E toe fa’atalofa atu i le aufaitau i lenei aso, faamoemoe sa outou maua se vaiaso manuia i feau ma tiute masani, ae alo mai loa, o le toe sosooina lenei o le tatou talafaasolo lea na gata mai i le vaiaso na te’a nei i le taimi lea na fa’afuase’i ona tatagi ai i lalo tulivae o Liko ma fa’atoese loa ia Veli.

E le i uma lelei mai le fa’atoesega a Liko ae pasasa ai ma le kiki a Veli i le autafa ma pau atu ai i le isi itu o le paepae, ona aapa atu loa lea o le tamaloa i le amo o lo o ta’atia i tafatafa tonu o le vaega o lo o ta’atia ai Liko ua gagau lua ae fue ai le papatua o le tamaloa, ae o lana fanau i le taimi lea ua le iloa se mea e sulu solo ai tamaiti i le fia ola, ae o le latou uso matua lea na manu’a i le agaese na tulioso atu Tania ma lona uso laititi ua toso ese mai ae faanatinati atu i totonu o le fale ma togafiti ai manu’a o le ali’i, e fa’atali ai le taxi a Pegi lea ua toeititi taunuu atu e ave ai i le falema’i. “Liko, amata aku i le aso legei e oo i le fa’avavau, aua ge’i o’u koe fa’alogo o koe ku’ua’i e le kou aiga le kamaloa fai’ava legei i le gaoiiga o la oukou ma’umaga, ua e fa’alogo mai ou maka ga e pupula mai ..?” o le tala lea a Veli ma lona lima tusi toeititi tu i mata o Liko, ae na o le luelue ulu o le tamaloa i le fefe i le vaaiga lea ua ia vaaia.

Na taunuu fa’atasi lava le taxi a Pegi e ave ai le atalii matua o Liko i le falema’i, ma le Sipu uliuli a leoleo lea ua paka i luma o le fale, ma vaaia ai le tumu tumu o tagata i tuafale o le fale o le olomatua o Felila, ona fesili fia iloa lea o nai leoleo i le mea sa tupu, ae tali le olomatua o Felila, “e leai, o vevesi lava a kamaiki ae leai lava se mea kele o kupu, faamalulu aku ai ia ke oukou o malu o le malo”, e fetaui lava le uma atu o le tali lea a le olomatua o Felila e tusa ai o le fesili a le leoleo, ae tatagi loa ma le fa’aumu leotele lava i tua tonu lava o le umukuka, ma vaaia ai loa se tagata tino ese e soo uma lona tino i pe’a o lo o savali sa’o atu lava i le vaega le e nofo mai ai Veli ma lana fesili muamua sa fesili atu ai, “O oe lea o Veli, o le a le mea eke maga’o i ai”, e le i uma lelei le fesili a le tagata tino ese lenei ae lelea atu loa ma lana tu’i malosi ae na vave le alo a Veli ma misi ai le tu’i, ma sulu atu ai ma le tagata lenei i luga tonu o le paepae ma’a lea o lo o sa to’otuli ai Liko.

O le vave tele o gaioiga a le alii lea na mafai ai ona toe tu vave i luga ma toe aapa atu i le amo lea na sasa ai e Veli le papatua o Liko ma sasa ai le ulu o le ali’i o Veli ma manu’a tigaina ai le tamaloa, ae fetaui ma le taunu’u o leoleo ma pu’e fa’apagota loa Veli ma ta’ita’i atu i le pito i luma o le fale lea e tu mai ai le Sipi uliuli a leoleo ma velo ai loa si tamaloa i totonu a’o manu’a tigaina lona ulu i le gaioiga a le tagata tino ese lea. Na pei o le emo o le mata gaioiga a leoleo i le tau faatoa filemuina o Veli lea ua amata ona fiti i luga, ma tasi ai loa le tonu o le a momoli sa’o le tamaloa i le falema’i se’i siaki ona manu’a, E le i umi se taimi na tuu ai na o Veli i tua o le Sipi a leoleo, ae toe maua mai le tala ua fiu e fafagu Veli ua le toe ala mai i luga.