa atu i le aufaitau i lenei aso, faamoemoe sa outou maua se vaiaso manuia i feau ma tiute masani, ae alo mai loa, o le toe sosooina lenei o le tatou talafaasolo lea na gata mai i le vaiaso na te’a nei i le taimi lea ua tau fai fetagisi ai fafine o le aulotu ma Tania ina ua latou iloa, ua oti Veli.

 

E le i taitai lea afiafi ae ua soo tulimanu e fa o le nu’u, ua maliu Veli i le falema’i i Motootua, e mafua mai i le fa’alavelave lea na fasi ai o ia e le kamaloa o Ekeuaki ma lana fanau, ina ua masalomia lona gaoiina o le latou ma’umaga toe fa’aleaga a latou mea fafaga sa tausi ai i le Talaloa. E malu ane lava le afiafi ae o lo o fai lava le lau aitu i luma o le fale o le aiga, ma ua vaaia fo’i le amata ona tumu tumu atu uo ma aiga aemaise ai tagata o le nu’u e talatalanoa ma fa’amafanafana i le fafine o Tania ona o le mea ua tupu, ae i le loto o le fafine i le taimi lea, tasi lava le mea o lo o i lona mafaufau, o le malaga i Savai’i e logo le aiga o Veli e tusa ai o le fa’alavelave. Talofa i moomooga sa faananau i ai Tania mo le lumana’i o le la aiga, le tagata sa fa’alagolago i ai lona lima vaivai ma lona mativa, na te fesoasoani ma atina’e lo la aiga, ae paga lea, ua sola fa’asulusulu si ona to’alua ina ua satia e tagata o le nu’u, e mafua mai i le tau sailiina o se meaai mo laua ma ia ma lona aiga.

 

O le lua o aso talu ona taoto Veli i le fale maliu i Motootua, na tapena ai loa le malaga a Tania mo Savai’i i le aiga o Veli. O tupe sa lafo mai i lona aiga i Niu Sila ma Ausetalia, o lea ua tapena ai lana malaga ma le fa’amoemoe, e tali leleia lona taunu’u atu e le aiga, aemaise ai o lea e alu atu ma le tala fa’anoanoa. “Suga Kagia, fa’akoa ou koe vaai aku lava lea ia oe, ao fea Veli?”, o le fesili lea a le isi fafine o le nu’u o Veli ina ua vaai i le fafine o Tania i luga o le uafu, peita’i sa na ona ata lemu atu lava o le fafine ma tali atu i ai, “o Veli ua alu, a o a’u lea ua sau e sui tulaga ia te ia i lona aiga”. E fai lava tala a Tania ma savali ese atu ma fafo o le va’a, ma fa’asasa’o atu loa i le itu o lo o paka mai ai pasi e alu i le itu Asau, le itumalo o si ona to’alua.

 

E malu ifo loa le afiafi ae afe loa le pasi a le ali’i o Poe i le auala galue e alu i le nu’u o le tamaloa o Veli, o le malaga mulimuli lava fo’i lea a le pasi i lea afiafi. O le fale o matua o Veli e tu matilatila lava i le ogatotonu o le nu’u, so o se tagata lava e afea le fale o le aiga, e iloa uma mai e isi aiga o le nu’u, o le tulaga la lea na tula’i mai i le aso lea, na fa’ateia matua o Veli ina ua latou vaaia le pasi moe a Poe ua tu i luma o le latou fale, ma latou vaaia ai se tagata ua oso i lalo o le pasi ma ana ato ta’ita’i e lua. “Pei uma lava o Kagia le kagaka la le ua oso i lalo ma le pasi”, o le tala tau matemate lea a le tina o Veli, le olomatua o Meleseke, “pei lava ga o Kagia lea ou ke vaai aku i ai, ae po o fea si a’u kama o Veli”, e fai lava tala a le olomatua ma aapa atu ua toso mai lona miti afu o lo o tautau i le vae o le nofoa, ae fetaui loa fo’i ma le taunu’u atu o Tania i le fasitepu o le fale.