Ads by Google Ads by Google

Fagogo: Agelu a le Ali’i

Vaega: 92Fa’atalofa atu i lou alafa’i mai i fanuga lelei i lenei taeao fou, taeao manuia, taeao toto’a, i le alofa ma le agalelei o le Atua, e ala i Lana tausiga alofa mo i tatou uma. E i ai pea le fa’amoemoe o lo’o aoina le masina i lou soifua, ae alo maia, o le toe fa’aopoopoga fo’i lenei o la tatou tala fa’asolo e pei ona masani ai.Ua avea le taunu’u atu i luga o Agelu a le Ali’i ma ala ua fai ai ma fa’amama avega mo Kapilielu, ona o lea e taunu’u atu ana Amepasa, o lo’o feagai o ia ma le tau logoina o auauna fa’atuatua uma lava a le Atua le Tama, mo le fa’atasiga tele lava e pei ona finagalo i ai le Atua ina ia fa’ataunu’uinaNa fa’apea mafaufauga o le Agelu ulavale, “Se leitioa fo’i Kapilielu a tau oso le toto maualuga ona o faiga nei e fai e auauna fa’atuatua a le Atua, se’i iloga e ‘aua ne i toe fa’aiogaina o auauna fa’atuatua a le Atua, ae fa’aigoa ia solomuli i tua.”Ua ‘ata’ata le Agelu a le Atua ma toe lele atu i le afeafe o lo’o tu mai ai le igoa o le lo’omatua o Elisapeta, le uso o Maria le Tina o Iesu. Na lele nei aga’i i ai le Agelu ulavale, e o’o atu o lo’o fai lava le tatalo a Elisapeta, ma na fa’ate’ia ina ua ulufale le Agelu a le Atua i lea taimi.“Talofa Elisapeta, o manuia oe le tina, ia ua ou o’o mai e logo mai oe, o le a faia le fa’atasiga tele a tatou uma lava, e pei ona poloa’ia mai e le Atua le Tama, e tatau ona i ai uma lava tatou i lea fa’atasiga, ua e fa’afofoga mai.”Na te’i Elisapeta, ina ua fa’alogo mai i le alu atu lea e alu atu ai le Agelu a le Atua, ma lona va’ai mai e fai lava si la’ititi o le Agelu lenei, na fesili loa Elisapeta, “Ua e sau, a’o fea Kapilielu ua le sau ai, o Kapilielu e logoina matou.” Na pupula to’a atu nei i ai le Agelu a le Ali’i i a Elisapeta, “O a’u lea ua sau e sui tulaga i a Kapilielu, o le feau lena na ou sau e logo atu ai oe, e a, e i ai se mea o fa’aletonu”E le i tu’u mamaina lava e le Agelu a le Ali’i tala nei ua lafo ane e Elisapeta ia te ia, na ona liliu ane lava o le Agelu ulavale e le i toe fa’atali, “E a ali’i Elisapeta, mea lea e leaga ai le tina ua toe fia to, ae ua lo’omatua, ua e fa’alogo mai, tasi le fa’atonuga, tasi le fa’alogo, tago la’ia i lou omo.”Na ona uma lava o le fale o Elisapeta, toe lele loa le Agelu ulavale i le fale o lo’o tusi mai ai le igoa o Sakaio, ma ua ulufale loa e le i toe fa’atali. Na fa’ateia Sakaio ina ua ulufale atu le Agelu a le Ali’i, “Sakaio, ua ou o’o mai e logo mai oe, o le poloa’iga a le Atua le Tama, ia o tatou auai uma i le fa’atasiga o le a faia i le aso a taeao, ia e auai i lea fa’atasiga, ua e fa’alogo mai.”Ua le tauala Sakaio, ua fa’ateia fo’i o ia i lea poloa’iga, aua e masani lava ona alu atu Kapilielu e logo ia i fa’atasiga fa’apenei, “A o fea o i ai Kapilielu, o Kapilielu lava e sau e logo mai a’u.”Na ona liliu lava o le Agelu ulavale toe fa’apea ane i a Sakaio, “O le mea lea e leaga ai mea, na tuli atu fo’i oe e te a’e i le sukamolo, ae e alu atu e a’e i le sasalapa, tasi le fa’atonuga, tasi le fa’alogo….”E faia pea