Ads by Google Ads by Google

Faatulaga semina faapitoa mo Faatonusili a le malo

O le faaiuga o le vaiaso nei ua faatulaga e faia ai se semina faapitoa mo faatonusili ma faauluuluga o matagaluega ma ofisa uma a le malo, i lalo o le taitaiga a le alii kovana sili ia Lolo Matalasi Moliga, o le faailoaina lea o auala e mafai ai ona faaleleia tulaga faata’ita’i mo soo se tasi ua avea ma ta’ita’i, atoa ai ma auala e faatino ai galuega ma le faamaoni.

 

I le faatulagaina ai o lenei semina mo faatonusili, na tuuina atu ai e le tofa Le’i Sonny Thompson, le faatonusili o le Matagaluega o Tagata Faigaluega a le malo, se tusi i le Vaega o Faamasinoga ma le Fono Faitulafono, e valaaulia ai i latou ina ia auai i lenei semina.

 

O le afioga i le faamasino sili ia Lealaialoa Michael Kruse, o le afioga i le alii peresetene o le senate ia Gaoteote Palaie Tofau ma le fofoga fetalai o le maota o sui ia Savali Talavou Ale sa tuuina atu i ai tusi valaaulia.

 

Na taua e le tofa Le’i i lana tusi sa tuuina atu i le aso 1 Aperila na te’a nei e faapea, o le agaga o lenei semina ina ia mautinoa ai, o i latou uma o lo o umia tulaga taitai i le faigamalo o lo o i ai nei a Amerika Samoa, o lo o latou usitaia ma mulimuli i tulafono ma ta’iala, ma ia mautinoa foi o lo o latou mulimulita’i i nei tulafono, ma ia faia a latou tiute i le faamaoni ma le tuu atoatoa atu i ai o latou loto, ina ia mafai ai ona ausia le sini o le faigamalo e pei ona i ai, ia faamuamua tagata.

 

“Matou te manatu o se avanoa lelei foi lea e mafai ai ona faasoa mai so outou finagalo faataitai o le fono ma le faamasinoga i tulaga o auaunaga, pe fautua mai foi i mataupu e ono fesootai ma tulaga tau i le amio e ao ona faatinoina ai galuega a le malo,” o se vaega lea o le tusi a Le’i i taitai o le fono ma le faamasinoga.

 

Talu lava ona tulai mai le faigamalo a Lolo ma Lemanu, o lo o unaia pea e le alii kovana sui o lana kapeneta ina ia mulimulita’i i le tulafono ma ia tausisi i le faamaoni ona manuia ai lea o le atunuu atoa.

 

Soo se taimi lava foi e feiloa’i ai le kovana ma lana kapetena, e unaia ai e le alii kovana faatonusili ina ia galulue i le mea sili e gata mai ai lo latou malosi, mo le faasaoaina lea o tupe a le malo, ae mafai ai ona maua ni isi tulaga lelei e faaleleia ai le tautua a le malo mo le atunuu.

 

O se ulua’i semina lea ua faia mo faatonusili talu ona tauave mai e Lolo ma Lemanu le taitaiina o le malo.

 

I le faaleleia atili o le tautua a le malo, ua tuuina atu ai e le alii kovana sana poloaiga faalaua’itele i faatonusili o matagaluega ma ofisa uma a le malo, mo le faavaeina lea o se Vaega Faapitoa latou te iloiloina tulaga o matagaluega ma ofisa a le malo ma tupe o lo o faaalu ai e le malo, ina ia mautinoa e mafai ona maua uma nei faamaumauga ao aga’i atu ai le malo i le 100 aso talu ona latou taitaiina o le malo.

 

O le vaiaso nei, Aperila 8 lea ua faailoa e Lolo e amata ai le tautua a le vaega faapitoa lea o le a galulue i le faatinoina o lenei auaunaga, e aofia ai le faatusatusa o faamaumauga mai le Ofisa o le Tupe ma le Paketi i tupe o lo o faaalu mo le malo i tulaga o totogi o tagata faigaluega.