Vaega: 81

Fa’amalo lava le faitau i le mamalu o le atunu’u, e i ai pea le manatu o lo’o sologa malie pea le fa’atinoina o faiva ma tiute i lenei aso, ae maise ai fo’I o le alafa’i o le atunu’u i fanuga lelei I le alofa ma le agalelei o le Atua Soifua.

Na muta mai la tatou tala ananafi i finauga lea o lo’o fai nei a Kapilielu ma Mose, a’o nei upu uma o lo’o fa’afofoga pea i ai le Atua le Tama, fa’apea ma Lona Alo Pele e to’atasi, o Iesu Keriso.

Na fetalai atu nei Iesu Keriso i Lona Tama, Tama e, ai sea ua e soisoi ai.? Na tali le Atua le Tama, ua mafua ona ou soisoi ona ua ou fa’alogologo atu nei i fa’aupuga ua fai e Au auauna fa’atuatua, ua foliga mai ua fa’atusatusa e le tasi le isi i le fe’e, ae fa’atusatusa mai e le isi i le ‘ava’ava, ae taga’i fo’i Oe, sa ou gaosia i latou uma ina ia foliga ia te A’u, a’o lea ua ou fa’alogologo atu, ua fa’atusatusa i maeola o le sami.

"Lo'u Tama e, ia mamao ma lou finagalo le to'atama'i, ae ia e silasila alofa i tagata sa e gaosia e foliga i lau Afioga, sa ou ola fo'i ma soifua e pei o i latou peita'i, ona o lo latou le malamalama ma le fa'ama'ama'a o o latou loto ua mafua ai ona ou tiga i luga o le satauro, ae ui lava i lea, o fuafuaga sa e fuafua maia mai lava i le amataga, o lea ua ou tali i ai ma lo'u loto fa'amaualalo, sa e fuafua fo'i i au galuega mamana, ina ia ou fanau mai i le fale o manu, o se fale ua sili ona mataga, o se fale ua sili ona  maualalo, peita'i, sa e fa'ailoa atu i tagata o le laloloagi, ina ia o latou maua le loto maualalo, ia o latou maua le loto onosa'i i mea uma, afai la Tama ua le maua e tagata o le lalolagi ia uiga lelei uma, on a ou lagona ai lea o le fa'anoanoa tele, aua sa maualuga pea i lo'u loto, o le a usitaia ma lagona e tagata o le lalolagi le manatu e tasi, e tasi le Atua, o Ia e ona mea uma lava."

Ua silasila ane nei le Atua le Tama i lona Atali'i Pele e to'atasi, "Lo'u Atali'i e, ua ma'ea lau galuega sa e tiga ai, sa e masofa ai, sa fa'ato'ilalo ai oe, sa fa'atauemu ia toe Oe, sa sasa ia te Oe, sa tutu'i Ou lima ma Ou vae i fao, i lea lava taimi, sa ou i ai fa'atasi ma Oe lo'u Atali'i Pele i taimi uma lava. Sa ou auina atu A'u Agelu e fa'amalosi 'au ia te Oe i ma uma. Ua ou mautinoa ai loa, e pei ona e vala'au mai, "Lo'u Tama e, ua ma'ea." Sa ou va'ai atu ma lo'u loto nutimomoia ma le alofa tele ia te Oe si o'u Atali'i Pele e to'atasi."

Na a'apa ane nei le Atua le Tama ma u'u atu le a'ao o Lona Atali'i Pele e to'atasi ma fetalai atu i ai, "Lo'u Atali'i e, e To'atasi, ua ou fiafia lava ia te Oe."

Ua tau tula'i i luga le Atua le Alo, ae taofi ane e Lona Tama i lea taimi. "Lo'u Atali'i, fa'atali, se i o ta fa'alogologo atu, po'o a fo'i tau upuega ia o le a fai mai i lenei taimi.

Ua lulu le fofoga o le Atua le Tama ma fetalai ane, "Lo'u Atali'i e, ua ou lagona lava, pei lava ua fai si fa'alogo gata o le toeaina o Mose, o lea fo'i ua ou iloa atu, na te le maua le agaga o le loto maualalo, o lea fo'i fa'atoa uma atu le la tau'upuga ma Kapilielu, a'o lea fo'i ua fetaui mai ma Arona, ia se i o ta fa'alogolog atu la po'o a mea a tama nei o le a fai nei.

Ua na o le geno ane nei o le toeaina o Apera'amo ia Arona, ae ua le mafai on a taofiofi le toeaina i lea taimi. "Arona, e leai lava se leaga o la'u tala na lafo atu, o lea na ou fai atu, o le 'ava, e sinasina e pei o le kiona, ma o le 'ava lava a Arona. O le a la le leaga o la'u tala."

"Mose, e lelei lava a'u e talatalanoa tagata i le sinasina  o la'u 'ava, a'o oe, o lo'o talanoa tagata o oe na maua i le ato 'kome, 'aua la e te fia tama mamafa, leaga na fa'atafea oe i le au vaivai, i totonu o le ato 'kome."

Na toe tali mai Mose, "E a, o se 'ava pa'a, po'o se 'ava tau aitu ma tagata."

Na liliu ane nei Arona, "E Mose, loto leaga!

E faia pea