Vaega: 74

Fa’atalofa atu i le mamalu o le atunu’u, ae maise fo’i o i latou o lo’o fiafia pea e faitau i lenei tala. ia fa’amanuia le Atua i faiva ma tiute o lo’o feagai ai ma oe i lenei aso.

Ae alo maia, o le a toe fa’aauau atu latou tala fa’asolo e pei ona masani ai. Na muta mai la tala ina ua alu nei le lipoti a Agelu a le Ali’i i luga ia Kapilielu o lea la ua au mai le tali a le toeaina, a fa’apea loa ua faigata tele tagata, ona tuli mai lea o Mose se i toe ta le papa. Ua le tautala le Agelu o lo’o avea ma o latou ta’ita’i, ona ua iloa lelei lava e le Agelu lea le tulaga e o’o i ai pe afai e sau Mose i lalo nei.

Na toe teuteu lelei lava le mataupu, ma ua tonu ai loa se i toe fa’aauau pea a latou galuega o lo’o fai nei mo tagata o le atunu’u o Samoa. Manatua fo’i, o lea ua malolo lelei lava Agelu a le Ali’i i luga tonu lava o le ofisa o le Matagaluega o Paka ma Malae Ta’alo a le Malo. Ua fia iloa fo’i e Agelu a le Ali’i, po’o a fo’i galuega o lo’o feagai ma lea fo’i matagaluega e pei ona i ai nei.

Ua alu nei le ta’avale ua tu tonu lava i luma o le ofisa lenei i Tafuna, ua oso mai i fafo le ali’i pule o lea ofisa. Ua na o le tilotilo ifo nei i ai o Agelu a le Ali’i. Na savali muamua lavale ali’i pule i le isi fale o lo’o tu i le pito i tua, ma vala’au loa i tagata faigaluega o lo’o i ai, “Malo le soifua, taeao manuia, fa’afetai i le alofa o le Ali’i, o lo’o manuia tutusa i tatou uma.”

Ua fa’alogologo Agelu i le alu atu o tala a le ali’i pule, ma o latou iloa ai o se tama lelei, o se tama fo’i e alofa i ana tagata faigaluega, aua o isi ta’ita’i, e le mana’o lava e sau i lalo, e leai, e lele ane i luga. A’o lenei ta’ita’i, o se tagata e galue malosi, o lona loto fo’i ia lelei ma saogalemu nofoaga uma, aua malologa ma tafaoga a tagata.

Na toe manatua vave nei e Agelu a le ali’i le pulu tele lea o lo’o i totonu o le Paka a Liona i Tafuna, lea sa o latou malolo ai, fa’atasi ai ma le ata tifaga ta’uta’ua lea sa vili ai iina i ni nai aso ua tuana’i atu.

“Oi, o le tagata la lea e pulea i nofoaga na.?” o le fesili lea a le Agelu ulavale i lona uso a Agelu lona lua, na tali le Agelu lona lua, “ioe, o le ali’i pule lea o le matagaluega lea a le Malo.”

Na toe fa’apea ane le Agelu ulavale, “Letioa fo’i a matagofie  ma mama laufanua o le Paka ma Malae ta’alo, ona o lea ua o tatou fa’alogo atu i lenei ta’ita’i, o se ta’ita’i lelei ma le sogasoga, e pei lava ua litae mai i le vaega ‘au a le Malo Tele, a ea?

Na toe tali le Agelu lona lua, “ioe, ua litaea mai le tamaloa mai le Malo Tele, ia o lea la ua toe fo’i mai i Samoa nei, se i tau fai nisi fuafuaga lelei mo le atunu’u.”

Na felelei ifo nei i totonu o le ofisa o le Paka ma Malae Ta’alo, ma iloa ai e Agelu a le Ali’i, e ‘ese le lalelei o tama’ita’i o lo’o galulue ai, fa’atasi ai ma o latou fofoga fiafia e tautua tagata.

“Ma’imau pe ana fa’apea uma tagata, ae maise o ofisa ‘ese’ese sa o tatou asia, se manu e fa’apea mai le toeaina i luga, e avatu uma tagata Samoa i luga i le lagi.”