Ads by Google Ads by Google

Faatonuina e le kovana le sailia o auala e faafaigofie ai femalagaiga

Ua faatonuina e le alii kovana sili ia Lolo Matalasi Moliga ana Faatonusili e to’afa ina ia oo atu i le faaiuga o le masina nei, ua i ona lima se ata faataoto e faaleleia ai le auaunaga o lo o tuuina atu mo tagata malaga, i le taimi e taunuu ai i le malae vaalele i Tafuna.

 

O lea faafitauli na taia ai le silasila a le alii kovana ina ua toe taliu mai i le atunuu i le malaga a le Hawaiian Air i le po o le Aso Tofi na te’a nei, ma ia maitauina ai le tuai o le auala o lo o uia mo le siakiina o pepa malaga, vava mamao nofoaga e tau sii atu i ai a latou uta mo le siakiina ma avea ai o se faafitauli i ni isi o tagata matutua o le atuunuu.

 

O le tusi a Lolo sa tuuina atu i le Loia Sili ia Afoa L. Su’esu’e Lutu; Faatonusili o le Ofisa o Faatoaga ia Lealao M. Purcell; Teutupe ia Falema’o Phil Ma’o ma le Faatonusili o Pulega o Uafu ma Taulaga ia Taimalelagi Dr. Claire Tuia-Poumele.

 

Na taua e Lolo i lana tusi e faapea, ina ua toe taliu mai i le atunuu, sa ia maitauina ai se vaaiga e le’i nofo lelei i lona loto ina ua taunuu atu i totonu o le fale e taunuu i ai pasese sa malaga mai i le vaalele.

 

O lea vaaiga e le gata ua atagia mai ai le le lelei o le faatulagaina o galuega, ae ua atagia mai ai foi le le lelei o le auaunaga o lo o tuuina atu i le atunuu, ae sili ai nai lo ia mea uma, o se ata le manuia lea o le a faafeiloaia ai le ulufale mai o turisi i le teritori.

 

Fai mai Lolo, e ese na tau siaki pepa a le tagata malaga e le Ofisa o Femalagaaiga, ae toe manaomia foi le siaki e le Ofisa o Tiute o pepa mo uta o lo o aumai, ona faatoa tuu atu lea o le uta a le tagata malaga e siaki.

 

“E tolu isi laasaga e tatau ona uia e le tagata malaga ona faatoa ulufafo lea ma le malae vaalele, e ese ona tau aveese mai lana ato mai le vaega e aumai ai uta a le vaalele, ona tuu atu lea i le masini a le Ofisa o Faatoaga, a maea ona toe siaki foi lea e le Ofisa o Tiute,” o le saunoaga lea a Lolo i lana tusi i ana faatonu.

 

Na taua e Lolo e faapea, o le vaega lea e siaki ai e le Ofisa o Tiute ato a tagata, e fai lava si maualuga, e faa faigata i tagata malaga ona tau sii i luga a latou ato mo le siakiina, aemaise lava pe afai o ni tagata matutua o le atunuu ia o lo o malaga mai i le vaalele.

 

Fai mai Lolo, e matua le talia lava i lana vaai lea ituaiga gaioiga, ma e tatau i faatonu ona latou galulue e saili se isi auala e faaleleia ai le tautuaina o tagata malaga i le taimi e toai taunuu mai ai.

 

O le silasila a le alii kovana, ua fai lava si tele o le avanoa ua fao e le masini a le Ofisa o Faatoaga, ma ua vaapiapi ai le avanoa mo tagata malaga e savavali ai, e le gata i lea, o le vaega lea e siaki ai pepa a le Ofisa o Tiute, ua fai lava si mamao ma le vaega e piki ai uta a tagata malaga, “pau lava le lagona o lo o i le tagata malaga, o le fia oo i le fale e malolo, ua vaivai mai lana malaga umi sa sau ai.”

 

O le faaiuga o le masina lenei lea ua tuu atu e le alii kovana i ana faatonu latou te sailia ai se isi auala e sili ma faigofie, e tautua ai tagata malaga pe a  taunuu i le malae malae vaalele, ma taofia ai tulaga le manuia o lo o faia i le taimi nei.

 

E talitonu Lolo, e leai se mea e ala ai ona toe iloilo e le Ofisa o Tiute pepa malaga a tagata, sei vagana ai pepa mo uta o lo o aumai, e tatau foi ona i ai se isi auala talafeagai e iloilo ai pepa malaga a tagata e le Vaega o Femalagaaiga ma le Tiute, ina ia taofia ai ni feeseeseaiga e ono tulai mai, ona o ni isi o tagata e amio le taupulea, e le mafaufau toe le faaaloalo fo’i.

 

O le isi itu taua na aofia i le tusi a Lolo, o tulaga i ova taimi o tagata galuega, lea ua ia fautuaina ai le toe faa faigaluega o ni isi tagata ina ia foia ai le tulai mai ova taimi i taimi e taunuu mai ai malaga a le vaalele.

 

Fai mai Lolo, ua uma ona ia folafola i le kamupani vaalele a le Hawaiian Air, e le toe faaopoopoina e le malo le avega tau tupe i luga o le kamupani ona o tulaga i ova taimi, aua e le malamalama o ia pe aisea e galue ai se tagata faigaluega mo itula e 40 i le vaiaso, toe faaopoopo atu ai ma itula ova taimi e 20 ae na o le lua malaga a le vaalele i le vaiaso.