Ads by Google Ads by Google

FAGOGO: ALOFA E OO I LE OTI

Vaega 3

 

[E fa’atalofa atu i le mamalu o le aufaitau i lenei vaiaso, malo le onosa’i, malo fo’i le soifua laulelei, ae alo maia, o le vaega lua lenei o le tatou tala fa’asolo, lea na gata mai i le vaiaso na te’a nei i le taimi lea ua taunuu ai le pasi usu na malaga atu ai le ulugalii mai Amouta i le uafu i Salelologa.]

 

E fetaui le taunuu o le ulugalii i le uafu i Salelologa ae vaaia loa fo’i le va’a o le Amataga ua ofi mai i le uafu ma le uta o tagata ua matua tumu lava. “Sole, a’o fea o le a saga o i ai gei mau kagaka e leai lava gi mea magagaia i Savai’i gei,?” o le fesili fia iloa lea a le tamaloa o Veli, ae na iini e Tania le lima ma musumusu atu i ai, “O tagata mai Upolu o lea e faigaluega iinei, matua e fesili soo tele fo’i,” e fai lava tala a le ulugalii ma savavali aga’i atu i le vaega e fa’atali ai pasese ma la ato pa’u pei o ni tagata o lo o fuafua e malaga i Niu Sila. “Sole Veli, a’o fea o le a e usupo i ai ma ga mau akopa’u, e pei o sau sola’aga lega ua alu ali’i,” o le tala ata lea a le ali’i o Pinati lea e galue o se Leoleopo i le uafu i Salelologa, o le tamaloa o le nuu o Veli i Amouta. Na ata Veli ma savali lava ina ua ia vaaia Tania ua mamao lava i luma lana savali, ae na toe faliu lava i tua ma valaau atu ia Pinati, “Se mea leaga o le faiava, a ea Pigaki.”

 

E pei o se mea matamata i tagata malaga i lea taeao le ulugalii a Veli ma Tania, e fai o le aulelei pa’epa’e o le tama’ita’i, ae o Veli o le meauli ia toe auleaga, e le taitai fa’atusatusaina i ai le lalelei o le tama’ita’i. O amioga ua masani ai ni isi o le atunuu, e tiga lava ona pupula mai se tagata ae muimui lava ma fai ona ata.

 

“Po o gafea lava o le la kamaloa ga see i ai si la le fafige makua pa’epa’e aulelei ae se’i vaai aku ia i loga ko’alua o le mala papala le mea ..” o muimuiga ia a isi fafine e to’alua sa saofafa’i i luga o le isi nofoaga i le potu e fa’atali ai le pasese mo le aga’i atu i totonu o le va’a, ina ua fa’atoa nonofo lava i lalo Veli ma Tania e fa’atali ai le taimi o le malaga. Soo se mea lava e savavali solo i ai le ulugalii i luga o le uafu i lea taeao, sa pei lava o se mea matamata i tagata ona o le aulelei pa’epa’e o le tama’ita’i ae meauli si ona to’alua.

 

“Tago si a’u pele e uu uma atu ta ato pa’u ua ou le lava, ae tu’u mai le tama’i ato lena ou te uuina atu,” o tala ia a Tania ia Veli ina ua tula’i mai le isi Seila o le va’a ma fa’alauiloa mai, ua tatau ona aga’i atu le pasese i totonu o le va’a e le o toe umi se taimi ona alu lea o le va’a. “Veli, ae faafefea ona totogi ta pasese,?” o le fesili lea a Tania, ae na ata le tamaloa ma fai atu i ai, “Faakoa o aku lava Seila o le va’a e ao mai kupe pe a lakalaka i Apia.” O se malaga fiafia le malaga a Tania ma Veli, ua tulimata’i le vaai a le tama’ita’i i lona fia vaai atu i nai ona matua ma lona aiga atoa, ua tele tausaga o misia a’o aumai ai i le aiga o si ona to’alua i Amouta. E misi mea uma i le vaai a Veli ae o le la umi talo, luau ma le pua’a o lo o ave e fai ma la oso, e le taitai masepu i le vaai a le tamaloa ne’i oso ma se gaoi.