Ads by Google Ads by Google

Faavae suiga Ofisa Leoleo i le le faamaoni o nisi leoleo

O le le faamaoni o nisi o leoleo i le faatinoina o latou tiute tauave i aso ta’itasi, amio le taupulea atoa ai ma le masalomia o lo latou aafia i amioga faasolitulafono, o isi ia o mafuaaga na taua e le Komesina o Leoleo i lana tusi na tufatufaina atu i vaega eseese o le matagaluega i le amataga o le vaiaso nei, ua mafua ai ona faia suiga i totonu o le Matagaluega.

O le Aso Gafua na te’a nei na tuuina atu ai se poloaiga mai le tofa Tuaolo M. Fruean i le Matagaluega atoa a Leoleo, e faailoa i ai suiga ua fuafuaina mo le matagaluega.

O ia suiga e aofia ai le aveese mai o Lt. McClusky Fa’agata lea sa avea ma Ta’ita’i Uati (Watch Commander) i le lala o le Ofisa o Leoleo i Tafuna, ae tofia e galue i le Toese i Tafuna mo le faatinoina o ona tiute fou.

Na taua i le tusi a le komesina, o le a ripoti atu galuega faatino a Lt. Fa’agata atoa ai ma faatonuga mo ia i lalo o le alii pule o le toese i Tafuna, susu Comdr. Lumana’i Maifea.

O le suiga lona lua e aofia ai le alu ese mai o le alii leoleo Satini ia Det. Sgt. Vaina Vaofanua mai lona tulaga sa i ai o se leoleo suesue i le Vaega Suesue a Leoleo (CID), ae ua tofia e galue i le lalo o le Ofisa o leoleo i Tafuna, e sui tulaga ia Lt. Fa’agata.

O le a ripoti atu o ia mo faatonuga i le alii leoleo ia Cpt. Fo’ifua Fo’ifua.

O le suiga lona tolu e aofia ai le alu ese mai lea o le tamaitai leoleo ia Vaivasa Wells sa galue i le vaega o le Patrol i le lala o le Ofisa o leoleo i Tafuna, e galue i lona tulaga fou o se leoleo suesue, i lalo o le vaavaaiga a Comrd Lavatai Taase Sagapolutele.

“Ua oo mai ia te a’u le i ai o se manaoga i le fia faasa’o ma toe faaleleia nisi o gaioiga o loo mafua ai ona tutupu nisi o faafitauli i le faatinoina o tatou tiute tauave i aso ta’itasi, ina ia faaitiitia ai le toe tulai mai o faafitauli nei, aemaise lava i le faatinoina o tatou tiute i le galuega,” o se vaega lea o le tusi a le alii komesina.

“O lea ou te molimauina le tulaga o le le faamaoni i le faatinoina o tiute tauave, o amioaga le talafeagai ma le le taupulea, poo tuuaiga foi i le faia o amioga tau solitulafono o loo tuuaia le aafia ai o nisi o tagata faigaluega,” o le saunoaga lea a Tuaolo.

E le gata la i amioga faaletonu na taua e le alii komesina o loo aliali mai i le matagaluega, ae ua i ai foi se manaoga mo le faia o ni suiga laiti ina ia toe siitia ai i luga le tulaga lelei o le tautua a vaega taitasi o le Matagaluega, ina ia mautinoa o loo sologa lelei pea le faatinoina o tiute a leoleo.

Na taua e se molimau i le Samoa News e faapea, o se tasi o mafuaaga sa faavae i ai suiga ua faia e le komesina, ona o le faalavelave lea na osofaia ma talepe ai e nisi le lala o le faletupe a Hawaii i Tafuna, i le vaveao o le aso Faraile o le vaiaso na te’a nei.

Fai mai le molimau, ana vave gaioiga a leoleo mai le latou lala i Tafuna, e mautinoa lava le maua o le augaoi i totonu ao le’i sosola i fafo ma le faletupe.

Fai mai le molimau, o Lt. Fa’agata sa Ta’ita’i Uati i le vaveao lea na taunuu atu ai le valaau ua talepe le faletupe.

Ina ua fesiligia le Sui Komesina e uiga i lea mataupu, na faamaonia mai ai e le tofa Leseiau Laumoli e sa’o.

“O le isi lena mafuaaga o le fesuiaiga e pei ona faia e le komesina, ona o le faalavelave lea na talepe ma gaoi ai e nisi le lala o le faletupe a Hawaii i le vaiaso na te’a nei, peitai ina ua taunuu le telefoni i le ofisa o leoleo i Tafuna mo se fesoasoani, ae fai e le alii lutena sa taitai uati le faaiuga e sili pe a tuli atu se taavale leoleo i Fagatogo e tali i le valaau,” o le saunoaga lea a Laumoli.

“Ana sa’o le faaiuga na faia e Lt. Fa’agata i le vaveao lea, e maua uma lava le au alii na talepeina le faletupe. peitai o le faatamala, le kea ma le le manatu mamafa o le alii Lutena i ona tiute na tofia i ai o ia, ua mafua ai ona tulai mai le faaletonu, ma faia ai loa le faaiuga e sili pe a aveese mai le mea sa galue ai, ae avatu i ai se isi tagata e naunau i le galuega,” o le saunoaga lea a Laumoli.

Na faamaonia mai e Laumoli le faia o se suesuega faapitoa i le lotoifale o le Ofisa o leoleo, e uiga i le mataupu e pei ona tulai mai.

“O Taitai Uati, o i latou ia o loo tuu atu i ai le faatuatuaga o le galuega, e tatau ona latou faia faaiuga mautu, sa’o ma lelei ina ia manuia ai le atunuu, saogalemu ai tagata uma, ae afai o le ituaiga faaiuga lea e tulai mai i taimi e moomia ai le fesoasaoni, lona uiga e le manaomia ni ituaiga taitai faapea,” o le isi lea saunoaga a Laumoli.

E ese mai i le mataupu e pei ona suesueina nei e le ofisa o leoleo, e leai nisi mataupu o loo tuuaia ai ni leoleo o aofia ai i lea suesuega, e pei ona faamaonia mai e Laumoli.