Ads by Google Ads by Google

Fagogo: Agelu a le Ali’i

Vaega: 12

Fa’amalo atu i lenei taeao fo’u, malo le soifua manuia, malo fo’i le onosa’i i feau ma tiute o lo’o feagai ai. Ae alo maia o le a toe fa’aauau atu la tatou tala mo lenei aso.

 O le fa’atauanau a Lea i le Atua ina ia foa’i mai se tama mo la’ua ma Maka, sa fa’afofoga mai ai le Ali’i, ma o le ala lea na fa’afeagai ai  le Ali’i ma le Agelu o le Alofa o Kapilielu, ma ia fa’ailoa ai le talosaga ua folasia atu e le tina ia Lea.

O le mafua’aga fo’i lea ua auina mai ai e Kapilielu ana Agelu ina ia tali atu i le mana’oga o le tina ia Lea. O a fo’i tulaga o lo’o i ainei, ae ua taga’i le Atua i le loto o Lea ma lona mana’oga.

 A’o fa’agasolo pea le fa’amasinoga a Maka, o le taimi fo’i lea o lo’o galue ai le Agelu a le Atua mo ia. O manatu ma mafaufauga lelei sa fa’aaupega ai e le Atua ia Maka, ina ia fa’amuamua pea le mea moni ma le tonu.

 O le taimi fo’i lea, o lo’o galulue fo’i Agelu a le Atua i le loto ma le mafaufau o le tina ia Lea, i le tu’u atu lea o le filemu ma le fa’amafanafanaga lelei ia Lea e ta’imua ai ona manatu ina ia fa’amuamua pea le Ali’i i mea uma na te faia.

Ua manava le galuega a le tina o Lea i lea aso, ma ua aga’i atu lana ta’avale i lo la fale, peita’i sa ia manatua i lea taimi e tatau ona alu i le fale o lana uo o Peka, e fai sa la tonu ona o lona manaoga e fia ave ia Lopeti l tama la’ititi a Peka la te tafafao i le fa’aiuga o le vaiaso. Ua toe liliu nei le ta’avale a Lea ma aga’i atu loa i le fale o lana uo o Peka.

Na alualu lava le ta’avale tei lava ua tau le mafaufau o Lea i tina e to’afa sa fananau ma ua ola a latou pepe i lea aso. Na iloa lelei lava e Agelu e to’alua ia olo’o ti’eti’e ma felelei solo i totonu o le ta’avale a Lea ia le tulaga lea. Na iloa atu nei e le Agleu numera tolu le maligi ifo o loimata o Lea. Ua tilotilo ane nei i le Agelu numera lua, ma ona mata ua fa’anoanoa lava.

O uiga fa’anoanoa o Lea, i lea taimi ua avea lea ma ala ua te’i ai lava ua fa’anoanoa ai ma Agelu i lea taimi. Na te’i lava Lea i le fa’alogo mai ua sui le pese i lea taimi. Na faapea upu o le pese a le Agelu lona tolu, “Taimi nei taeao, ou te iai iina, o mea uma sa e miti i ai ou te faia…:

Na fa’anonou ane nei i ai mata o le Agelu numera lua, ae ua alu lava i luga le leo o le Agelu numera tolu. “E te faia lava le mea e ‘otegia ai tatou e Kapilielu, e te va’ai atu lava olo’o fa’anoanoa Lea ae fai lava lau amio.”

E fai o le leo o le Agelu ua alu i luga, ae ua tau lavea ane le isu o si Agelu numera lua i faiga a le Agelu numera tolu. “ia o le a fai lava na o mea i luga ae le fai ma mea i lalo nei, lue lue mai ae soia ia e te ‘ote so’o ua pei oe o se matuamoa ua leai se si’usi’u.”

Ua na o le ‘ata o le Agelu numera lua ma tilotilo ane i lona uso ulavalelea. Na avea le pese na ki e le Agelu ma ala na te’i ai lava ua fa’alogo atu ua pese mai fo’i ma Lea i lea taimi.

Ua atili ai nei ona alu i luga le leo o le Agelu numera tolu, “Taimi nei  taeao… ou te iai iina… o mea uma sa e miti i ai ou te faia…"

E faia pea…