E toe fa’atalofa atu i le aufaitau i lenei aso, faamoemoe sa outou maua se vaiaso manuia i feau ma tiute masani, ae alo mai loa, o le toe sosooina lenei o le tatou talafaasolo lea na gata mai i le vaiaso na te’a nei i le taimi lea na te’i ai le foma’i ina ua fesili atu i ai Tania po o a mai lona to’alua o Veli.

 “E i ai se mea ua tupu i lo’u to’alua ua mafua ai ona e le tali mai?”, o le fesili ita lea a Tania i le foma’i ma ona mata ua amata ona faapupu tetele. “O e manatu mai ea i le mea lea ou te fai atu ai lau susuga pe leai, o a mai si o’u to’alua o lo o i totonu o le potu tigaina lea?”. Ua tu le foma’i mo ni nai sekone e le gagana, se’i vagana ai lona fa’atau pupula atu i foliga o le fafine lea o lo o la talanoa, ma ia vaaia ai foliga popole ma le le mautonu i ona foliga, e pei o se tagata ua alu le vaiaso o feagai ma ni faanoanoaga.

“Tama’iata’i, ou te vaai atu ua leva tele ona e mafatia, e atagia mai lava i lau fesili atoa ai ma ona foliga, ae vaai oe, ta mapu atu i totonu o lo’u ofisa le la, se’i ta talanoa ai ma inu ai se ta ipu kofe, ua malulu fo’i le ea o le falema’i”, o le tali filemu atu lea a le ali’i foma’i ia Tania ma la savavali atu loa i totonu o le Ofisa, ae ua toe savali mai le foma’i i fafo ma tuli le tama ave ta’avale e fa’atau mai ni ipu kofe se lua ma ni sanuisi mo ia ma le fafine. E nofo fua Tania i totonu o le ofisa i le taimi lea ae o lona mafaufau o lo o ta’avalevale solo i totonu o le potu lea o lo o taoto ai Veli, i lona popole po o a mai si ona to’alua atoa ai ma manu’a tuga na a’afia ai lona ulu ina ua osofa’i e le ali’i tino tele na o atu i le latou fale.

“Ou te le i iloa o oe o se to’alua o le ali’i o Veli o lo o i totonu o le potu tigaina, ae malo lava le onosa’i, malo fo’i le lava papale i taimi faigata e tula’i mai ai fa’afitauli fa’apenei i totonu o aiga, pau le mea lea ua ou iloaina nei, fa’atoa iloa le tulaga tonu e i ai le gasegase o Veli pe afai ae mae’a togafitiga o lo o faia e le isi foma’i o lo o ma to’alua, ona o lea ua ou malolo mai, ae o le foma’i mai Sapani lea o lo o gafa ma le fa’aauauina o togafitiga o lou to’alua”, o le talanoa umi atu lea a le foma’i, ae o Tania i le taimi lea, ua naunau lava e fia o o i totonu o le potu o lo o taoto ai Veli.

“Malie tina, e le mafai ona e alu i totonu o le potu, leaga o lo o fai galuega a foma’i i le taimi nei, ae mafai ona e onosa’i pea iinei, se’i fa’atali atu ta ipu kofe o lo o alu le tama faigaluega e fa’atau mai”, o le toe talanoa atu lea a le foma’i, ae na te’i ina ua fa’apea atu Tania, “Pau lava le mea ou te fia iloaina, po o tulaga manuia mai si o’u to’alua, leaga e fai lava si matuia o le manu’a na a’afia ai lona ulu ina ua osofa’i e le aiga na o atu e fa’amisa”, e uma atu loa le tala lea a Tania ae la fa’alogoina loa ma le foma’i le e e leo tele mai o le masini i totonu o le potu o lo o i ai Veli, ma vaaia ai loa e Tania suiga i foliga o le foma’i, o lea na ia toe fesili atu ai i le foma’i, “O le a le mea ua tupu, o le a le la masini, se fa’amolemole ta’u mai, o le a le la masini”.