Vaega: 71

Malo le soifua, malo fo’i le onosa’i galuega o lo’o feagai ai i lenei aso, ae alo maia o le toe fa’aopoopoga fo’i lenei o la tatou tala fa’asolo i lona vaega fitusefulutasi, Agelu a le Ali’i.

O lo’o i ai pea le asiasiga a Agelu a le Ali’i i totonu o le malae va’alele, lea o lo’o vevesi ai nei le atunu’u, ona o le tau sailia o avanoa e malaga ai e asia fo’i nai aiga i le la itu o le motu. O le mea ua tupu, ua le maumanatu Agelu a le Ali’i, pe o le a le mafua’aga o lenei vevesi, ae ua silafia lelei e i latou tulaga uma e ao ona faia, ina ia ‘aua ai ne i toe tupu mai lenei tulaga.

O le isi itu, o le a fo’i ua silafia e Agelu a le Ali’i, o le ola faifaiaga, o le ola paie, o le ola fo’i lea e fa’apea, se tu’u ai pea, tatou te o atu lava e maua o tatou avanoa tatou te o ai. A’o le upu moni lava, afai ua i ai se manatu o se tasi e fia malaga, ia tautuana ma ia, e tatau lava ona ia manatua lelei, o le avanoa ua maua e malaga ai, e tatau lava ona fa’ataua ia te ia, ona e le na o ia, o lo’o to’atele tagata o lo’o maua ni avanoa e malaga ai.

Ua silafia lelei fo’i e Agelu a le Ali’i, o le Samoa, leaga e maua i le tulaga fo’i lea, se ‘aua le popole, ou te masani lelei lava i le tama po’o le teine lea e faigaluega i le ofisa o va’alele. O lea la e ua talatalanoa nei Agelu a le Ali’i, pe o le a se auala lelei ma le mautu e fo’ia ai lenei fa’afitauli e tula’i so’o mai i totonu o le malae va’alele pe a o’o i vaitaimi o le Kirisimasi ma le Tausaga Fou.

Ua le toe i ai lava nisi fuafuaga, ua na o le tilotilo nei i le tasi i le isi, po’o le a se mea o le a fai. Ua vave lava ona manatua e Agelua a le Ali’i, le ali’i pule o le Matagaluega o Galuega a le Malo, lea e ‘ese le mataalia i ona tiute.

Ua tilotilo le tasi i le isi, ma ua tali e nei, ona e fa’alogo atu e fai fai le ola o le afi o le va’a fo’i lea a le Kamupani i Satala, lea e alu i le sami e lafoa’i faiga a ‘ia e feololo mai, i le ta’agulu lea ua fai nei e le ali’i pule. Ua toe manatua vave e Agelu a le Ali’’i, ua alu le po atoa ana po, o pupula si ali’i ona o le pisi tele o le va’alele i lea taimi ma ua le maua ai se malologa.

Ua galulue nei Agelu a le Ali’i e faia se galuega lelei mo le ali’i pule o le kamupani va’alele, ina ia mafai ai ona fo’ia le fa’afitauli o lo’o tula’i mai pea i lea tausaga ma le tausaga, ae maise ai o taimi o le Kirisimasi ma le Tausaga Fou.

Na fa’ateia le ta’agulu a le si ali’i, ina ua ‘eu e le tagata lona ulu, ae te’i valevale a’e, e leai se tasi, ua toe tau moei’ini ae toe ‘eu fo’i e le tagata lona ulu.Ua tau mafaufau pe o le a le mea lea e tupu, ae ua toe manatua vave, o ia lea e tofa lelei lava i totonu o le ofisa. Ua amata galuega lelei a Agelu a le Ali’i e fesoasoani ai i tagata o le atunu’u o Samoa.

E faia pea