Ua tuuina atu nei e le afioga i le kovana sili ia Lolo Moliga se ta’iala, i faatonusili ma faauluuluga o matagaluega ma ofisa uma a le malo, i auala e tatau ona faatulaga ai le faafoeina atoa ai ma le faatautaiga o le polokalame o Atina’e Tetele (CIP) a le malo.

Na taua e Lolo i lana tusi e faapea, o se tasi o moemitiga o le faigamalo lenei o le faaleleia lea o le tatou va feagai ai ma le malo feterale, e ala i le tatou usitaia lea ma mulimulita’i i ta’iala ua latou faatulaga, mo le faaaogaina o tupe o lo o aumai e fesoasoani ai i le atina’eina o le tatou atunuu.

Saunoa Lolo e faapea, talu lava ona tula’i mai i le taitaiina o le malo, ua tele auala ua mafai ona faaaoga e le faigamalo e fesoasoani ai i le ausia o nei ta’iala, aemaise ai lava o le taumafai e aveese tulaga faaletonu i tupe feterale sa aafia ai nisi o matagaluega a le malo.

Ae ui nei taumafaiga ina ia faaleleia le va feagai ai ma le malo feterale, na taua e le alii kovana e faapea, e mamao lava ala e tatau ia Amerika Samoa ona latou uia, ina ia mautinoa ai latou te mulimulita’i ma ausia ta’iala e pei ona faatula’i e le malo feterale.

“O nisi o taimi tatou te le ausia ai ta’iala e ao ona tatou tausisia i tulaga o le polokalame o Atina’e Tetele mo le malo, e pei ona manaomia mai ai tatou e le Matagaluega o le Initeria,” o se vaega lea o le tusi a le alii kovana.

E ui o lea ua faaleleia tulaga o tupe faaalu a le malo e pei ona maitauina i le taimi nei, peitai o lo o i ai lava le faaletonu laititi o lo o tulai mai, i le le ausia lea o ta’iala mo le faaaogaina o tupe feterale, ma avea ai ma itu e aafia ai le aofa’i o tupe mo atina’e tetele e tuuina mai mo Amerika Samoa.

“E le tatau ona tatou faaauauina lenei faaletonu, pe afai o lo o tatou matua manaomia tupe feterale e lagolago ma fesoasoani i le atina’eina o le tatou tamaoaiga atoa ai ma atina’e tetele i le atunuu,” o le saunoaga lea a Lolo.

O ta’iala fou la e pei ona faalauiloa e le alii kovana sili, tauala mai i le afioga a Tuimaseve Laupola lea o lo o avea ma Faatonu o le polokalame o le CIP  a le malo, e aofia ai le,  tatau lea ona tuu faatasi uma talosaga mai ofisa a le malo mo atina’e e fia faatupe mai i le CIP.

Ia galulue faatasi ofisa uma ma le ofisa o le TOFR mo le tuu faatasia o atina’e e fia faatupe mai le CIP, ma ia mautinoa e mulimulita’i ofisa uma i ta’iala o lo o faatulaga mai e le malo feterale, i auala ma tulaga e faatulaga ai talosaga ma atina’e.

Soo se talosaga mo ni atina’e e fia fautua, e tatau ona tuuina atu muamua le talosaga i le Komiti o le polokalame a le CIP mo le iloiloina, ona tuuina atu lea o se fautuaga a le Komiti i le alii kovana mo lana faamaoniga, ina ia mautinoa o tulaga uma ua faia o lo o mulimulita’i i ta’iala ma faiga faavae o lo o unaia e le faigamalo.

Afai ae talia le talosaga mo atina’e, ia mautinoa e tuuina atu e le ofisa se ripoti o le atina’e i le kovana ma le lutena kovana, ina ia mafai ai ona mulimulita’i laua i le tulaga ma le faagasologa o le galuega.

Ua fautuaina foi le tatau lea ona mulimulita’i ofisa ma matagaluega i ta’iala o atina’e taitasi, ina ia tusa ai ma le umi sa fuafuaina mo le galuega, ma ia le silia i le 5 tausaga le umi e fausia ai.

Na faaiu le tusi a le alii kovana i lona fautuaina lea o faatonusili ma faauluuluga o ofisa ma matagaluega a le malo, o le mulimulita’i i le ta’iala e pei ona taua o le a atagia atu ai taumafaiga a le faigamalo o lo o i ai nei, i le va feagai ai ma le Initeria.