E toe fa’atalofa atu i le aufaitau i lenei aso, faamoemoe sa outou maua se vaiaso manuia i feau ma tiute masani, ae alo mai loa, o le toe sosooina lenei o le tatou talafaasolo lea na gata mai i le vaiaso na te’a nei i le taimi lea ua fai atu ai le folafolaga a Tania isi ona to’alua o Veli ua maliu, o le a ia sailia le tagata na mafua ai ona maliu

E savali fua Tania ae o lona fatu atoa o lo o taooto ma Veli i luga o le moega o le falema’i, ua pei o se tagata ua leai se fa’amoemoe, e savali le tino ae ua leai ni mafaufauga lelei o toe maua, ua sola manatu lelei, ua pei o se atigi tagata lea o lo o savali, ma ua savali fo’i i le savali a le tagata e leai se fa’amoemoe, e le iloa fo’i po o fea o le a savali aga’i i ai. E fetaui lava le oso mai i fafo o le foma’i mai lona ofisa, ae ona vaaia loa le faitoto’a pito i fafo o le falema’i ua tapuni mai, ma le tua o le tagata o lo o u mai o lo o savali, na ia iloa ai, o le fafine lea sa i totonu o le potu o lo o i ai le gasegase ua maliu, o lea na toe tamo’e atu ai loa lea o le foma’i ma tatala le faitoto’a ae valaau atu i le fafine, “Tina! Tina! Tina!”, o le valaau atu lea a le ali’i foma’i ia Tania, ae o le fafine i le taimi lea, na te le i toe lagonaina se mea i lea taimi, ua pepe uma musele ola o le tino ma le mafaufau, pei o se tagata ua leai se fa’amoemoe. Na toe toe tamo’e atu le foma’i ma po po le tauau o le fafine, o lea na te’i ai ma toe fa’asaga mai i tua, ma vaaia ai e Tania le foma’i o lo o tu atu.

“E i ai se isi mea e ke maga’o ai, e mafai oga e koe fa’aola mai lo’u ko’alua, a ea, fai mai sau kala?”, o le avaavau atu lea a Tania i si ali’i foma’i, ae ua na o le tu o le foma’i ua leai se isi upu e toe gagana ai, ina ua ia lagonaina lagona mafatia ma le fa’anoanoa ua feagai nei ma le fafine. E le i gagana le ali’i faifeau i se upu, ae se’i vagana ai lona aapa atu ua uu mai le lima o le fafine ma taumafai e ta’ita’i ina ia la toe fo’i i totonu o le Ofisa, ae o Tania i le taimi lea, ua le mafai ona ia toe iloa atu le foma’i ona o le maligi fa’avai ifo i lalo o ona loimata. O le alofa o le fafine i le malolosi o ana upu ua lafo i le foma’i na mafua ai ona ia usita’i e savali ma la toe savavali to’alua atu loa i totonu o le Ofisa o le ali’i foma’i.

“Vaai oe, aua ete fa’anoanoa, loto tele ma ia e maua le fiafia, e ui i le matuitui o le tulaga ua o o i si ou to’alua, ae ou te augani atu ia te oe le faletua, ia e maua le loto tele mai le Atua ona o lenei taimi faigata o le lua mafutaga ua oo i ai, i le motusia fa’afuase’i o le mafutaga ma si ou to’alua ...” o upu fa’alaeiau fa’aumiumi ia a le ali’i foma’i na tau maua ai sina to’a i le mafaufau o le fafine, ma amata ai loa ona taumafai le ali’i foma’i e avatu ni ana fautuaga ia Tania, i le auala e ao ona ia uia ina ia maua ai sina taui tupe mo le maliu o si ona to’alua, ona o le fa’alavelave fa’afuase’i lea na a’afia ai o ia ma ua mafua ai ona maliu, ae leai se isi e tausia o ia aemaise ai fo’i matua o si ona to’alua o lo o fa’atali mai Savaii.